Bakı şəhər sakini Nicat Nemətzadə məktubunda xidməti vəzifələrini və peşə fəaliyyətini layiqincə yerinə yetirdiyinə, xoş rəftarlarına və nəzakətli davranışılarına görə Bakı şəhər Dövlət Yol Polis İdarəsinin əməkdaşlarına təşəkkürünü bildirir, çətin və şərəfli xidmətlərində uğurlar arzulayır.

Sumqayıt şəhər sakini Fərid Mirzəyev məktubunda üzləşdiyi problemlə bağlı DİN-in sosial şəbəkələrdəki səhifəsi vasitəsilə etdiyi müraciətinə operativ baxıldığını, Sumqayıt ŞPİ-nin 2-ci Polis Bölməsinə dəvət olunaraq dinlənildiyini və müvafiq araşdırma aparıldığını bildirir. O, obyektiv araşdırma nəticəsində müraciətinin qısa müddətdə müsbət həll edildiyini qeyd edərək DİN rəhbərliyinə və Sumqayıt ŞPİ-nin 2-ci Polis Bölməsinin əməkdaşlarına minnətdarlığını bildirir.

Bakı şəhər sakini Böyükağa Abdullayev məktubunda Daxili İşlər Nazirliyinə etdiyi müraciəti ilə əlaqədar Baş Əməliyyat və Statistik İnformasiya İdarəsində qəbul edildiyini yazır. O, həmin idarənin rəhbərliyi tərəfindən yüksək hörmət və nəzakətlə qarşılandığını, üzləşdiyi problemin qısa müddətdə həll edildiyini qeyd edir. B.Abdullayev müraciətinə həssas yanaşılmasına, göstərilən diqqətə, xoş münasibətə görə DİN rəhbərliyinə və Baş Əməliyyat və Statistik İnformasiya İdarəsinin əməkdaşlarına minnətdarlığını bildirir.

Bakı şəhər sakini Çingiz Səfərov məktubunda pulqabısını itirməsi ilə bağlı DİN-in sosial şəbəkələrdəki səhifəsi vasitəsilə etdiyi müraciətinə operativ baxıldığını, Nizami RPİ-nin 25-ci Polis Şöbəsinə dəvət edilərək həyata keçirilən tədbirlər barədə ona ətraflı məlumat verildiyini bildirir. O, müraciətinə həssas yanaşılmasına və həyata keçirilən tədbirlərə görə DİN rəhbərliyinə və 25-ci Polis Şöbəsinin əməkdaşlarına təşəkkürünü bildirir.

Bakı şəhər sakini Sevda Əliyeva məktubunda üzləşdiyi dələduzluq faktı ilə bağlı Nizami Rayon Polis İdarəsinə müraciət etdiyini yazır. O, müraciətinə həssaslıqla yanaşıldığını, obyektiv araşdırma aparılaraq qısa müddətdə müsbət həll edildiyini və ona dəymiş maddi ziyanın ödənilməsinin təmin edildiyini qeyd edərək Nizami Rayon Polis İdarəsinin əməkdaşlarına minnətdarlığını bildirir, çətin və şərəfli xidmətlərində onlara uğurlar arzulayır.

Ağcabədi şəhər sakini Rizvan Quliyev DİN rəhbərliyinə ünvanladığı təşəkkür məktubunda direktoru olduğu 9 saylı tam orta məktəbin qarşısındakı asfalt yolun nişanlanma xətlərinin və yol nişanlarının yenilənməsinə görə Baş Dövlət Yol Polisi İdarəsinin əməkdaşlarının xidməti fəaliyyətini yüksək dəyərləndirir.

Bakı şəhər sakini Aida Eyvazova yaşadığı “junnalislər” binasında mühafizə sisteminin gücləndirilməsi məqsədilə mühafizəçilər üçün köşk qurulması ilə bağlı müraciətinin müsbət həll edildiyinə görə DİN rəhbərliyinə təşəkkürünü bildirir. O, vətəndaş müraciətlərinə həssaslıqla yanaşılmasını yüksək dəyərləndirir.

Vətən müharibəsi qazisi olan Ağcabədi rayon sakini Zülfü Baxışov onlara göstərilən xüsusi diqqət və qayğıya görə Ağcabədi RPŞ Dövlət Yol Polisi Bölməsinin əməkdaşlarının xidməti fəaliyyətini təqdir edir və DİN rəhbərliyinə təşəkkürünü bildirir.

Aqil Cəfərov adlı sosial şəbəkə istifadəçisi üzləşdiyi problemlə əlaqədar etdiyi müraciətə həssaslıqla yanaşılaraq qısa zaman kəsiyində həll olunmasında göstərdikləri köməkliyə görə Abşeron RPİ-nin rəhbərliyinə və əməkdaşlarına minnətdarlığını bildirir.