Abşeron rayon Saray qəsəbə sakini Mahir Xəlilov müalicəsi ilə əlaqədar etdiyi müraciətə həssaslıqla yanaşılaraq göstərdikləri köməkliyə görə DİN rəhbərliyinə və Abşeron RPİ-nin şəxsi heyətinə təşəkkürünü ifadə edir.

Gəncə şəhər sakini Nurəddin Hüseynov ölkəmizdə koronavirus infeksiyasının qarşısının alınması məqsədilə ölkə Prezidenti tərəfindən görülən işlərin, atılan addımların gəncəlilər tərəfindən yüksək qiymətləndirildiyini yazır. O, qeyd edir ki, Gəncədə də xüsusi karantin rejiminin tələblərinə, habelə sanitar-epidemioloji normalara şərtsiz əməl edilməsi virusa yoluxmanın qarşısını almağa yönəlib. Dövlətin bütün strukturları, o cümlədən daxili işlər orqanları əməkdaşları vəzifə borclarının öhdəsindən layiqincə gəlir, əhalinin sağlamlığının qorunması naminə öz həyatlarını belə riskə atırlar.

Zəngilan rayon sakini İbrahim Abbasov müəllifi olduğu “İzahlı Məntiq Külliyyatı” kitabı ilə bağlı Daxili İşlər Nazirliyinə etdiyi müraciətdən sonra onunla əlaqə yaradıldığına, DİN Polis Akademiyasının rəisi, polis general-mayoru Nazim Əliyevlə onlayn görüşünün baş tutmasına və gələcəkdə əməkdaşlığın davam etdirilməsi üçün lazımı şəraitin yaradılmasında göstəriləcək köməkliyə görə minnətdarlığını ifadə edir.

Koronavirus infeksiyası səbəbilə ölkəmizdə tətbiq edilən sosial izolyasiya tədbirlərinə qoşulan “Relax” istirahət mərkəzinin direktoru Azər Mirzəyev ötən müddət ərzində otelin mühafizəsinin tətbiq olunan qaydalara uyğun təşkil olunmasında, asayişin etibarlı qorunmasında fəallıq nümayiş etdirdiyinə görə Lənkəran Rayonlararası Mühafizə Şöbəsinin rəhbərliyinə və şəxsi heyətinə təşəkkürünü bildirir.

Zərdab rayon sakini Rauf Rəhimov “Əkinçi” qəzeti ilə milli mətbuatımızın əsasını qoyan Həsən Bəy Zərdabiyə aid 19-cu əsrdən qalma iki ədəd mis kasanın ədibin ev muzeyinə təhvil verilməsində göstərdikləri köməkliyə görə Rayon Polis Şöbəsi əməkdaşlarına təşəkkürünü bildirir.

Qobustan rayon sakini İsmayıl Hüseynov üzləşdiyi problemin həllində göstərdikləri köməkliyə görə Rayon Polis Şöbəsi əməkdaşlarına təşəkkürünü bildirir.

Şəki şəhər Müharibə, Əmək və Silahlı Qüvvələr Birliyi Veteranlar Təşilatının sədr müavini Vaqif Əhmədov, Astara rayon Veteranlar Təşkilatının sədri, istefada olan polis polkovnik-leytenantı Rafiq Əliyev, Bakı şəhər sakini, polis veteranı, yazıçı-publisist Hüseyn Xəzər, Sumqayıt şəhər sakini İndira Şəmsvari, dünyada hökm sürən pandemiya dövründə Azərbaycan Polisinin karantin rejiminə nəzarət etməklə yanaşı, bu ağır günlərdə cinayətkarlıqla da mübarizədə qətiyyət göstərdiyini təqdir edir, həmkarlarımıza çətin və şərəfli xidmətlərində uğurlar arzulayırlar.

“Koronavirus infeksiyasının ölkəmizdə qarşısının alınması məqsədilə həyatlarını riskə atan həkimlərimizlə yanaşı, polisimizin də xidməti bizdə qürur hissi yaradır. Onlar aztəminatlı ailələrə, evdəqal kampaniyasına qoşulan yaşlı və əlil insanlara yaxından kömək edirlər. Polisimiz asayişi də etibarlı qoruyur, cinayətkarlıqla qətiyyətli mübarizə aparır. Biz Azərbaycan Polisi ilə fəxr edirik”. Bu fikirlər “Şirvan” kiçik müəssisəsinin direktoru Qurbanxan Dəmirovun Daxili İşlər Nazirliyinə ünvanladığı təşəkkür məktubundandır.

Bakı şəhər sakini Azər Niftalıyev etdiyi müraciət əsasında üzləşdiyi problemin qısa zaman kəsiyində həllini tapmasında göstərdiyi köməkliyə görə Yasamal Rayon Polis İdarəsinin Dövlət Yol Polisi Şöbəsinin əməkdaşı, polis kapitanı Nəbati Yaqubova təşəkkürünü bildirir.