Pirallahı rayonu ərazisində “Dacia Logan” markalı avtomobillə yolu keçən paytaxt sakini E.Eyrabilova vurulub

29.03.2023

Martın 29-da saat 10 radələrində Pirallahı rayonu ərazisində Bakı şəhər sakini Ə.Həsənov idarə etdiyi “Dacia Logan” markalı avtomobillə yolu keçən paytaxt sakini E.Eyrabilovanı vurub. Nəticədə xəsarətlə xəstəxanaya yerləşdirilən piyada ölüb.Pirallahı Rayon Polis İdarəsində araşdırma aparılır.

Narkoşəbəkələrinin çökdürülməsi əməliyyatları bayram günlərində də davam etdirilib

29.03.2023

Novruz bayramı günlərində polisin də istirahətdə olduğunu və narkotiklərlə mübarizə aparmadığı zənn edən Lənkəran şəhər sakini Vüsal Tahirov bir müddət idi ki, planlaşdırdığı cinayəti reallaşdırmaq üçün hər kəsin evində bayram süfrəsi ətrafında əyləşdiyi bir vaxtda İranda yaşayan narkotacir tanışının qaçaqmalçılıq yolu ilə göndərdiyi külli miqdarda narkotiki əldə etmək üçün hərəkətə başlayır. Amma Vüsal Tahirov ağlına belə gəlməzdi ki, Daxili İşlər Nazirliyi Baş Narkotiklərlə Mübarizə İdarəsinin əməkdaşları onun barəsində əldə etdikləri əməliyyat məlumatını reallaşdırmaq üçün günlərdir məhz bu anı gözləyirdilər. Əməliyyat uğurla baş tutur və Vüsal Tahirov polislər tərəfindən saxlanılır. Onun üzərinə və idarə etdiyi avtomobilə baxış zamanı ümumilikdə 62 kiloqram, o cümlədən 23 kiloqram heroin, 7 kiloqram tiryək, 24 kiloqram marixuana və 8 kiloqram metamfetamin aşkar edilir.  Bu polisin istirahət günlərində narkotiklərin qanusnuz dövriyyəsinə qarşı həyata keçirdiyi əməliyyatlardan yalnız biridir. Müxtəlif şərti adlar altında İrandan qaçaqmalçılıq yolu ilə ölkəmizə külli miqdarda narkotik vasitələr göndərən şəxslərin Azərbaycandakı dayaqlarına qarşı Baş Narkotiklərlə Mübarizə İdarəsinin əməkdaşları tərəfindən son 20 gündə paytaxt və bölgələrdə keçirilən silsilə əməliyyatlar zamanı 5 mütəşəkkil dəstə, o cümlədən 46 nəfər saxlanılıb, 1 nəfər isə polisə odlu silahla müqavimət göstərdiyi üçün zərərsizləşdirilib. Qanunsuz dövriyyədən 250 kiloqram müxtəlif xassəli narkotik vasitə, psixotrop maddə, elektron tərəzilər və 11 min ədəd ekstazi və metadon həbi çıxarılıb. Sonuncu silsilə əməliyyatlar zamanı İrandan Azərbaycana narkotik vasitələri qeyri-leqal yollarla göndərən kanallardan daha bir neçəsinə zərbə endirilib.Saxlanılanlar barəsində həbs qətimkan tədbiri seçilib. Bu şəxslərin daxil olduqları narkoşəbəkənin ölkə daxilində və xaricindəki digər üzvlərinin saxlanılması istiqamətində əməliyyat tədbirləri davam etdirilir.

Gün ərzində ölkə ərazisində qeydə alınan 80 cinayətin açılması təmin olunub

28.03.2023

Martın 28-də ölkə ərazisində qeydə alınan 80, əvvəlki dövrlərdən bağlı qalan 26 cinayətin açılması daxili işlər orqanlarının əməkdaşları tərəfindən təmin olunub.

Ümumi çəkisi 13,7 kiloqramdan artıq narkotik vasitə aşkar olunaraq götürülüb

28.03.2023

Polis əməkdaşlarının martın 28-də respublika ərazisində keçirdikləri əməliyyat tədbirləri nəticəsində ümumi çəkisi 13,7 kiloqramdan artıq narkotik vasitə aşkar olunaraq götürülüb. Qanunsuz dövriyyədən çıxarılan narkotik vasitələr – 8,6 kiloqrama yaxın heroin, 5,1 kiloqramdan çox marixuana, 70 qramdan çox metamfetamin və 52 ədəd çətənə kolu olub. Bu istiqamətdə qətiyyətli mübarizə tədbirləri davam etdirilir. 

Narkotikin təsiri altında avtomobil idarə edən 2 nəfər sürücülük hüququndan məhrum edilib

28.03.2023

Baş Dövlət Yol Polisi İdarəsinin əməkdaşları tərəfindən keçirilən tədbirlərlə İmişli rayon sakini H.Hüseynzadənin idarə etdiyi “Mercedes” və Lənkəran rayon sakini A.Məmmədzadənin idarə etdiyi “Khazar” markalı avtomobillər Abşeron rayonu ərazisində saxlanılıblar.Polis əməkdaşları tərəfindən hər iki sürücünün narkotik vasitə qəbul etməsi müəyyən edildiyindən barələrində İnzibati Xətalar Məcəlləsinin 327, 332, 333, 342-ci maddələri ilə protokollar tərtib edilib. Məhkəmənin qərarı ilə H.Hüseynzadə 2 il müddətinə sürücülük hüququndan məhrum edilməklə 7 gün müddətində inzibati qaydada həbs, A.Məmmədzadə isə 2 il müddətinə sürücülük hüququndan məhrum edilməklə 400 manat məbləğində cərimə olunublar. 

Bakı şəhər sakini N.Əlizadədən narkotik vasitələr aşkar olunaraq götürülüb

28.03.2023

DİN NBPİ-nin Dəmir Yolu Nəqliyyatında Polis İdarəsi əməkdaşlarının əldə olunan məlumat əsasında keçirdikləri əməliyyat tədbiri nəticəsində Bakı şəhər sakini Natiq Əlizadə saxlanılıb. Ondan 1 kiloqram 431 qramdan artıq heroin, 1 kiloqram 415 qram marixuana və 44 qramdan çox metamfetamin aşkar olunaraq götürülüb. Araşdırma aparılır.

Abşeron rayonunun Digah qəsəbə sakini N.Salmanovdan 1 kiloqramdan artıq marixuana götürülüb

28.03.2023

Abşeron Rayon Polis İdarəsi əməkdaşlarının əldə olunan məlumat əsasında keçirdikləri əməliyyat tədbiri nəticəsində saxlanılan Digah qəsəbə sakini, əvvəllər məhkum olunmuş Nazim Salmanovdan 1 kiloqram 100 qram marixuana götürülüb. Araşdırma aparılır. 

Sabirabad rayonunun Yaxa Dəllək kənd sakini N.Həmidovun həyətindən çətənə kolları və marixuana götürülüb

28.03.2023

Sabirabad Rayon Polis Şöbəsi əməkdaşlarının daxil olan məlumat əsasında keçirdikləri əməliyyat tədbiri nəticəsində Yaxa Dəllək kənd sakini N.Həmidovun həyətindən kultivasiya yolu ilə yetişdirilən 49 ədəd çətənə kolu və 435 qramdan artıq marixuana aşkar olunaraq götürülüb. 

Nizami rayonu ərazisində Bakı şəhər sakininin içərisində 17.800 manat pul olan çantasını oğurlamaqda şübhəli bilinən R.Quliyev saxlanılıb

28.03.2023

Martın 28-də Nizami rayonu ərazisində Bakı şəhər sakininin içərisində 17.800 manat pul olan çantasının oğurlanması barədə polisə məlumat daxil olub. Polis əməkdaşlarının keçirdikləri operativ tədbirlərlə oğurluq əməlində şübhəli bilinən paytaxt sakini R.Quliyev müəyyən olunaraq saxlanılıb. Araşdırma aparılır.

Bakı şəhər sakini S.Qasımova qarşı quldurluq etməkdə şübhəli bilinən Bakı şəhər sakinləri N.Kərimli və T.Həmidov saxlanılıblar

28.03.2023

Nizami RPİ 24-cü Polis Şöbəsi əməkdaşlarının daxil olan məlumat əsasında  keçirdikləri əməliyyat tədbiri nəticəsində martın 24-də Bakı şəhər sakini S.Qasımovu bıçaqla hədələyib mobil telefonunu quldurluq yolu ilə talamaqda şübhəli bilinən Bakı şəhər sakinləri N.Kərimli və T.Həmidov müəyyən olunaraq saxlanılıblar. Şəxsi axtarış zamanı onlardan heroin aşkar olunaraq götürülüb.Araşdırma aparılır.