Nizami rayonu Keşlə və “NZS” qəsəbələrində mağazalardan oğurluqlar edən və narkotiklərin qanunsuz dövriyyəsi ilə məşğul olan 5 nəfər saxlanılıb

18.02.2023

Nizami rayonu Keşlə qəsəbəsində yerləşən marketlərdən silsilə oğurluq edilib. Naməlum şəxslər obyektlərə daxil olaraq orada olan kassa aparatı, pul, tütün məmulatları və saxlanc yerindən bir ədəd dəyəri 900 manat olan fotoaparat oğurlayıblar. Nizami Rayon Polis İdarəsinin 23-cü Polis Bölməsinin əməkdaşlarının həyata keçirdikləri əməliyyat nəticəsində hadisələri törətməkdə şübhəli bilinən Alıbəy Abdurəhimov, Ədhəm Alubeydi və yetkinlik yaşına çatmayan daha bir nəfər saxlanılıb. Bu şəxslərin mağazalardan oğurluqlar etməsi təhlükəsizlik kameraları vasitəsi ilə anbaan lentə alınıb. Nizami Rayon Polis İdarəsinin 23-cü Polis Bölməsinin əməkdaşlarının həyata keçirdikləri digər əməliyyat zamanı Keşlə və “NZS” qəsəbələrində narkotiklərin qanunsuz dövriyyəsi ilə məşğul olan Orxan Alıyev saxlanılıb. Bu şəxsdən narkotik vasitə heroin və metamfetamin aşkar edilib. O, ifadəsində narkotikləri Peyman adlı şəxsdən aldığını bildirib. Bölmə əməkdaşları tərəfindən həmin şəxs – Peyman Əliyev də saxlanılıb. Onun  üzərindən isə 1 kiloqrama yaxın heroin və marixuana aşkar edilib. Faktlarla bağlı araşdırmalar davam etdirilir.

İran vətəndaşları tərəfindən narkokuryerliyə cəlb edilən daha bir nəfər saxlanılıb

18.02.2023

Abşeron Rayon Polis İdarəsinin Saray Polis Bölməsinin əməkdaşlarının daxil olmuş əməliyyat məlumatı əsasında həyata keçirdikləri növbəti tədbir nəticəsində narkotik vasitələrin satışı ilə məşğul olan paytaxt sakini Kamran Quliyev saxlanılıb. Onun üzərinə baxış zamanı satış məqsədi ilə əldə etdiyi 2 kiloqrama yaxın heroin və metamfetamin aşkar edilib.Araşdırmalar zamanı Kamran Quliyevin sosial şəbəkələr vasitəsi ilə İranda yaşayan narkotik vasitələrin onlayn satışı ilə məşğul olan həmin ölkənin vətəndaşı ilə əlbir olduğu və onun pul müqabilində narkokuryerlik təklifi ilə razılaşdığı müəyyən edilib. Kamran Quliyevin həmçinin sosial şəbəkələrdə gənclər arasında narkotik vasitlərin təbliği ilə məşğul olduğu da müəyyən edilib. Faktla bağlı Kamran Quliyevin barəsində Saray Polis Bölməsində toplanan materiallar Abşeron Rayon Polis İdarəsinin İstintaq Şöbəsinə göndərilib. Əməliyyat-istintaq tədbirləri davam etdirilir. 

Gün ərzində ölkə ərazisində qeydə alınan 85 cinayətin açılması təmin olunub

17.02.2023

Fevralın 17-də ölkə ərazisində qeydə alınan 85, əvvəlki dövrlərdən bağlı qalan 10 cinayətin açılması daxili işlər orqanlarının əməkdaşları tərəfindən təmin olunub.

Gün ərzində qanunsuz dövriyyədən çıxarılan narkotik vasitələr – 3,7 kiloqrama yaxın heroin, 13,5 kiloqramdan artıq marixuana, 3,1 kiloqrama yaxın tiryək, həmçinin 1 kiloqram 42 qramdan çox metamfetamin və 100 ədəd metadon həbləri olub

17.02.2023

Polis əməkdaşlarının fevralın 17-də respublika ərazisində keçirdikləri əməliyyat tədbirləri nəticəsində ümumi çəkisi 21,4 kiloqrama yaxın narkotik vasitə aşkar olunaraq götürülüb. Qanunsuz dövriyyədən çıxarılan narkotik vasitələr – 3,7 kiloqrama yaxın heroin, 13,5 kiloqramdan artıq marixuana, 3,1 kiloqrama yaxın tiryək, həmçinin 1 kiloqram 42 qramdan çox metamfetamin və 100 ədəd metadon həbləri olub. Bu istiqamətdə qətiyyətli mübarizə tədbirləri davam etdirilir. 

Qanunsuz saxlanılan silah-sursatla bağlı tədbirlər davam etdirilir 

17.02.2023

Polis əməkdaşlarının əldə edilən məlumatlar əsasında keçiridikləri əməliyyat tədbirləri nəticəsində fevralın 17-də respublikanın ayrı-ayrı rayonlarında vətəndaşlardan qanunsuz saxladıqları müxtəlif markalı ümumilikdə 5 ədəd ov tüfəngi götürülüb.  Faktlar üzrə polis şöbələrində müvafiq araşdırmalar aparılır. 

Axtarışda olan S.Hüseynov saxlanılıb

17.02.2023

Xətai RPİ 35-ci Polis Bölməsi əməkdaşlarının keçirdikləri əməliyyat tədbirləri nəticəsində Cinayət Məcəlləsinin 177-ci (Oğurluq) maddəsi ilə axtarışda olan S.Hüseynov saxlanılıb. Araşdırmalarla onun rayon ərazisindəki evlərin birindən pul və 2 ədəd qızıl üzük oğurlaması da müəyyən olunub.

Oğurluqda şübhəli bilinən Lənkəran rayon sakini N.Məmmədova saxlanılıb

17.02.2023

Abşeron Rayon Polis İdarəsi əməkdaşlarının keçirdikləri əməliyyat tədbiri nəticəsində Masazır qəsəbəsindəki evlərin birindən pul və 3 ədəd mobil telefon oğurlamaqda şübhəli bilinən Lənkəran rayon sakini N.Məmmədova saxlanılıb. Faktla bağlı cinayət işi başlanılıb.  

Gəncə şəhər sakini E.Vəliyevdən nömrəsi silinmiş avtomat silahı və 1 ədəd patron götürülüb

17.02.2023

Gəncə ŞBPİ 4-cü Polis Bölməsi əməkdaşlarının əldə olunan məlumat əsasında keçirdikləri əməliyyat tədbiri nəticəsində şəhər sakini, əvvəllər məhkum olunmuş E.Vəliyevdən nömrəsi silinmiş “AKM” markalı avtomat silahı və 1 ədəd patron götürülüb. 

Şuşa şəhəri ərazisində birgə keçirilən tədbirlər nəticəsində müxtəlif markalı silah-sursat aşkar edilib

17.02.2023

Şuşa Rayon Polis Şöbəsi, Dövlət Təhlükəsizliyi Xidmətinin rayon idarəsi və Minatəmizləmə Agentliyi əməkdaşlarının Şuşa şəhəri ərazisində birgə keçirdikləri tədbirlər nəticəsində müxtəlif markalı silah-sursat aşkar edilib. Tapılan 1 ədəd “Faqot” markalı raket qurğusu, 3 ədəd minaatan, 1 ədəd pulemyot, 1 ədəd “AK-74” markalı avtomat silahı, 1 ədəd ov tüfəngi, 28 ədəd mərmi, 9 ədəd qumbara, 13 ədəd qumbara alışdırıcısı, 1325 ədəd müxtəlif çaplı avtomat patron götürülərək aidiyyəti üzrə təhvil verilib.

Xaçmaz rayonunun Xudat şəhəri ərazisində yol-nəqliyyat hadisəsi

17.02.2023

Fevralın 17-də saat 17 radələrində Xaçmaz rayonunun Xudat şəhəri ərazisində rayon sakinləri A.Babayevin idarə etdiyi “Hyundai” və İ.Seyidoğlunun idarə etdiyi “Mercedes” markalı avtomobillər toqquşub. Nəticədə “Mercedes” markalı avtomobilin sürücüsü, sərnişinləri N.Vahidov və E.Rzayev hadisə yerində ölüb, digər sürücü isə xəstəxanaya yerləşdirilib.Baş İstintaq və Təhqiqat İdarəsi tərəfindən araşdırma aparılır.