Bakı şəhər sakini Elxan Qubadov məktubunda “Toyota Prado” markalı avtomobilinin ələ keçirilməsi, ban və mühərrik nömrələrinin dəyişdirilməsi ilə bağlı Daxili İşlər Nazirliyinə ünvanladığı müraciətinə operativ reaksiya verildiyinə, Xətai Rayon Polis İdarəsində obyektiv araşdırma aparılaraq müvafiq tədbirlərin görüldüyünə görə DİN rəhbərliyinə minnətdarlığını bildirir.

Bakı şəhər sakini Cavahir Abasova şənbə və bazar günü karantin rejimi ilə əlaqədar ictimai nəqliyyatın olmadığı üçün tibb bacısı işlədiyi Akademik M.Mirqasımov adına RKX-na getmək məqsədilə ərazidən keçən Post-Patrul Xidmətinin avtomobilinə yaxınlaşaraq iş yerinə getməyə yardım etmələri barədəki müraciətinə dərhal reaksiya verilərək göstərdikləri köməkliyə görə DİN rəhbərliyinə və Yasamal RPİ-nin əməkdaşlarına minnətdarlığını bildirir.

Bakı şəhər sakini Rəfat Mirzəyev üzləşdiyi problemlə əlaqədar etdiyi müraciətə operativ reaksiya verilərək göstərdikləri köməkliyə görə DİN rəhbərliyinə və Nizami RPİ-nin əməkdaşlarına təşəkkürünü bildirir, eləcə də qanunun aliliyinin, insan hüquq və azadlıqlarının, ictimai qaydanın və təhlükəsizliyin təmin olunmasında vəzifə borclarının öhdəsindən layiqincə gələn Azərbaycan Polisini 102-ci ildönümü münasibətilə təbrik edir.

Bakı şəhər sakini Hikmət Məşrik “Sobsan” boya fabrikində baş vermiş yanğın hadisəsi zamanı yanğının söndürülməsində, eləcə də ətrafa yayılmasının qarşısının alınmasında göstərdikləri köməkliyə və fədakarlığa görə DİN rəhbərliyinə və Binəqədi RPİ-nin şəxsi heyətinə minnətdarlığını yazır.

Astara rayon bir qrup sakini ictimai asayişin və təhlükəsizliyin keşiyində mətin dayanan polis əməkdaşlarının xidməti vəzifə borclarını layiqincə yerinə yetirdiklərinə, ehtiyacı olan polis şəhid, o cümlədən veteran ailələrinə göstərdikləri diqqət və qayğıya, eləcə də rayonun aztəminatlı ailələrinə etdikləri ərzaq yardımlarına görə DİN rəhbərliyinə və NBPİ Su Nəqliyyatında Polis İdarəsinin əməkdaşlarına təşəkkürünü ifadə edir.

Gəncə şəhər sakini Elnur Abbasov təşəkkür məktubunda etdiyi müraciətin operativ və obyektiv şəkildə araşdırılmasına görə DİN rəhbərliyinə minnətdarlığını bildirir.

Bərdə rayon sakini Zahid Mikayılov Daxili İşlər Nazirliyinə ünvanladığı məktubunda rayon ərazisində narkotiklərin qanunsuz dövriyyəsi hallarının qarşısının alınması ilə bağlı müraciətinə operativ reaksiya verildiyini, Bərdə Rayon Polis Şöbəsinin əməkdaşları tərəfindən müvafiq tədbirlərin həyata keçirildiyini qeyd edir. O, müraciətinə obyektiv baxıldığına, həmçinin bununla bağlı həyata keçirilən tədbirlərə görə DİN rəhbərliyinə minnətdarlığını bildirir.

“Facebook” sosial şəbəkəsindəki “Baku Love” adlı səhifədə iyulun 22-də paylaşılan statusu diqqətinizə çatdırırıq: İyulun 24-də Şəhid pilotumuzun birinci “il mərasimi”dir. Komandirin anası və qardaşları rayonda yaşayır. Karantin rejiminə görə postdan keçə bilməzlər deyə, qardaşı Nicat Atakişiyev Daxili İşlər Nazirliyinin rəsmi saytından DİN rəhbərliyinə müraciət məktubu yazıb və cavabı çox gecikməyib. Qardaşı və digər ailə üzvlərinin Rəşad Atakişiyevin “il mərasimi”ndə iştirak etmələri üçün Bakıya gəlmələrinə icazə verilib. Şəhid ailəsinə göstərilən həssas münasibətə və yüksək diqqətə görə təşəkkür edirik!”

“İnstagram” səhifəmizin izləyicisi Vahid Əliyev (aliyevs999) Xırdalan şəhərindəki kirayədə yaşadığı mənzildən edilən oğurluq faktı ilə bağlı səhifə vasitəsi ilə etdiyi müraciətə operativ baxıldığına və oğurluğu edən şəxslərin saxlanıldığına görə təşəkkür edir: “Mənim Sizə ünvanladığım müraciətdən sonra Baş Cinayət Axtarışı İdarəsinin və Abşeron Rayon Polis İdarəsinin köməkliyi ilə qısa vaxt ərzində mənzilimdən oğurluq edən şəxslər tutularaq istintaqa təhvil verildi. Ona görə də DİN rəhbərliyi başda olmaqla bütün kollektivinizə və Azərbaycan Polisinə öz dərin minnətdarlığımı bildirirəm. Hörmətlə, Əliyev Vahid İsrafil oğlu.”