Bakı şəhər sakini Hikmət Əliyev Daxili İşlər Nazirliyinə təşəkkür məktubu ünvanlayıb. O, “102” Xidmətinə məlumat verən şəxslərin fakt üzrə ilkin ərizənin alınması üçün polisə dəvət olunmayacağı, bu qəbildən müraciətlərlə əlaqədar sənədləşdirmənin onlar üçün rahat şəraitdə, yaşadıqları və ya olduqları ünvana gələn polis əməkdaşları tərəfindən aparılacağı barədə Daxili İşlər naziri, general-polkovnik Vilayət Eyvazovun müvafiq əmrinin təqdirəlayiq olduğunu qeyd edir, operativliyin yüksəldilməsi, vətəndaş məmnunluğunun təmin edilməsinə görə DİN rəhbərliyinə təşəkkürünü bildirir.

Neftçala rayonunun Həsənabad qəsəbə sakini Əli Nağıyev özü və anasının adından Daxili İşlər Nazirliyinə təşəkkür məktubu ünvanlayıb.

Ə.Nağıyev Azərbaycan polisinin vətəndaşların hüquqlarını, azadlıqlarını, qanuni mənafelərini yüksək səviyyədə qorumaqla bərabər insanlara xüsusi diqqət və qayğı göstərdiklərini qeyd edir, vətəndaşların müraciətlərinə baxılmasına, qəbuluna daim xüsusi həssaslıqla yanaşıldığına, zərərçəkmiş şəxslərin hüquqlarının bərpası ilə bağlı məsələlərin həllində hər zaman operativlik göstərildiyinə görə DİN rəhbərliyinə təşəkkür edir.

Fransanın Azərbaycandakı səfirliyindən Daxili İşlər Nazirliyinə təşəkkür məktubu daxil olub.

Məktubda Fransadan ölkəmizə gəlmiş turuist qadının üzləşdiyi problemlə bağlı etdikləri müraciətə dərhal reaksiya verildiyi, DİN-in Beynəlxalq Əməkdaşlıq İdarəsi və Şəki Şəhər Rayon Polis Şöbəsi rəhbərliyinin operativ müdaxiləsi nəticəsində qısa müddətdə həllini tapdığı qeyd olunur.

Səfirlik adından müraciətlərinə həssas yanaşıldığına, diqqət və operativliyə görə DİN rəhbərliyinə, həmçinin Beynəlxalq Əməkdaşlıq İdarəsinin rəis müavini E.Aslanova və Şəki Şəhər Rayon Polis Şöbəsinin rəisi A.Muradova minnətdarlıq ifadə olunur.

Bakı şəhər sakini Elçin Əlibəyli DİN rəhbərliyinə ünvanladığı təşəkkür məktubunda müraciətinin müsbət həll olunmasında və ona dəymiş maddi ziyanın tam ödətdirilməsində göstərilən köməkliyə görə Daxili İşlər Nazirliyinin və Bakı Şəhər Baş Polis İdarəsinin rəhbərliklərinə minnətdarlığını bildirir.

“Yaşadığımız ünvanda baş vermiş oğurluq hadisəsinin açılmasında fədakarlıq göstərən, şübhəlini qısa müddət ərzində isti izlərlə taparaq, istintaqa təslim etdiyinə, şəxsi insani keyfiyyətlərinə, işə məsuliyyətli yanaşmasına görə Nizami RPİ-nin 24-cü Polis Bölməsinin əməkdaşı, polis mayoru Zaur Musayevə ailəmiz adından təşəkkür edirik”.

Bu fikirlər Bakı şəhər sakini Tərlan Məmmədzadənin DİN-ə ünvanladığı təşəkkür məktubundandır.

Bakıda müvəqqəti məskunlaşan məcburi köçkün Xanım Həsənova DİN rəhbərliyinə ünvanladığı məktubda nəvəsinin səhhətində yaranan problemlə əlaqədar ona köməklik göstərərək vaxtında xəstəxanaya çatdıran Binəqədi RPİ-nin 5-ci Polis Bölməsinin əməkdaşları - Süleyman Abbasova və Elton İsayevə təşəkkürünü bildirir.

Bakı şəhər sakini Elmar Abdullayev müraciətinə obyektiv şəkildə baxılaraq avtomobilinin cərimə meydançasından buraxılmasında ona göstərilən köməyə görə DİN rəhbərliyinə minnətdarlığını bildirir. Vətəndaşların müraciətlərinə həssaslıqla yanaşdıqlarına görə polisin fəaliyyətini yüksək dəyərləndirir, gərgin xidməti fəaliyyətlərində uğurlar diləyir.

Bakı şəhər sakini Orxan Qafarzadə DİN rəhbərliyinə ünvanladığı təşəkkür məktubunda ölkəmizdəki ictimai sabitliyə, cinayətkarlıqla mübarizənin təmininə, insan hüquq və azadlıqlarının qorunmasına görə daxili işlər orqanları əməkdaşlarının fəaliyyətini yüksək dəyərləndirir. Azərbaycan Polisi ilə qürur duyduğunu və hər zaman dəstəklədiyini bildirir.

Bakı şəhər sakini Aytən Tağıyeva evində baş vermiş oğurluq hadisəsinin üstünün tez bir zamanda açılaraq ona dəyən ziyanın ödənilməsində göstərdikləri köməyə görə Suraxanı Rayon Polis İdarəsinin əməkdaşlarına təşəkkürünü bildirir və vətəndaşların müraciətlərinə operativ və obyektiv yanaşdıqlarına görə daxili işlər orqanları əməkdaşlarının fəaliyyətini yüksək dəyərləndirir.