Övladının daxili işlər orqanlarına tam şəffaf və demokratik şəkildə qəbul olunmasına görə Tərtər rayon Əskipara kənd sakini Oqtay Əliyev DİN rəhbərliyinə təşəkkürünü bildirir.

Bakı şəhər sakini Cavid Hacıyev Səbail RPİ əməkdaşlarının cinayətkarlıqla mübarizəsindən, xidməti fəaliyyətindən razılığını bildirir.

Tərtər rayon Hacıqərvənd kənd sakini Qənifə Əliyeva sağlam, vətənpərvər və layiqli gənclərin polisin sıralarına qəbul olunması zamanı heç bir kənar müdaxiləyə yol verilməməsindən, seçimin ədalətli və şəffaf keçirilməsindən razılığını bildirir.

Bakı şəhər sakini Eldar Cahangirovun DİN rəhbərliyinə ünvanladığı minnətdarlıq məktubundakı fikirlər diqqətimizi çəkdi. Onun ölkəmizdəki proseslərə vətəndaş yanğısı ilə yanaşması, görülən işlərin əsasında sabitliyin, əmin-amanlığın olmasını xüsusi vurğulamsı Azərbaycan Polisinin fəaliyyətinə verilən dəyərin bariz nümunəsidir. Məktubdan kiçik bir parçanı oxucularımızla bölüşmək qərarına gəldik.

E.Cahangirov yazır: “...Bu il tətilimi qızımla Avropada keçirməyi düşünürdüm, lakin orada baş verən terror aktları, partlayışlar məni fikrimdən daşındırdı. Bir daha anladım ki, dincəlmək, gəzmək üçün sabitlik və əmin-amanlıq olan vətənim daha yaxşıdır.

Bu gün polisin işi daha çətin və məsuliyyətlidir. Biz vətəndaş olaraq bunu yaxşı anlayır, polisimizə xidmətində uğurlar arzulayırıq”...

Şəki şəhər sakini Valeh Hüseynzadə göndərdiyi məktubunda yazır ki, atası Tahir Hüseynovun itkin düşməsi ilə bağlı ŞRPŞ-yə müraciət edib. Polis əməkdaşlarının operativliyi nəticəsində Tahir Hüseynovun yeri tez bir zamanda müəyyən edilib və o, ailəsinə qaytarılıb. V.Hüseynzadə buna görə Şəki ŞRPŞ-nin əməkdaşlarına, xüsusilə, təhqiqatçı, polis kapitanı Sadiq Əliyevə öz dərin minnətdarlığını bildirir.

Vətəndaş Yasəf Nəsibov göndərdiyi teleqramda bildirir ki, ona qarşı edilmiş dələduzluq faktı ilə əlaqədar Baş Mütəşəkkil Cinayətkarlıqla Mübarizə İdarəsinə müraciət edib. Şikayətinə qısa zaman ərzində baxılıb və dəymiş maddi ziyan ödətdirilib. Y.Nəsibov buna görə DİN rəhbərliyinə təşəkkür edir.

Gəncə şəhər sakini İlqar Hüseynov göndərdiyi məktubda qeyd edir ki, Kəpəz (Gəncə) RPİ əməkdaşlarının həyata keçirdikləri tədbirlər nəticəsində yaşadığı evdən oğurluq etmiş şəxslər qısa zaman ərzində saxlanılaraq, məsuliyyətlə cəlb ediliblər. Vətəndaş buna görə DİN rəhbərliyinə və Kəpəz (Gəncə) RPİ əməkdaşlarına minnətdarlığını bildirir.

Gəncə şəhər sakinləri - Zenfira İsmayılova və İntiqam Orucov da göndərdikləri təşəkkür məktublarında oğurluq hadisələrinin üstünün açılmasında polisin rolunu yüksək qiymətləndirirlər.

Yasamal rayon sakini Faiq İsmayılzadə göndərdiyi məktubda yazır ki, baş vermiş kiçik bir insidentlə bağlı Səbail RPİ 8-ci Polis Bölməsinə müraciət edib. Müraciətinə sahə inspektoru, polis leytenantı Fuad Musayev tərəfindən baxılıb və problem qısa müddət ərzində öz həllini tapıb. F.İsmayılzadə Fuad Musayevin timsalında bütün polis əməkdaşlarına minnətdarlığını bildirir.