Saatlı rayon Təhsil Şöbəsinin müdiri Seyidağa Kazımov DİN-ə ünvanladığı minnətdarlıq məktubunda gələcəyimizi və gəncliyimizi təhdid edən narkomaniyaya qarşı aparılan maarifləndirmə tədbirləri və qətiyyətli mübarizəyə görə DİN rəhbərliyinə və Saatlı Rayon Polis Şöbəsinin şəxsi heyətinə təşəkkürünü bildirir.

Şəki rayon sakini Kəmalə Xəlilova sorğusuna operativ cavab verildiyinə görə DİN-in Növbətçi Hissələri İdarəetmə Xidmətinin əməkdaşlarına minnətdarlıq edir.

Ağsu rayon sakini Asəf Babaşov rayonda yaradılmış sabitliyə, əmin-amanlığa və nizam-intizama görə DİN rəhbərliyinə öz təşəkkürünü ifadə edir.

Bakı şəhər sakini Mansur Allahyarov müraciətinə çevik və operativ qaydada reaksiya verdiklərinə görə həmkarlarımıza minnətdarlığını ifadə edir.

İsmayıllıdan Nuğayevlər ailəsi və Bakı şəhər sakini Fərid Hüseynov ölkəmizdə sabitliyin təmin edilməsində, Azərbaycanın sabitlik adası kimi dünyada tanınmasında qanıyla-canıyla Vətənə xidmət edən Azərbaycan Polisinə təşəkkürlərini bildirirlər.

Şabran rayon sakini Ceyhun Ələsgərov dəfələrlə müraciət etsə də tikinti şirkəti tərəfindən ona ödənilməyən əməkhaqqının alınmasında və onun hüquqlarının müdafiəsində göstərdiyi köməkliyə görə polisə təşəkkür edir.

Avtomobilindən 3500 manatını və digər əşyalarını oğurlamış şəxslərin müəyyən olunaraq istintaqa cəlb edilməsində göstərdikləri operativliyə görə Rəşad Həsənov Binəqədi Rayon Polis İdarəsinin rəhbərliyinə və şəxsi heyətinə minnətdarlığını ifadə edir.

“Mən Yeni Zelandiya vətəndaşıyam. Bu sirli-sehirli ölkə haqqında həmvətənlərimdən eşitdikdən sonra Azərbaycana gəlməyə qərar verdim. Hava limanında hiss etdim ki, böyük bir xalqın mədəniyyətinə və tarixinə şahidlik edəcəyəm. Gülərüz insanlar, xoş ünsiyyət mənə qəribliyimi unutdurdu. Hələ polisləri demirəm. Məhz onların köməyi ilə əlimdəki xəritədə gəzmək üçün nişanladığım yerlərin seyrinə çıxdım. Bakı, gəziləsi, görüləsi və sevələsi şəhərdir. O sanki Xəzərin qoynunda uyuyan, hərdən də şıltaqlıq edən körpəyə bənzəyir. Zəngin Azərbaycan mətbəxindən daddığım təamların, “Qız qalası”nın, Şirvanşahlar sarayının, “Alov” qüllələrinin şəkillərini dostlarıma göndərəndə onların mənə cavabı bu oldu: “Sən doğurdan da Şərqin ən qədim və sabit ölkəsindəsən”.

Lənkəranda isə heç vaxt unuda bilməyəcəyim hadisə başıma gəldi. Pul kisəmi, bank kartlarımı itirdim. Köməksiz vəziyyətdə qaldığımı görənlər mənə polisə üz tutmağı məsləhət bildilər. Polisə başıma gələnləri danışdım. Məndən əşyalarımı hansı şəraitdə itirməyimi soruşdular. Düzü, inanmırdım ki, tapılsın. Polislər məni Şöbəyə gətirdilər. Hələ üstəlik dadlı Lənkəran çayına da qonaq etdilər. Çox keçmədi ki, sənədlərim və pul kisəm tapıldı. Sən demə, mən onları avtobusda unutmuşammış. Mən Azərbaycanı və onun saf insanlarını sevdim. Burdan Vətənimə bu ölkəyə sonsuz sevgi və rəğbət hissi ilə gedirəm. Hörmətlə, Lee Green”...

Olimpiya mükafatçısı İradə Aşumova üzləşdiyi dələduzluq hadisəsi ilə əlaqədar etdiyi şikayətin obyektiv və operativ şəkildə həll edildiyinə və ona dəymiş maddi ziyanın tam ödətdirildiyinə görə DİN rəhbərliyinə öz təşəkkürünü bildirir.