Qaradağ rayonunun Müşfiqabad qəsəbəsi ərazisində münaqişə zəminində qəsəbə sakini E.Orucovu öldürməkdə şübhəli bilinən M.Məmmədov tutularaq istintaqa təhvil verilib

09.03.2023

Qaradağ RPİ-nin 10-cu Polis Bölməsinə martın 9-da saat 22 radələrində Müşfiqabad qəsəbəsi ərazisində qəsəbə sakini E.Orucovun öldürülməsi barədə məlumat daxil olub. Rayonun polis və prokurorluq orqanlarının əməkdaşları tərəfindən müvafiq tədbirlər həyata keçirilib. Araşdırmalarla qəsəbə sakini M.Məmmədovun münaqişə zəminində E.Orucovu bıçaqla vuraraq öldürməsinə əsaslı şübhələr müəyyən edilib. Polis əməkdaşlarının keçirdikləri əməliyyat tədbirləri nəticəsində M.Məmmədov şübhəli şəxs qismində tutularaq istintaqa təhvil verilib. Faktla bağlı cinayət işi başlanılıb. 

Nərimanov rayonu ərazisindəki mağazaların birindən pul oğurlamaqda şübhəli bilinən paytaxt sakini S.Ağayeva saxlanılıb

09.03.2023

Nərimanov RPİ-nin 16-cı Polis Bölməsinə martın 4-də rayon ərazisindəki mağazaların birindən 1195 manat pulun qeyri-aşkar şəraitdə oğurlanması barədə məlumat daxil olub. Polis əməkdaşlarının keçirdikləri əməliyyat tədbirləri nəticəsində oğurluq əməlində şübhəli bilinən, Cinayət Məcəlləsinin 177-ci (Oğurluq) maddəsi ilə də axtarışda olan paytaxt sakini S.Ağayeva müəyyən olunaraq saxlanılıb. Araşdırmalarla onun Yasamal rayonu ərazisindəki mağazaların birində satıcının mobil telefonunu oğurlaması da məlum olub. 

Binəqədi rayonu ərazisində yerləşən marketlərdən birinin anbarındakı seyfdən pul oğurlamaqda şübhəli bilinən Bakı şəhər sakini F.Əliyev saxlanılıb

09.03.2023

Binəqədi rayonu M.Ə.Rəsulzadə qəsəbəsi ərazisində yerləşən marketlərdən birinin anbarındakı seyfdən 11.200 manatın qeyri-aşkar şəraitdə oğurlanması barədə polisə məlumat daxil olub. Binəqədi RPİ 4-cü Polis Şöbəsi əməkdaşlarının keçirdikləri əməliyyat tədbirləri nəticəsində oğurluq əməlində şübhəli bilinən Bakı şəhər sakini F.Əliyev müəyyən olunaraq saxlanılıb. Araşdırma aparılır. 

Xırdalan şəhər sakini olan bir qadının bank hesabından pul oğurlamaqda şübhəli bilinən B.Qasımov saxlanılıb

09.03.2023

Abşeron Rayon Polis İdarəsi əməkdaşlarının daxil olan məlumat əsasında keçirdikləri əməliyyat tədbiri nəticəsində Xırdalan şəhər sakini olan bir qadının bank hesabından pul oğurlamaqda şübhəli bilinən Məmmədli kənd sakini B.Qasımov müəyyən olunaraq saxlanılıb. Onun şəhər sakini olan daha bir qadının bank hesabından pul oğurlaması da məlum olub. Araşdırma aparılır. 

Binəqədi rayonunda yanvar-fevral aylarında keçirilən əməliyyatlar zamanı narkotiklərin qanunsuz dövriyyəsi ilə məşğul olan 98 nəfər saxlanılıb

09.03.2023

Binəqədi Rayon Polis İdarəsinin əməkdaşları tərəfindən bu ilin yanvar-fevral ayı ərzində rayon ərazisində narkotiklərin qanunsuz dövriyyəsini həyata keçirən şəxslərə qarşı əməliyyatlar davam etdirilib. Əməliyyatlar zamanı narkotiklərin qanunsuz dövriyyəsi ilə məşğul olan 98 nəfər saxlanılıb. Araşdırma zamanı müəyyən edilib ki, saxlanılanların bir neçəsi əvvəllər də eyni cinayətlər etdikləri üçün, yəni narkotiklərin qanunsuz dövriyyəsini təşkil etdikləri üçün məhkum olunmuş şəxslərdir. Həmin şəxslərin üzərindən, yaşadıqları evlərdən 11 kiloqram heroin, marixuana və psixotrop maddə olan metamfetamin aşkar edilib.Qeyd edək ki, saxlanılan şəxslərin bir neçəsinin Binəqədi rayonunda evlərdən və obyektlərdən oğurluq etdikləri də müəyyən edilib.  Onların hər biri barəsində İdarənin İstintaq Şöbəsində Cinayət işləri başlanılıb. Binəqədi rayonu ərazisində narkotiklərin qanunsuz dövriyyəsi ilə məşğul olan digər şəxslərin də tutulmaları istiqamətində polis əməkdaşları tərəfindən mübarizə tədbirləri davam etdirilir.

Gün ərzində ölkə ərazisində qeydə alınan 64 cinayətin açılması təmin olunub

08.03.2023

Martın 8-də ölkə ərazisində qeydə alınan 64, əvvəlki dövrlərdən bağlı qalan 10 cinayətin açılması daxili işlər orqanlarının əməkdaşları tərəfindən təmin olunub.

Ümumi çəkisi 8,4 kiloqramdan artıq narkotik vasitə aşkar olunaraq götürülüb

08.03.2023

Polis əməkdaşlarının martın 8-də respublika ərazisində keçirdikləri əməliyyat tədbirləri nəticəsində ümumi çəkisi 8,4 kiloqramdan artıq narkotik vasitə aşkar olunaraq götürülüb. Qanunsuz dövriyyədən çıxarılan narkotik vasitələr – 4 kiloqramdan artıq heroin, 1,4 kiloqrama yaxın marixuana, 3 kiloqramdan çox metamfetamin olub. Bu istiqamətdə qətiyyətli mübarizə tədbirləri davam etdirilir. 

Metroda 2 sərnişinin mobil telefonlarını cibgirlik yolu ilə talamaqda şübhəli bilinən Mingəçevir şəhər sakini Ə.İsayev saxlanılıb

08.03.2023

Metropolitendə Polis İdarəsinə ayrı-ayrı vaxtlarda qatarda 2 sərnişinin mobil telefonlarının cibgirlik yolu ilə talanması barədə məlumatlar daxil olub.    Polis əməkdaşlarının keçirdikləri əməliyyat tədbirləri nəticəsində oğurluq əməlində şübhəli bilinən Mingəçevir şəhər sakini, əvvəllər məhkum olunmuş Ə.İsayev müəyyən olunaraq saxlanılıb. Araşdırma aparılır. 

Paytaxtın Nizami rayonu ərazisində avtobusda soyğunçuluq etməkdə şübhəli bilinən Bakı şəhər sakini V.Qəniyev saxlanılıb

08.03.2023

Paytaxtın Nizami rayonu ərazisində “Daewoo” markalı bir marşrut avtobusundan içərisində pul olan cüzdanın soyğunçuluq yolu ilə talanması barədə 24-cü Polis Şöbəsinə məlumat daxil olub.Polis əməkdaşlarının keçirdikləri əməliyyat tədbiri nəticəsində soyğunçuluq əməlində şübhəli bilinən Bakı şəhər sakini, əvvəllər dəfələrlə məhkum olunmuş V.Qəniyev müəyyən olunaraq saxlanılıb. Şəxsi axtarış zamanı ondan heroin aşkar olunaraq götürülüb. Araşdırma aparılır. 

Səbail rayonunun Badamdar qəsəbəsi ərazisində yük avtomobilindən oğurluq etməkdə şübhəli bilinən Şamaxı rayon sakini Ş.Məmmədov saxlanılıb

08.03.2023

Səbail RPİ 41-ci Polis Bölməsi əməkdaşlarının daxil olan məlumat əsasında keçirdikləri əməliyyat tədbiri nəticəsində fevralın 28-nə keçən gecə Badamdar qəsəbəsi ərazisində “KamAZ” markalı bir yük avtomobilindən 2 ədəd akkumulyator oğurlamaqda şübhəli bilinən Şamaxı rayon sakini, əvvəllər məhkum olunmuş Ş.Məmmədov saxlanılıb. Araşdırma aparılır.