Azərbaycan Respublikasının Xalq artisti, fərdi Prezident təqaüdçüsü Yasin Qarayev Daxili İşlər Nazirliyinə təşəkkür məktubu ünvanlayıb.

Y.Qarayev bu yaxınlarda müalicə almaq üçün DİN-in A.N.Heydərov adına Respublika Hospitalına müraciət etdiyini bildirir. Fizioterapiya və reabilitasiya şöbəsində müalicə aldığını qeyd edən Xalq artisti hospitalda ona göstərilən xüsusi diqqətə, qayğıya, düzgün müayinə və müalicəyə, həmçinin xəstələrlə nəzakətli rəftara və xoş münasibətə görə DİN rəhbərliyinə, fizioterapiya və reabilitasiya şöbəsinin rəhbərliyinə və tibbi personalına təşəkkürünü bildirir.

Bakı şəhər sakini Lətifə Məmmədova Daxili İşlər Nazirliyinə ünvanlandığı məktubunda oğurluq hadisəsi ilə bağlı müraciətinə Baş İstintaq və Təhqiqat İdarəsində diqqətlə baxıldığını, dəvət edilərək araşdırmanın gedişatı ilə bağlı ətraflı məlumat verildiyini qeyd edir.

L.Məmmədova ona göstərilən diqqətə və operativliyə görə DİN rəhbərliyinə, həmçinin Baş İstintaq və Təhqiqat İdarəsinin və Yasamal Rayon Polis İdarəsinin əməkdaşlarına təşəkkürünü bildirir.

Bakı şəhər sakini Hikmət Əliyev Daxili İşlər Nazirliyinə ünvanlandığı məktubunda Azərbaycan Respublikası vətəndaşının şəxsiyyət vəsiqəsinin cari il noyabr ayının 1-dən yaşayış yeri üzrə qeydiyyatdan asılı olmayaraq veriləcəyi barədə göstəriş verdiyinə görə DİN rəhbərliyinə təşəkkürünü bildirir.

“Pareks Lizinq and Faktorinq” MMC-nin təsisçisi İqor Osipenko DİN-ə ünvanladığı məktubunda müraciətinə Baş Mütəşəkkil Cinayətkarlıqla Mübarizə İdarəsində operativ baxılaraq müsbət həll olunduğuna görə DİN rəhbərliyinə öz təşəkkürünü bildirir.

Bərdə rayon sakini Famil Nəbiyev DİN rəhbərliyinə ünvanladığı təşəkkür məktbunda Bərdə-Tərtər yolunda Dövlət Yol Polisi əməkdaşlarının fəaliyyətini yüksək qiymətləndirir və minnətdarlığını ifadə edir.

Azərbaycan Vətən Müharibəsi Veteranları İctimai Birliyinin Balakən Rayon Şöbəsinin sədri Aydın Abdullayev DİN rəhbərliyinə ünvanladığı təşəkkür məktubunda rayon ərazisində cinayətkarlığa, narkotik vasitələrin qanunsuz dövriyyəsinə qarşı aparılan mübarizəyə, eləcə də təhsil müəssisələrində keçirilən maarifləndirici tədbirləri görə Balakən RPŞ-nin rəhbərliyinə və digər əməkdaşlarına öz minnətdarlığını bildirir.

Paytaxtdakı 189-190 saylı tam orta məktəbin direktoru Ceyran Kuliyeva DİN-ə ünvanladığı məktubunda Səbail RPİ-nin təşkilatçılığı ilə həmin məktəbdə “Narkotik əsrin bəlasıdır”, “Zərərli vərdişlərə yox deyək” devizi ilə keçirilən maarifləndirici tədbirə görə müəllim, şagird və valideyn kollektivi adından DİN rəhbərliyinə öz təşəkkürünü bildirir.

Bərdə rayon sakini Knyaz Quliyev təşəkkür məktubunda övladına “Polis leytenantı” xüsusi rütbəsi verilməsinə görə DİN rəhbərliyinə minnətdarlığını bildirir.

Bakı şəhər sakini Xaliq Fərmanov DİN-ə ünvanladığı təşəkkür məktubunda müraciətinə obyektiv baxılmasına və ona dəymiş maddi ziyanın tam ödətdirilməsində göstərdikləri köməyə görə Daxili İşlər Nazirliyinin və Sabunçu RPİ-nin rəhbərliklərinə təşəkkürünü bildirir.