Bakı şəhər sakini Elçin Əlibəyli DİN rəhbərliyinə ünvanladığı təşəkkür məktubunda müraciətinin müsbət həll olunmasında və ona dəymiş maddi ziyanın tam ödətdirilməsində göstərilən köməkliyə görə Daxili İşlər Nazirliyinin və Bakı Şəhər Baş Polis İdarəsinin rəhbərliklərinə minnətdarlığını bildirir.

“Yaşadığımız ünvanda baş vermiş oğurluq hadisəsinin açılmasında fədakarlıq göstərən, şübhəlini qısa müddət ərzində isti izlərlə taparaq, istintaqa təslim etdiyinə, şəxsi insani keyfiyyətlərinə, işə məsuliyyətli yanaşmasına görə Nizami RPİ-nin 24-cü Polis Bölməsinin əməkdaşı, polis mayoru Zaur Musayevə ailəmiz adından təşəkkür edirik”.

Bu fikirlər Bakı şəhər sakini Tərlan Məmmədzadənin DİN-ə ünvanladığı təşəkkür məktubundandır.

Bakıda müvəqqəti məskunlaşan məcburi köçkün Xanım Həsənova DİN rəhbərliyinə ünvanladığı məktubda nəvəsinin səhhətində yaranan problemlə əlaqədar ona köməklik göstərərək vaxtında xəstəxanaya çatdıran Binəqədi RPİ-nin 5-ci Polis Bölməsinin əməkdaşları - Süleyman Abbasova və Elton İsayevə təşəkkürünü bildirir.

Bakı şəhər sakini Elmar Abdullayev müraciətinə obyektiv şəkildə baxılaraq avtomobilinin cərimə meydançasından buraxılmasında ona göstərilən köməyə görə DİN rəhbərliyinə minnətdarlığını bildirir. Vətəndaşların müraciətlərinə həssaslıqla yanaşdıqlarına görə polisin fəaliyyətini yüksək dəyərləndirir, gərgin xidməti fəaliyyətlərində uğurlar diləyir.

Bakı şəhər sakini Orxan Qafarzadə DİN rəhbərliyinə ünvanladığı təşəkkür məktubunda ölkəmizdəki ictimai sabitliyə, cinayətkarlıqla mübarizənin təmininə, insan hüquq və azadlıqlarının qorunmasına görə daxili işlər orqanları əməkdaşlarının fəaliyyətini yüksək dəyərləndirir. Azərbaycan Polisi ilə qürur duyduğunu və hər zaman dəstəklədiyini bildirir.

Bakı şəhər sakini Aytən Tağıyeva evində baş vermiş oğurluq hadisəsinin üstünün tez bir zamanda açılaraq ona dəyən ziyanın ödənilməsində göstərdikləri köməyə görə Suraxanı Rayon Polis İdarəsinin əməkdaşlarına təşəkkürünü bildirir və vətəndaşların müraciətlərinə operativ və obyektiv yanaşdıqlarına görə daxili işlər orqanları əməkdaşlarının fəaliyyətini yüksək dəyərləndirir.

Bakı şəhər sakini Abdulla Babayev şikayət ərizəsinə operativ və obyektiv şəkildə baxılaraq həllini tapmasında göstərilən köməyə görə DİN rəhbərliyinə minnətdarlığını bildirir. Azərbaycan Polisinə çətin və şərəfli xidməti fəaliyyətində müvəffəqiyyətlər diləyir.

Nəsimi rayon sakinləri olan bir qrup şəxs DİN-ə ünvanladıqları məktubda yaşadıqları binanın təmir olunması zamanı qarşılaşdıqları problemin həll edilməsi istiqamətində polis əməkdaşlarının yaxından göstərdikləri köməkliyə görə DİN rəhbərliyinə və Nəsimi RPİ-nin əməkdaşlarına dərin təşəkkürlərini bildirirlər.

Gəncə şəhər sakini Məmməd Alıyev DİN rəhbərliyi tərəfindən qəbul olunaraq dinlənildiyi və ona dəymiş ziyanın ödənildiyi üçün təşəkkürünü bildirir.