Goranboy rayonunun Tatarlı kənd sakini Nazim Adilov DİN rəhbərliyinə ünvanladığı məktubunda DİN-in A.N.Heydərov adına Respublika Hospitalının Nevrologiya şöbəsinin tibb personalının ona göstərdiyi yüksək diqqət və qayğıdan, aldığı peşəkar müalicədən razılığını bildirir, həmçinin 2 iyul – Polis Günü münasibəti ilə DİN rəhbərliyinə öz səmimi təbriklərini çatdırır, daxili işlər orqanlarının şəxsi heyətini ürəkdən təbrik edir, onlara çətin və şərəfli işlərində müvəffəqiyyətlər arzulayır.

Vətəndaş Samir Vəliyev Şəki rayonu ərazisində baş vermiş yanğın hadisəsinin qarşısının alınmasında ŞRPŞ əməkdaşlarının yaxından iştirakına və göstərdikləri köməkliyə görə DİN rəhbərliyinə öz minnətdarlığını bildirir.

Qusar şəhər sakini, 2-ci qrup əlil Hacımirzə Ağamirzəyev DİN rəhbərliyinə ünvanladığı təşəkkür məktubunda Qusar RPŞ-nin rəisi Ziya Əliyev tərəfindən vətəndaşlara göstərilən diqqət və qayğıya görə minnətdarlığını ifadə edir.

Sumqayıt şəhər sakini Validə Xudaverdiyeva DİN rəhbərliyinə ünvanladığı minnətdarlıq məktubunda müraciətinə obyektiv baxılmasına və ona dəymiş maddi ziyanın ödətdirilməsində göstərdikləri köməyə görə BMCMİ-nin rəhbərliyinə və əməkdaşlarına təşəkkürünü bildirir.

Vətəndaş Ceyhun Həsənov DİN-ə ünvanladığı məktubunda bildirir ki, iyunun 30-da axşam saatlarında 2 aylıq körpəsinin səhhəti qəfildən pisləşib. Təcili körpəni Şamaxı şəhər xəstəxanasına aparıblar. Orada həkimlərin müdaxiləsi ilə uşağın səhhəti normallaşıb. Lakin evə gələndən bir az sonra yenidən vəziyyəti pisləşdiyindən onu Bakıya gətirmək məcburiyyətində qalıblar. Müəllif yazır ki, avtomobildə müəyyən nasazlıq olduğundan sürətlə idarə etmək mümkün deyildi. Gecə saat 2.20 radələrində Qaradağ rayonu ərazisində stasionar yol polisi postuna çatanda ilk ağlına gələn polisə müraciət etmək olub. O, yol polisi əməkdaşlarına problemi bildirib və uşağı Bakıya çatdırmaq üçün kömək istəyib. Polis baş serjantları Fariz Hümbətov və Anar Abdullayev dərhal onu, həyat yoldaşı və körpəsini öz xidməti maşınları ilə K.Fərəcova adına Elmi-Tədqiqat Pediatriya İnstitutuna (OMD) çatdırıblar. Polis əməkdaşları körpənin səhhəti tam qaydasına düşənədək onların yanında olub, ailəyə mənəvi dəstək veriblər. C.Həsənov bu yüksək mənəvi keyfiyyətlərə malik polis əməkdaşlarının olmasına görə, insanlara göstərdikləri diqqət və qayğıya, sonadək ailələrinin yanında olaraq mənəvi dəstəyə və təsəlliyə görə DİN rəhbərliyinə, həmçinin BDYPİ-nin Yol Patrul Xidməti Alayının 3-cü taqımının əməkdaşlarına dərin təşəkkürünü bildirir və belə polis əməkdaşlarının qürur mənbəyi olduğunu qeyd edir.

Yasamal rayonu ərazisində yerləşən 158 saylı tam orta məktəbin kollektivi və ətrafda yaşayan bina sakinləri adından vətəndaş Afət Şeyxzadə DİN-ə təşəkkür məktubu ünvanlayıb. Müəllif məktubunda həmin ərazidə kiçik bir döngədə yol hərəkətinin təşkili ilə bağlı müraciətlərinə operativ baxılaraq müsbət həll olunduğuna, məhəllə və məktəb uşaqlarının həmin döngədəki yolda təhlükəsizliyinin təmin edildiyinə görə DİN rəhbərliyinə, həmçinin Yasamal RPİ Dövlət Yol Polisi Şöbəsinin rəisi və şəxsi heyətinə təşəkkürünü bildirir.

Bakı şəhər sakini Elçin Axundzadə ona dəymiş maddi ziyanın qısa zaman kəsiyində ödətdirilməsinə görə DİN rəhbərliyinə minnətdarlığını bildirir.

Bakı şəhər sakini Güləşir Cəbiyev paytaxtın sıxlıq müşahidə olunan avtomobil yollarında sıxlığın aradan qaldırılmasında fədakar xidmətləri olan BDYPİ YPX-nin əməkdaşlarına təşəkkür edir.

Sumqayıt şəhər sakini Sevil İmanova oğlu Vəzir İmanovun daxili işlər orqanları sıralarına xidmətə qəbul olunduğuna görə DİN rəhbərliyinə minnətdarlığını bildirir.