İsmayıllı rayonundan Dadaş Səmədov müraciətinə polisin çevik reaksiya verməsini vətəndaş hüquqlarına verilən ən böyük dəyər kimi qiymətləndirir.

Gəncə şəhər sakini Nailə Xəlilova göndərdiyi məktubunda yazır ki, martın 23-də 1 nömrəli avtobusla gedərkən çantasından içində bir sıra sənədlər və 3063 manat olan pul kisəsi oğurlanıb. Zərərçəkmiş dərhal Nizami (Gəncə) RPİ-ə ərizə ilə müraciət edib. Polis əməkdaşlarının səyi nəticəsində qısa müddətdə oğurluğu törətmiş şəxs müəyyən edilərək saxlanılıb. Vətəndaşa məxsus sənədlər və pul geri qaytarılıb. N.Xəlilova məsələnin çox qısa zaman ərzində öz həllini tapdığına görə, DİN rəhbərliyinə və bu işdə əməyi keçən hər bir polis əməkdaşına təşəkkürünü bildirir, müraciətinə bu qədər həssas yanaşılmasından məmnunluq hissi keçirir.

Quba rayon sakini Ehtiram Mustafayev göndərdiyi məktubunda bildirir ki, ona dəymiş zərərin ödənilməsi ilə bağlı etdiyi şikayət təmin edilib. Həyata keçirilmiş tədbirlər nəticəsində ziyan tam ödətdirilib. E.Mustafayev polisin fəaliyyətindən razı qaldığını qeyd edir.

Bakı şəhər sakini Namaz Mamedov göndərdiyi teleqramda şikayəti ilə əlaqədar məsələyə baxıldığını və ona dəymiş zərərin ödənildiyini yazır. Polisin göstərdiyi belə qayğıkeş münasibətə görə, DİN rəhbərliyinə öz dərin minnətdarlığını bildirir. Saray qəsəbə sakini Səbuhi Məmmədov da göndərdiyi teleqramda ona dəymiş ziyanın ödənildiyi üçün polisə, xüsusilə də Baş Mütəşəkkil Cinayətkarlıqla Mübarizə İdarəsinin əməkdaşlarına təşəkkür edir, onların məsələyə çevik reaksiya verməsindən məmnun qaldığını vurğulayır.

Azərbaycan Ziyalılarının Demokratik İttifaqının Astara rayon şöbəsinin sədri Mircəfər Babazadə göndərdiyi təşəkkür məktubunda polisin fəaliyyətindən razılığını ifadə edir. Bildirir ki, daxili işlər orqanlarının ayıq-sayıq xidməti nəticəsində rayonda vətəndaşların hüquq və azadlıqları qorunur, ictimai asayiş və yollarda hərəkətin təhlükəsizliyi təmin edilir. Bundan başqa, müntəzəm olaraq Astara RPŞ-nin təşkilatçılığı ilə narkomaniyaya qarşı mübarizə çərçivəsində maarifləndirici, profilaktik xarakterli tədbirlər keçirilir. M.Babazədə məktubunda vurğulayır ki, bütün bunlar vətəndaş-polis münasibətlərinin daha da yaxşılaşmasına və dövlətçiliyimizin dayaqlarının möhkəmlənməsinə səbəb olur.

Şirvan şəhər sakini, I qrup əlil Bəxtiyar Ağayev göndərdiyi təşəkkür məktubunda martın 26-da Bakıda üzləşdiyi problemlə bağlı 102 Xidmətinə zəng etməsindən və məsələnin dərhal öz həllini tapmasından məmnun qaldığını bildirir.

Suraxanı rayon sakini Püstəxanım Əliyeva göndərdiyi minnətdarlıq məktubunda yazır ki, qonşusu ilə aralarında yaranmış münaqişə səbəbindən polisə müraciət etmək məcburiyyətində qalıb. Suraxanı RPİ-nin 33-cü Polis Bölməsinin sahə müvəkkili, polis kapitanı Şahin Sadıqov konfliktin qarşısının alınması üçün operativ tədbir görüb və məsələnin daha da böyüyərək kriminogen həddə çatmasının qarşısını alıb. P.Əliyeva polisin göstərdiyi diqqət və qayğıya görə DİN rəhbərliyinə təşəkkürünü bildirir.

Tərtər rayon Qaradağlı kənd sakini Rima Səfərova göndərdiyi məktubunda bildirir ki, martın 9-da Bakı-Sumqayıt yolunda baş vermiş ağır yol-nəqliyyat hadisəsi zamanı xəsarət alanlardan biri də onun qızı Aytən Quluzadə olub. Dərhal Sumqayıt şəhər Travmatologiya xəstəxanasına gətirilən yaralı daha sonra DİN rəhbərliyinin göstərişi ilə DİN-in A.Heydərov adına Respublika hospitalına yerləşdirilib. Martın 16-dan 30-dək A. Quluzadə bu tibb müəssisəsində müayinə və müalicə olunub. Məktub müəllifi hospitalda yaradılan şəraitdən, həkimlərin, tibb bacılarının peşəkarlığından və xəstələrə qayğıkeş münasibətindən razılığını bildirir, onların hər birinə, eləcə də DİN rəhbərliyinə minnətdarlıq edir.

Bakı şəhər sakini Fərhad İsgəndərov göndərdiyi teleqramda yüksək peşəkarlıq nümayiş etdirərək qardaşı Şaiq İsgəndərovun həyatını xilas etdiklərinə görə Sabunçu rayon 12-ci Polis Bölməsinin əməkdaşlarına, xüsusilə, təhqiqatçı Ələsgər Hüseynova dərin təşəkkürünü bildirir. O, teleqramda polisin insanların həyat və sağlamlıqlarının qorunması istiqamətində çevik reaksiya göstərməsindən heyrətə gəldiyini də məmnunluqla qeyd edir.