Astara rayon Pensər kənd sakini İlqar Məmmədov göndərdiyi məktubunda RPŞ əməkdaşlarının fəaliyyətindən razılığını bildirir, ictimai asayişin təmin edilməsində, cinayətkarlığa, narkomaniyaya və digər qanunazidd əməllərə qarşı mübarizədə polisin rolunu yüksək qiymətləndirir.

Astara Ziyalı Ağsaqqallar Cəmiyyətinin sədri Camal İbrahimov isə məktubunda RPŞ-nin DYP Bölməsi əməkdaşlarının xidmətindən məmnun qaldığını, onların fəaliyyəti nəticəsində yollarda hərəkətin yüksək səviyyədə nizamlandığını, avtoxuliqanlara qarşı sərt mübarizə tədbirləri görüldüyünü diqqətə çatdırır və buna görə DİN rəhbərliyinə təşəkkür edir.

Qusar rayon Qalacıq kənd sakini Aleysa Mirzəliyeva DİN-ə ünvanladığı məktubunda yazır ki, martın 3-də ailə problemi ilə bağlı “102” Xidmətinə zəng vurub. Müraciətindən dərhal sonra RPŞ əməkdaşları tərəfindən qəbul edilərək diqqətlə dinlənilib və martın 13-də problem öz həllini tapıb. Müraciətinə həssaslıqla yanaşıldığı üçün A.Mirzəliyeva DİN rəhbərliyinə və Qusar RPŞ-nin əməkdaşlarına minnətdarlığını bildirir.

Sumqayıt şəhər sakini İndira Şəmsivari dünyanı təhdid edən bəlalarla, ən əsası terrorizmlə mübarizədə ölkəmizin qətiyyət göstərdiyini qeyd edərək yazır ki, bu gün Azərbaycanda olan sabitlik bütün dünya ölkələri üçün əsl örnəkdir. O, sabitliyin keşiyində, asayişin təminində digər hüquq-mühafizə orqanları ilə yanaşı, polisin də fəaliyyətini yüksək qiymətləndirir, Vətənə və dövlətə xidmətdə həmkarlarımızın əsl vətəndaş yanğısı nümayiş etdirdiklərini xüsusi vurğulayır.

Masallı rayon sakini Xatirə Cavadova üzləşdiyi problemlə bağlı RPŞ rəhbərliyinin qəbulunda olarkən göstərilən səmimi münasibətə görə DİN-ə ünvanladığı təşəkkür məktubunda razılığını ifadə edir.

Yardımlı rayon sakini Neman Hüseynov Masallı Rayon Polis Şöbəsi əməkdaşlarının korrupsiya və cinayətkarlıqla mübarizəsindən, məktəblərdə və əmək kollektivlərində narkomaniya, erkən nikah və dini radikalizm mövzusunda keçirdikləri tədbirlərdən razılığını bildirir, polisin fəaliyyətini yüksək qiymətləndirir.

Gəncə şəhər sakini Nazilə Məmmədova üzləşdiyi problemin həllində göstərdiyi köməyə görə Samux RPŞ-nin rəhbərliyinə təşəkkür edir.

Şabran rayonu Ağalıq kənd sakini Etibar Kamilov DİN-ə ünvanladığı təşəkkür məktubunda rayon ərazisində sabitliyi qoruyan, cinayətkarlıqla ciddi mübarizə aparan, yollarda təhlükəsizliyi təmin edən həmkarlarımıza sakinlər adından minnətdarlığını ifadə edir.

Astara rayon sakini Səbuhi Camalov polisin fəaliyyətini yüksək qiymətləndirir, asayiş keşikçilərinə xidmətdə uğurlar arzulayır.