Suraxanı rayonunun Hövsan qəsəbəsi ərazisində “Toyota” markalı avtomobillə piyada vurulub

11.03.2023

Martın 11-də saat 21 radələrində Suraxanı rayonunun Hövsan qəsəbəsi ərazisində Bakı şəhər sakini M.Ağayev idarə etdiyi “Toyota” markalı avtomobillə yolu keçən M.Qasımovanı vurub və nəticədə piyada hadisə yerində ölüb.Suraxanı Rayon Polis İdarəsində araşdırma aparılır.

Maştağa və ətraf qəsəbələrdə narkotik vasitələrin satışını həyata keçirən şəxslərə qarşı əməliyyatlar keçirilib

11.03.2023

Sabunçu Rayon Polis İdarəsinin 14-cü Polis Bölməsinin əməkdaşları tərəfindən Maştağa və ətraf qəsəbələrdə narkotik vasitələrin satışını həyata keçirən şəxslərə qarşı xüsusi əməliyyatlar həyata keçirilib. Belə ki, Maştağa qəsəbə sakini Malik Qədimov narkotiklərin satışında şübhəli bilindiyi üçün saxlanılıb. Onun üzərindən və yaşadığı evdən 5 kiloqrama yaxın marixuana aşkar edilib.  Qeyd edək ki, Malik Qədimov Maştağa qəsəbəsində narkotiklərin satışını təşkil edən əsas şəxslərdən biri olub. Araşdırma zamanı onun narkotikləri İranda yaşayan şəxsiyyəti məlum olmayan həmin ölkənin vətəndaşından aldığı müəyyən edilib. Əməliyyat tədbirlərinin davamı olaraq Malik Qədimovun paytaxt ərazisində narkotiklərin satışını təşkil etmək üçün yaratdığı narkoşəbəkənin digər üzvlərinin də saxlanılması təmin olunub. Tədbirin davamı olaraq İzzət Abdullayev, Kənan Ələkbərov, Yusif Rəhimov, Teymur Xəlilov və Azad Manafov da saxlanılıblar. Bu şəxslərdən də əlavə olaraq hazır bükümlər şəklində satış üçün qablaşdırılan külli miqdarda heroin, metamfetamin və marixuana aşkar olunub. Sabunçu Rayon Polis İdarəsinin 14-cü Polis Bölməsinin əməkdaşları tərəfindən həyata keçirilən digər əməliyyat zamanı isə Savalan yaşayış massivində narkotik vasitələrin satışı ilə məşğul olan Elnarə Ələkbərova da saxlanılıb. Onun yaşadığı evdən isə satmaq üçün nəzərdə tutulan 17 ədəd kibrit qutusunda qablaşdırllan marixuana, eləcə də 9 büküm heroin və metamfetamin aşkar olunub. Elnarə Ələkbərova ifadəsində narkotik maddələrin satışı ilə məşğul olduğunu etiraf edib.Faktlarla bağlı 14-cü Polis Bölməsində toplanan materiallar Sabunçu Rayon Polis İdarəsinə göndərilib. Sabunçu rayonu ərazisində narkotiklərin qanunsuz dövriyyəsi ilə məşğul olan digər şəxslərin də tutulmaları istiqamətində polis əməkdaşları tərəfindən mübarizə tədbirləri qətiyyətlə davam etdirilir.

Gün ərzində ölkə ərazisində qeydə alınan 82 cinayətin açılması təmin olunub

10.03.2023

Martın 10-da ölkə ərazisində qeydə alınan 82, əvvəlki dövrlərdən bağlı qalan 21 cinayətin açılması daxili işlər orqanlarının əməkdaşları tərəfindən təmin olunub.

Ümumi çəkisi 15,3 kiloqrama yaxın narkotik vasitə aşkar olunaraq götürülüb

10.03.2023

Polis əməkdaşlarının martın 10-da respublika ərazisində keçirdikləri əməliyyat tədbirləri nəticəsində ümumi çəkisi 15,3 kiloqrama yaxın narkotik vasitə aşkar olunaraq götürülüb. Qanunsuz dövriyyədən çıxarılan narkotik vasitələr – 14,2 kiloqrama yaxın marixuana, 800 qramdan artıq heroin, 280 qramdan çox metamfetamin olub. Bu istiqamətdə qətiyyətli mübarizə tədbirləri davam etdirilir. 

Bakı şəhər sakini M.Baxşıyevdən heroin, metamfetamin və elektron tərəzi aşkar olunaraq götürülüb

10.03.2023

Nəsimi RPİ 21-ci Polis Bölməsi əməkdaşlarının əldə olunan məlumat əsasında keçirdikləri əməliyyat tədbiri nəticəsində saxlanılan Bakı şəhər sakini, əvvəllər məhkum olunmuş M.Baxşıyevdən 3 qrama yaxın heroin,  yaşadığı evə baxış zamanı əlavə 202 qrama yaxın heroin, 70 qramdan artıq metamfetamin və 1 ədəd elektron tərəzi aşkar olunaraq götürülüb. 

Bakı şəhər sakini R.Məmmədovdan 4 kiloqram 357 qram marixuana götürülüb

10.03.2023

Suraxanı RPİ 33-cü Polis Bölməsi əməkdaşlarının əldə olunan məlumat əsasında keçirdikləri əməliyyat tədbiri nəticəsində saxlanılan Bakı şəhər sakini R.Məmmədovdan 4 kiloqram 357 qram marixuana götürülüb. Araşdırmalarla onun rayon ərazisində bir avtomobildən içərisində pul, sənədlər, bank kartı olan cüzdanı oğurlaması da məlum olub. Araşdırma aparılır.  

Bir qrup Neftçala rayon sakinindən narkotik vasitələr aşkar olunaraq götürülüb

10.03.2023

Neftçala Rayon Polis Şöbəsi əməkdaşlarının əldə olunan məlumat əsasında keçirdikləri əməliyyat tədbirləri nəticəsində saxlanılan rayon sakinləri, əvvəllər məhkum olunmuşlar - V.Alışdan 107 qramdan artıq heroin, A.Süleymanovdan 2 kiloqram 225 qram, A.Mahmudovdan isə 2 kiloqram 970 qram marixuana aşkar olunaraq götürülüb. 

Xəzər rayonunun Şüvəlan qəsəbəsi ərazisində sürücüyə qarşı quldurluq etməkdə şübhəli bilinən Bakı şəhər sakini T.Qasımov saxlanılıb

10.03.2023

Martın 4-də saat 23 radələrində Xəzər rayonunun Şüvəlan qəsəbəsi ərazisində “Toyota Prius” markalı bir avtomobildə sürücünün sərnişini tərəfindən bıçaqla hədələnərək quldurluq yolu ilə pulunun talanması barədə polisə məlumat daxil olub.Xəzər RPİ 1-ci Polis Şöbəsi əməkdaşlarının keçirdikləri əməliyyat tədbirləri nəticəsində quldurluq əməlində şübhəli bilinən Bakı şəhər sakini, əvvəllər narkotiklərlə əlaqəli cinayətə görə məhkum olunmuş T.Qasımov müəyyən olunaraq saxlanılıb. Araşdırma aparılır.

Sumqayıt şəhər sakini Q.Cəfərovun pulunu soyğunçuluq yolu ilə talamaqda şübhəli bilinən şəhər sakini Z.Kazımov saxlanılıb

10.03.2023

Martın 7-də Sumqayıt şəhəri ərazisində şəhər sakini Q.Cəfərovun 327 manatının soyğunçuluq yolu ilə talanması barədə polisə məlumat daxil olub.  Sumqayıt ŞPİ 1-ci Polis Bölməsi əməkdaşlarının keçirdikləri əməliyyat tədbiri nəticəsində soyğunçuluq əməlində şübhəli bilinən şəhər sakini, əvvəllər dəfələrlə məhkum olunmuş Z.Kazımov müəyyən olunaraq saxlanılıb. Araşdırma aparılır. 

Naftalan şəhərində 3 vətəndaşın bank hesablarından pullarını oğurlamaqda şübhəli bilinən Goranboy rayon sakini A.Əhmədli saxlanılıb

10.03.2023

Naftalan Şəhər Polis Şöbəsi əməkdaşlarının daxil olan məlumatlar əsasında keçirdikləri əməliyyat tədbirləri nəticəsində 3 vətəndaşın bank hesablarından ümumilikdə 1500 manat pullarını oğurlamaqda şübhəli bilinən Goranboy rayon sakini A.Əhmədli müəyyən olunaraq saxlanılıb. Araşdırmalarla onun daha 3 nəfərin bank hesablarından 3080 manat pul vəsaitlərini oğurlaması da məlum olub. Araşdırmalar aparılır.