Qazax rayon sakini Aqqralı Samirə yol-nəqliyyat hadisəsi zamanı azyaşlı övladının ölümündə təqsirli bilinən şəxsin istintaqa cəlb edilməsi üçün etdiyi müraciətə çevik reaksiya verildiyinə görə DİN-in Baş İstintaq və Təhqiqat İdarəsinin rəhbərliyinə minnətdarlığını bildirir.

Gecə saatlarında Bakıxanov qəsəbəsində üçüncü qrup əlil olan övladı Rövşən Fərzəliyeva qarşı quldurluq edərək ona məxsus mobil telefonu, pul kisəsini və digər sənədləri zorakılıq yolu ilə talayan şəxslərin təxirəsalımaz əməliyyat-axtarış tədbirləri nəticəsində tutulub istintaqa təhvil verilməsində göstərdikləri fədakarlığa görə Bakı şəhər sakini Oğul Fərzəliyev Sabunçu RPİ 13-cü Polis Bölməsinin əməkdaşlarına təşəkkürünü bildirir.

“Məktəb Press” qəzetinin redaktoru Ziyadxan Rüstəmov DİN-in mətbu orqanı “Mübariz keşikdə” qəzetinin, Bakı Şəhər Baş Polis İdarəsinin orqanı “Polis” qəzetinin bu gün kütləvi informasiya vasitələri içində öz sanbalı ilə seçildiyini yazır, sözügedən qəzetlərin daxili işlər orqanlarının həyatında baş verən yenilikləri, polis əməkdaşlarının fədakarlığını operativ şəkildə çatdırdığına, həmçinin yazılan məqalələrlə oxucu rəğbəti qazandığına görə məmnunluğunu ifadə edir.

Binəqədi qəsəbə sakini Qaroğlan Məlikov ünvanladığı təşəkkür məktubunda cinayətkar qrupların aşkar edilərək zərəsizləşdirilməsində, narkotiklərin qanunsuz dövriyyəsinə qarşı mübarizənin gücləndirilməsində, eləcə də kənddə yaradılmış sabitliyə, əmin-amanlığa görə DİN rəhbərliyinə, həmçinin vəzifə borclarının öhdəsindən layiqincə gələn 43-cü Polis Bölməsinin əməkdaşlarına minnətdarlıq edir.

Bakı şəhər sakini Xalidə Mustafayeva DİN-ə ünvanladığı minnətdarlıq məktubunda “102” Xidməti Zəng Mərkəzinə etdiyi müraciətə operativ və tez bir zamanda baxılmasına görə Bakı Baş Polis İdarəsinin rəhbərliyinə və əməkdaşlarına təşəkkür edir.

“Xəzər rayon məhkəməsində mülki işlə əlaqədar bərk əsəbləşdim. Birdən zalda halım pisləşdi və huşumu itirdim. Yanımdakıların dediyinə görə, orada xidmət aparan mühafizə polisinin əməkdaşı dərhal mənə ilkin tibbi yardım göstərib. Həyatımın xilas olunmasında göstərdiyi köməkliyə və fədakarlığa görə Xəzər Rayon Mühafizə İdarəsinin əməkdaşı Anar Süleymanova minnətdarlığımı bildirirəm.” Bu sözləri Bakı şəhər sakini, 2-ci qrup Qarabağ əlili Mehralı Kazımov DİN rəhbərliyinə ünvanladığı təşəkkür məktubunda yazır.

Bakı şəhər sakini Gülarə Quliyeva oğlunun itkin düşməsi ilə bağlı müraciətinin tez bir zamanda müsbət həllini tapmasında ona göstərdikləri köməyə görə Binəqədi RPİ 7-ci Polis Bölməsinin əməkdaşlarına təşəkkürünü bildirir.

Bakı şəhər sakini Eldəniz Hasilov qeydiyyata düşməsinə köməklik göstərilməsi ilə bağlı müraciətinə obyektiv baxılaraq həllini tapmasında göstərdikləri köməyə görə Suraxanı RPİ-nin əməkdaşlarına təşəkkürünü bildirir.

Astara rayonunun Kijəbə qəsəbə sakini Rasif Əliyev DİN rəhbərliyinə ünvanladığı təşəkkür məktubunda etdiyi müraciətə həssaslıqla yanaşılmasına və ona göstərilən köməkliyə görə Rayon Polis Şöbəsinin rəhbərliyinə minnətdarlığını bildirir.