Bakı şəhər sakini Siyah Əliyev DİN-ə ünvanlandığı məktubunda ötən il dekabrın 24-nə keçən gecə evinin yaxınlığında saxladığı “Toyota Prado” markalı avtomobilinin naməlum avtomobillə vurularaq əzildiyini bildirir.

S.Əliyev bununla bağlı Bakı Şəhər Dövlət Yol Polisi İdarəsinə etdiyi müraciətinə operativ baxıldığını, qısa müddətdə hadisəni törədən şəxsin müəyyən edildiyini qeyd edir. O, belə operativliyə, xoş rəftara və avtomobilinin təmir olunmasında göstərilən köməkliyə görə Bakı şəhər Dövlət Yol Polisi İdarəsinin əməkdaşlarına təşəkkürünü bildirir.

Masallı rayonunun Qızılağac kənd sakini Əlizaman Həsənov avtomobilinin yandırılması ilə bağlı müraciətinə Masallı Rayon Polis Şöbəsində baxıldığını, qəbul edilərək görülən tədbirlər barədə ətraflı məlumat verildiyini bildirir.

DİN və Masallı RPŞ-nin rəhbərliyinə təşəkkürünü bildirən Ə.Həsənov onda istintaq tədbirlərinin ədalətli aparılacağına əminlik yarandığını ifadə edir.

Abşeron rayonunun Ceyranbatan qəsəbə sakini Qızxanım Hüseynova DİN-ə göndərdiyi məktubunda ötən il dekabrın 29-da axşam saatlarında həyat yoldaşı Mətləb Hüseynovun avtomobillə vurulması nəticəsində ağır bədən xəsarətləri aldığını, yol qəzasını törədən şəxsin isə hadisə yerindən qaçdığını bildirir.

O, hadisə ilə bağlı DİN-in Baş İstintaq və Təhqiqat İdarəsinə bilavasitə tabe olan Yol nəqliyyat hadisələrinə dair işlər üzrə istintaq və təhqiqat şöbəsinin əməkdaşları tərəfindən görülmüş təxirəsalınmaz tədbirlər nəticəsində qısa müddətdə həmin sürücünün müəyyən edilərək istintaqa cəlb edildiyini qeyd edir.

Q.Hüseynova müraciətlərinə həssas yanaşılmasına və görülən operativ tədbirlərə görə DİN rəhbərliyinə, həmçinin Baş İstintaq və Təhqiqat İdarəsinin əməkdaşlarına təşəkkürünü bildirir.

Bakı şəhər sakini, jurnalist Azər İsrafilov dostunun üzləşdiyi problemlə əlaqədar etdiyi müraciətə operativ reaksiya verilərək qısa zamanda həll olunmasında göstərilən köməkliyə görə DİN-in Feysbuk səhifəsinə təşəkkür məktubu yazaraq bildirib: “Son vaxtlar ölkə miqyasında aparılan islahatlar göz qabağındadır. Bu islahatlar çərçivəsində hüquq-mühafizə orqanlarında aparılan kadr dəyişikliklərini, vətəndaşların müraciətlərinə dərhal reaksiya verilərək həll olunmasının şahidi oluruq. Başda DİN rəhbərliyi olmaqla bütün BŞBPİ-nin rəhbərliyinə təşəkkürümü bildirirəm!

Bakı şəhər sakini Amid Əliyev Daxili İşlər Nazirliyinin “Feysbuk” səhifəsinə etdiyi müraciətə aidiyyatı üzrə Xətai RPİ-də qısa müddət ərzində baxıldığına və şikayət olunan şəxs barəsində tədbir görüldüyünə görə RPİ rəhbərliyinə və şəxsi heyətinə təşəkkür edir.

Qazax şəhər sakini Arzu Abdullayeva DİN rəhbərliyinə ünvanladığı təşəkkür məktubunda müraciətinin obyektiv şəkildə araşdırıldığına görə minnətdarlığını bildirir.

Vətəndaş Ceyhun Məhərrəmov DİN-ə ünvanladığı təşəkkür məktubunda Baş Mütəşəkkil Cinayətkarlıqla Mübarizə İdarəsinin rəhbərliyinə və şəxsi heyətinə minnətdarlığını bildirir.

Mingəçevir şəhər sakini İlkin Cavadzadə Şəhər Polis Şöbəsinin Post Patrul Xidmətinin əməkdaşının nümunəvi xidmətinə görə Daxili İşlər Nazirliyinə ünvanladığı təşəkkür məktubunda yazır: “ Mən oğlumu hər gün məktəbə yola salmaq və onu qarşılamaq üçün avtobusdan istifadə edirəm. Bir gün oğlumu qarşılamağa gecikdiyim üçün həmin ərazidə xidmət edən nümunəvi polis əməkdaşı uşağa yaxınlaşıb, nə səbəbə tək qalması və valideynlərinin kim olduğu barədə məlumat öyrənib. Daha sonra mənim iş yerimə gətirib və mənə təhvil verib. Bununla da əsl Azərbaycan Polisi həm də vətəndaş kimi öz köməkliyini göstərib. Çox sevindirici haldır. Belə polislərimizi gördükcə biz də öz asayişimizin etibarlı qorunduğuna əmin oluruq”.

Qazax rayon sakini Elvin Abbasov müraciətinin Qazax RPŞ-nin İstintaq Bölməsində obyektiv araşdırılaraq müsbət həll olunmasına görə DİN rəhbərliyinə minnətdarlığını bildirir.