Binəqədi rayonunda sosial şəbəkələrdə cinayətkarlığı təbliğ edən videolar paylaşan və üzərində qanunsuz odlu silah saxlayan şəxs saxlanılıb

31.03.2023

Binəqədi Rayon Polis İdarəsinin 43-cü Polis Bölməsinin əməkdaşları tərəfindən həyata keçirilən əməliyyat nəticəsində sosial şəbəkələrdə cinayətkarlığı təbliğ edən videolar paylaşan və üzərində qanunsuz olaraq odlu silah-sursat saxlayan şəxs saxlanılıb. Tədbir zamanı əvvəllər məhkum olunmuş Elşən Həsənzadə tutularaq istintaqa təqdim edilib. Onun üzərinə baxış keçirilən zaman 1 ədəd revolver tipli tapança və 10 ədəd patron aşkar edilib. Elşən Həsənzadə odlu silah-sursatı bir müddət əvvəl əldə etdiyini, lakin polisə təhvil verməyərək özündə saxladığını bildirib. Faktla bağlı 43-cü Polis Bölməsində toplanan materiallar araşdırmaların davam etdirilməsi üçün  Binəqədi Rayon Polis İdarəsinə göndərilib, əməliyyat-istintaq tədbirləri davam etdirilir.

Gün ərzində ölkə ərazisində qeydə alınan 144 cinayətin açılması təmin olunub

30.03.2023

Martın 30-da ölkə ərazisində qeydə alınan 144 cinayətin açılması daxili işlər orqanlarının əməkdaşları tərəfindən təmin olunub.

Ümumi çəkisi 7,7 kiloqrama yaxın narkotik vasitə aşkar olunaraq götürülüb

30.03.2023

Polis əməkdaşlarının martın 30-da respublika ərazisində keçirdikləri əməliyyat tədbirləri nəticəsində ümumi çəkisi 7,7 kiloqrama yaxın narkotik vasitə aşkar olunaraq götürülüb. Qanunsuz dövriyyədən çıxarılan narkotik vasitələr – 1,4 kiloqrama yaxın heroin, 6 kiloqrama yaxın marixuana, 100 qrama yaxın tiryək, 225 qramdan çox metamfetamin, 12 ədəd yüksək təsiredici xassəyə malik həblər olub.Bu istiqamətdə qətiyyətli mübarizə tədbirləri davam etdirilir.

Sumqayıt şəhərində bir nəfərin cüzdanını soyğunçuluq yolu ilə talamaqda şübhəli bilinən Saray qəsəbə sakini E.İsgəndərov saxlanılıb

30.03.2023

Martın 30-da gecə saatlarında Sumqayıt şəhərində bir nəfərin içərisində 1848 manatı olan cüzdanının soyğunçuluq yolu ilə talanması barədə polisə məlumat daxil olub.Sumqayıt ŞPİ 3-cü Polis Bölməsi əməkdaşlarının keçirdikləri əməliyyat tədbiri nəticəsində soyğunçuluq əməlində şübhəli bilinən Saray qəsəbə sakini, əvvəllər narkotiklərlə əlaqəli cinayətə görə məhkum olunmuş E.İsgəndərov müəyyən olunaraq saxlanılıb.Sumqayıt Şəhər Polis İdarəsində araşdırma aparılır.

Bakı şəhər sakini İ.Xəlilovun avtomobilindən marixuana və metamfetamin aşkar olunub

30.03.2023

Baş Dövlət Yol Polisi İdarəsi və Hacıqabul Rayon Polis Şöbəsi əməkdaşlarının əldə olunan məlumat əsasında birgə keçirdikləri əməliyyat tədbiri nəticəsində Bakı şəhər sakini, əvvəllər məhkum olunmuş İ.Xəlilovun idarə etdiyi “Hyundai” markalı avtomobil saxlanılıb. Polis əməkdaşları tərəfindən avtomobilə baxış zaman oradan 300 qram marixuana və metamfetamin aşkar olunub.  Şəxsi axtarış zamanı sərnişini, əvvəllər narkotiklərlə əlaqəli cinayətə görə məhkum olunmuş C.Məmmədovdan isə metamfetamin, heroin, tiryək və 6 ədəd metadon həbi aşkar olunaraq götürülüb.  Araşdırma aparılır. 

Binəqədi rayonu ərazisində 31 evdən təmir-tikinti alətləri, inşaat materialları, naqil və məişət əşyaları oğurlamaqda şübhəli bilinən şəxslər saxlanılıblar

30.03.2023

Binəqədi RPİ 4-cü Polis Şöbəsi əməkdaşlarının daxil olan məlumatlar əsasında keçirdikləri əməliyyat tədbiri nəticəsində müxtəlif vaxtlarda rayon ərazisində 31 evdən ümumi dəyəri 36.000 manatdan çox olan təmir-tikinti alətləri, inşaat materialları, naqil və məişət əşyaları oğurlamaqda şübhəli bilinən əvvəllər məhkum olunmuşlar - Gəncə şəhər sakini N.Əliyev və Bakı şəhər sakini M.Talıbov saxlanılıblar.Araşdırma aparılır.

Avtomobillərin təmiri sexindən “Hyundai” markalı avtomobili qaçırmaqda şübhəli bilinən Neftçala rayon sakini V.Səfərov saxlanılıb

30.03.2023

Martın 29-da Nəsimi RPİ-nin 19-cu Polis Şöbəsinə müraciət edən Bakı şəhər sakini S.Abbasov bir gün əvvəl A.Məhərrəmov küçəsində yerləşən avtomobillərin təmiri sexindən “Hyundai” markalı avtomobilinin qaçırıldığını bildirib. Polis əməkdaşlarının keçirdikləri əməliyyat-axtarış tədbirləri nəticəsində avtomobil Bakı-Sumqayıt yolunda əzilmiş vəziyyətdə aşkar olunub. Davam etdirilən tədbirlərlə nəqliyyat vasitəsini qaçırmaqda şübhəli bilinən Neftçala rayon sakini, əvvəllər məhkum olunmuş V.Səfərov müəyyən olunaraq saxlanılıb. Araşdırma aparılır. 

Sumqayıt şəhəri ərazisində ov tüfəngi ilə havaya atəş açan S.Süleymanovun evindən qanunsuz saxladığı 2 ədəd ov tüfəngi götürülüb

30.03.2023

Sumqayıt şəhəri ərazisində odlu silahdan havaya atəş açılması barədə polisə məlumat daxil olub.Araşdırmalarla Sumqayıt şəhər sakini, əvvəllər narkotiklərlə əlaqəli cinayətə görə məhkum olunmuş S.Süleymanovun ov tüfəngi ilə havaya atəş açması müəyyən olunub.Sumqayıt ŞPİ 2-ci Polis Bölməsi əməkdaşlarının keçirdikləri əməliyyat tədbiri nəticəsində S.Süleymanovun evinə baxış zamanı oradan qanunsuz saxladığı 2 ədəd nömrəsi silinmiş, lüləsi və qundağı kəsilmiş ov tüfəngi və 2 ədəd patron aşkar olunaraq götürülüb.Araşdırma aparılır.

Astara rayonunun Pensər kənd sakini V.Ağayevdən qanunsuz saxladığı ov tüfəngi götürülüb

30.03.2023

Astara Rayon Polis Şöbəsi əməkdaşlarının əldə olunan məlumat əsasında keçirdikləri əməliyyat tədbiri nəticəsində Pensər kənd sakini V.Ağayevdən qanunsuz saxladığı “Tolka” markalı ov tüfəngi götürülüb. Araşdırma aparılır. 

Ağdaş rayonu ərazisində bir avtomobildən oğurluq etməkdə şübhəli bilinən A.Yusibov saxlanılıb

30.03.2023

Ağdaş Rayon Polis Şöbəsi əməkdaşlarının daxil olan məlumat əsasında keçirdikləri əməliyyat tədbiri nəticəsində rayon ərazisində bir avtomobildən pul və mobil telefon oğurlamaqda şübhəli bilinən Ləki qəsəbə sakini A.Yusibov saxlanılıb. Araşdırma aparılır.