Naxçıvan şəhər sakini Ülvü Əsədzadə Daxili İşlər Nazirliyinə təşəkkür teleqramı yazıb. O, avtomobili ilə hərəkətdə olarkən sərnişinlərdən birinin səhhətində qəfil yaranmış problemlə bağlı ərazidə xidmət aparan polis əməkdaşlarına müraciət etdiyini, polis əməkdaşlarının onu xəstəxanayadək müşayiət etdiklərini və zəruri köməklik göstərdiklərini bildirir. 
Ü.Əsədzadə belə humanistliyə, diqqətə, qayğıya və göstərdikləri köməkliyə görə Babək Rayon İdarəsinin əməkdaşlarına təşəkkürünü bildirir.    

Əcnəbi vətəndaş Mehmet Karabiber DİN-in “Instagram” səhifəsinə təşəkkür mesajı yazıb. O, üzləşdiyi problemlə bağlı müraciətinə Naxçıvan Şəhər Polis İdarəsində operativ baxılaraq müsbət həll edildiyini bildirir. 
M.Karabiber vətəndaş müraciətlərinə həssas yanaşılmasına görə Naxçıvan Muxtar Respublikası Daxili İşlər Nazirliyinin rəhbərliyinə, operativlik və göstərilən köməklik üçün Naxçıvan Şəhər Polis İdarəsinin əməkdaşlarına təşəkkür edir.

Vətəndaş Rafiq Xudaverdiyev DİN-in “Instagram” səhifəsinə yazdığı təşəkkür mesajında üzləşdiyi problemlə əlaqədar Pirallahı Rayon Polis İdarəsinə müraciət etdiyini, müraciəti polisin səlahiyyətinə aid olmayan məsələ olsa da, ona lazımi köməklik göstərilərək aidiyyəti üzrə yönəldildiyini və qısa müddətdə probleminin araşdırılaraq müsbət həll olunduğunu qeyd edir. 
O, vətəndaş müraciətlərinə həssas yanaşılmasına görə DİN rəhbərliyinə, göstərilən köməklik üçün Pirallahı RPİ-nin əməkdaşlarına minnətdarlığını bildirir. 

Vətəndaş Tərlan Qarayev DİN-in “Facebook” səhifəsinə təşəkkür mesajı yazıb: “6 iyun 2025-ci il tarixində hərbi xidmətdə olan oğlumla görüşmək məqsədilə Ordubad şəhərinə səfər etmişdim. Təəssüf ki, müəyyən səbəblərdən görüşümüz tam baş tutmadı. Axşam saatlarında Ordubad şəhərində heç bir tanışım və gecələmək üçün yerim olmadığından çətin vəziyyətdə qaldım. Şəhərdə otel və ya qalmaq üçün əlverişli bir məkan tapa bilmədim. Bu kimi hallarda hər bir vətəndaşın ümid yeri olan Azərbaycan polisinə müraciət etməyi qərara aldım. Ordubad Rayon Polis Şöbəsinə  üz tutdum. Məni orada polis əməkdaşı qarşıladı. Sənədlərimi təqdim etdikdən sonra mövcud vəziyyətimi izah etdim. Polis əməkdaşı həmin gün növbədə olduğundan xidməti yerini tərk edə bilməsə də, qısa müddətdə mənə böyük köməklik göstərdi. Geri dönüşümün növbəti gün Culfa şəhərindən olması səbəbilə, o, məni öz tanışları vasitəsilə avtomobillə Culfaya yola saldı. Orada isə digər tanışları vasitəsilə məni rahat şəraitli bir evdə yerləşdirdilər, hətta mənə yol xərci də təklif etdilər. Culfa şəhərində olduğum müddətdə və Bakıya dönənədək daim mənimlə əlaqə saxlayaraq vəziyyətimlə maraqlandı. 
Bu hadisə barədə yaxınlarıma və tanışlarıma fəxrlə danışdım. Bir daha əmin oldum ki, Azərbaycan polisi həqiqətən də vətəndaşının yanındadır. Buna görə Azərbaycan Respublikasının Daxili İşlər Nazirliyinin rəhbərliyinə və Azərbaycan polisinə dərin minnətdarlığımı bildirirəm”.

Laçın rayon sakini Zahir Musayev məktubunda Daxili İşlər Nazirliyinə ünvanladığın müraciəti üzrə obyektiv araşdırma aparılaraq qısa müddətdə müsbət həll olunduğunu yazır, vətəndaş müraciətlərinə həssas yanaşılmasına və göstərilən diqqətə görə DİN rəhbərliyinə təşəkkürünü bildirir.

Şəki rayon sakini Xanım Nəbiyeva müraciətinin müsbət həll olunmasına görə, DİN rəhbərliyinə minnətdarlığını bildirir.

Mingəçevir şəhər sakini Xəzər Məmmədov xidməti vəzifələrini layiqincə yerinə yetirdiklərinə görə, Mingəçevir ŞPŞ-nin əməkdaşlarına minnətdarlığını bildirir.

Şamaxı rayon sakini Bəybala Osmanov müraciətinin obyektiv araşdırılmasına görə, Şamaxı RPŞ-nin əməkdaşlarına minnətdarlığını bildirir.

Mingəçevir şəhər sakini Günəş Ziyadova müraciətinin müsbət həll olunmasına görə, Mingəçevir ŞPŞ-nin əməkdaşlarına minnətdarlığını bildirir.