Vətəndaş Şahin Mustafayev Mingəçevir şəhər ağsaqqalları adından DİN rəhbərliyinə ünvanladığı təşəkkür məktubunda xüsusi karantin rejimi müddətində yorulmaz xidmətlərinə və fədakarlıqlarına görə ŞPŞ-nin əməkdaşlarına öz minnətdarlığını bildirir.

Bakı şəhər sakini Mətanət Salahova Daxili İşlər Nazirliyinə ünvanladığı məktubunda sosial şəbəkə hesabının oğurlanması ilə bağlı müraciətinə Binəqədi Rayon Polis İdarəsinin 7-ci Polis Bölməsində obyektiv baxıldığına və ətraflı araşdırıldığına, həmçinin Bakı Şəhər Baş Polis İdarəsinin əməkdaşları tərəfindən axtarışda olan şəxsin saxlanılması istiqamətində keçirilən operativ əməliyyat tədbirlərinə görə Bakı ŞBPİ-nin və Binəqədi RPİ-nin əməkdaşlarına təşəkkürünü bildirir.

Bakı şəhər sakini Eldar Eldarlı aprel ayının 26-da avtomobili üzərinə sürən şəxs tərəfindən təhqir olunması barədə müraciətinə Suraxanı RPİ-nin 32-ci Polis Bölməsində operativ baxıldığını, həmçinin avtosfer.az saytında bu barədə yayımlanmış məlumata DİN rəhbərliyi tərəfindən dərhal reaksiya verildiyini qeyd edir, qısa müddətdə həmin şəxsin müəyyən edilərək saxlanıldığını bildirir.

E.Eldarlı məktubunda müraciətinə dərhal reaksiya verilərək müvafiq tədbir görüldüyünə görə DİN rəhbərliyinə və Bakı şəhər Dövlət Yol Polisi İdarəsinin əməkdaşlarına təşəkkürünü bildirir.

Abşeron rayon sakini Gündüz Əsgərov müraciətinə operativ baxıldığına və ona dəymiş zərərin tam ödətdirildiyinə görə DİN rəhbərliyinə və Baş Mütəşəkkil Cinayətkarlıqla Mübarizə İdarəsinin əməkdaşlarına minnətdarlıq edir.

Bakı şəhər sakini Nicat Əmiraslanov ölkəmizdə koronavirus pandemiyası ilə mübarizədə həyata keçirilən karantin tədbirlərində polis əməkdaşlarının xidməti vəzifə borclarını layiqincə yerinə yetirdiklərinə, eləcə də fədakarlıq nümayiş etdirdiklərinə görə DİN rəhbərliyinə və şəxsi heyətinə minnətdarlığını bildirir.

Göygöl rayon sakini Ramin Heydərzadə DİN-ə ünvanladığı təşəkkür məktubunda koronavirus pandemiyasının qaşısının alınması məqsədilə ölkə ərazisində elan edilmiş xüsusi karantin rejimi ərəfəsində əhali arasında aparılan maarifləndirmə işlərinə və həyata keçirilən təhlükəsizlik tədbirlərinə görə Azərbaycan Polisinə minnətdarlığını bildirir.

Gəncə şəhər sakini Qəmbər Verdiyev DİN rəhbərliyinə ünvanladığı təşəkkür məktubunda yazır:

“Hörmətli cənab Nazir, hər gün sosial şəbəkələrdə polis əməkdaşlarının vətəndaşlara göstərdiyi köməkliyi izləyirdim. Gəncə şəhər Baş Polis İdarəsinin əməkdaşı, polis serjantı Elnur adlı şəxsin əlil bir vətəndaşa bir cüt ayaqqabı almasına şahid olmağım bir daha məni əmin etdi ki, Siz və şəxsi heyətiniz daim xalqa və dövlətimizə xüsusi qayğı ilə yanaşırsınız. Buna görə də Sizə dərin minnətdarlığımı bildirir, çətin və şərəfli xidmətinizdə uğurlar arzulayıram”.

Gəncə şəhər sakini Süleyman Vəliyev öz təşəkkür məktubunda etdiyi müraciətin operativ və obyektiv şəkildə araşdırılmasına görə DİN rəhbərliyinə minnətdarlığını bildirir.

Ağdam rayon sakini Elçin Quliyev ölkəmizdə koronavirus pandemiyası ilə aparılan mübarizədə fəal və fasiləsiz işlərinə, həyata keçirilən təhlükəsizlik tədbirlərinə, eləcə də xidmətləri zamanı vətəndaşlara göstərilən qayğıya, köməkliyə görə DİN rəhbərliyinə və Ağdam Rayon Polis Şöbəsinin şəxsi heyətinə minnətdarlığını bildirir.