Murad Quliyev göndərdiyi minnətdarlıq məktubunda Cəlilabad RPŞ-nin Qeydiyyat və şəxsiyyət vəsiqəsi bölməsinin fəaliyyətindən razılığını bildirir. O, bölmə əməkdaşlarının nümunəvi davranış sərgilədiklərini, vətəndaşlara diqqət və qayğı ilə yanaşdıqlarını xüsusilə vurğulayır. “Xalqın gözü əsl tərəzidir”-, deyən M. Quliyev bütün bunların Azərbaycan polisinə başucalığı gətirdiyini bildirir.

Bakı şəhər sakini Kərimova Gülnarə İnqilab qızı göndərdiyi məktubunda Yasamal RPİ-nin 19-cu Polis Bölməsinin əməkdaşı, polis kapitanı İsmayıl Əsgərova xüsusi təşəkkürünü bildirir. Vətəndaş yazır ki, aprelin 3-də baş vermiş hadisə zamanı İ.Əsgərov etik normalara yüksək səviyyədə riayət edərək öz vəzifə borcunu yerinə yetirmiş və vətəndaşları qorumuşdu. G. Kərimova qeyd edir ki, belə hallar cəmiyyət arasında polisə inamın və hörmətin daha da artmasına təkan verir.

Lənkəran rayon sakini, “Hüquqi yardım” İctimai Birliyinin sədri Qasımov İlqar Manaf oğlu Baş Pasport Qeydiyyat və Miqrasiya İdarəsinin Cənub Bölgəsi üzrə yerli şöbəsinə müraciət edərək yeni şəxsiyyət vəsiqəsi almaq istədiyini bildirib. Onu gülərüzlə qarşılayan peşəkar personal dərhal lazım olan proseduru həyata keçirib və bir həftə sonra şəxsiyyət vəsiqəsi hazır olub. İ. Qasımov göndərdiyi məktubunda yazır ki, şöbənin əməkdaşları yeni şəxsiyyət vəsiqəsini ona təqdim edəndə gözlərinə inanmayıb. Çünki belə xidmətin yalnız ASAN Xidmətdə olduğunu düşünüb. O, yaradılan belə gözəl şəraitə görə DİN rəhbərliyinə öz dərin təşəkkürünü bildirir.

Masallı rayon sakini Hüseynli Zöhrab Cəfərqulu oğlu DİN-ə ünvanladığı elektron müraciətində bildirir ki, şəxsi işləri ilə bağlı tez-tez Lənkəran şəhərinə getməli olur. Vətəndaş yazır ki, əvvəllər avtomobillərin necə gəldi park edildiyi, avtoxuliqanların at oynatdığı, qanunsuz fəaliyyət göstərən taksi sürücülərinin səs-küy saldığı şəhər yollarında indi nizam-intizam hökm sürür. Buna səbəb isə polis əməkdaşlarının qışın şaxtasına, yayın istisinə baxmadan, ayıq-sayıq, həvəslə öz vəzifə borclarını yerinə yetirməsi və DİN rəhbərliyinin apardığı uğurlu kadr islahatlarıdır. Z. Hüseynli polisin fəaliyyəti ilə bağlı təşəkkür məktubu yazmağı bir rayon ağsaqqalı kimi özünün vəzifə borcu hesab edir və bununla daxili işlər orqanlarına dəstəyini ifadə edir.

Yasamal rayon sakini Vəliyev İsaxan Veysəl oğlu göndərdiyi təşəkkür məktubunda Polis Akademiyasında yaradılan şəraitdən razılığını ifadə edir. Yazır ki, övladlarından biri hal-hazırda adıçəkilən təhsil müəssisəsinin birinci kurs tələbəsidir. İ. Vəliyev bildirir ki, Akademiyada keçirilən dərslər, tədrisin metodikası, müəllimlərin peşəkarlığı, maddi-texniki şərait digər təhsil ocaqları ilə müqayisədə yüksək səviyyədədir. Bütün bunlara görə vətəndaş DİN rəhbərliyinə dərin minnətdarlıq edir.

Ona qarşı dələduzluqda şübəhəli bilinərək axtarışa verilmiş Tural Kamandar oğlu Səfərovun qısa zaman kəsiyində Suraxanı RPİ əməkdaşları tərəfindən tutularaq məhkəməyə təhvil verilməsi ilə bağlı DİN rəhbərliyinə təşəkkür məktubu ünvanlayan Suraxanı rayon sakini Sevinc Həsənova vətəndaşlara hər zaman xoş münasibət bəsləyən, etik-davranış kodeksinin tələblərinə riayət edərək əsl vətəndaşlıq mövqeyi sərgiləyən Azərbaycan Polisinə öz təşəkkürünü bildirir.

Xızıdan Mehparə İlyasova ölkəmizdə insanların hüquq və azadlıqlarının, qorunması naminə daxili işlər orqanlarının apardıqları qətiyyətli mübarizədən məmnun qaldığını yazır və buna görə DİN rəhbərliyinə təşəkkürünü bildirir.

Xətai rayon sakini İlkin Əhmədov valideynlərinin Füzuli rayonuna müvəqqəti qeydiyyata düşmələri üçün müraciətinə vaxtında baxıldığına, Rayon Polis Şöbəsinin rəisi, polis polkovniki Xəqani Məmmədovun şəxsən onlarla görüşdüyünə, göstərilən diqqət və qayğıya görə DİN rəhbərliyinə təşəkkürünü bildirir, yaradılan şəraitdən, dövlət-vətəndaş münasibətindəki şəffaflıqdan razılığını ifadə edir.

“Çox ağır vəziyyətdə, hətta deyərdim ki, ölüm ayağında olan, qan təzyiqindən və ürəyindəki problemlərdən əziyyət çəkən yoldaşımı avtomobilimlə Bakı şəhərinə apararkən Nəvahi postunda hiss etdim ki, yoldaşımın əhvalı dəyişdi. Düzü, onun keçindiyini zənn etdim və maşını yoldan kənarda saxladım. Bu an postda xidmət aparan bir polis zabiti mənə yaxınlaşdı və vəziyyəti görüncə Hacıqabul Təcili Tibbi Yardım Stansiyasına zəng vurub kömək çağırdı. Həkimlərin müdaxiləsindən sonra onun səhhətində irliləyişlər müşahidə olundu və mən onu polislərimizin sayəsində sa-salamat Bakı şəhərinə çatdıra bildim. Yoldaşım sağalıb ayağa qalxdı. Bir insanın həyatını xilas etdiyinə, göstərdiyi mərdliyə və insanlığa görə həmin polis zabitini axtarıb tapdım. Özümü və ailəmi polis baş leytenantı Samid Sübhan oğlu Ağayevə borclu sayıram. Məhz belə vətənpərvər, insanpərvər, qayğıkeş əməkdaşdaşlarla hər birimizin etibarını, sevgisini qazanan DİN rəhbərliyinə təşəkkürümü bildirir, onlara şərəfli işində uğurlar arzulayıram.” Bu sətirlərin müəllifi Ağcabədi rayon sakini Asif Talıb oğlu Aslanov idi.