Qəbələ rayonunun Mirzəbəyli kəndi ərazisində rayon sakini O.Qədirovu idarə etdiyi avtomobillə vuraraq hadisə yerindən yayınan sürücüsü İ.Hacıyev saxlanılıb

14.03.2023

Martın 14-də saat 19 radələrində Qəbələ rayonunun Mirzəbəyli kəndi ərazisində yolu keçən rayon sakini O.Qədirov müəyyən edilməyən avtomobillə vurulub və aldığı xəsarətlərdən hadisə yerində ölüb.Qəbələ Rayon Polis Şöbəsi əməkdaşlarının keçirdikləri əməliyyat-axtarış tədbirləri nəticəsində  yol-nəqliyyat hadisəsinin “VAZ-21074” markalı avtomobillə törədilməsi müəyyən olunub və həmin nəqliyyat vasitəsinin sürücüsü, Nic qəsəbə sakini İ.Hacıyev saxlanılıb. Baş İstintaq və Təhqiqat İdarəsi tərəfindən araşdırma aparılır.

Sabirabad şəhəri ərazisində “VAZ-2106” markalı avtomobillə velosipedçi vurulub

14.03.2023

Martın 14-də saat 20 radələrində Sabirabad şəhəri ərazisində rayon sakini B.Həmidov idarə etdiyi “VAZ-2106” markalı avtomobillə qarşıda velosipedlə gedən S.Mirzəyevi vurub və nəticədə velosipedçi hadisə yerində ölüb.Sabirabad Rayon Polis Şöbəsində araşdırma aparılır.

Xocalı rayonu ərazisində “Hovo” markalı avtomobil yolun kənarına aşıb

14.03.2023

Martın 14-də saat 22 radələrində Xocalı rayonu ərazisində Sumqayıt şəhər sakini X.Teymurov idarə etdiyi “Hovo” markalı avtomobili yolun kənarına aşırıb və nəticədə hadisə yerində ölüb.Xocalı Rayon Polis Şöbəsində araşdırma aparılır.

“İnstagram”da dəlduzluq edərək sosial şəbəkə istifadəçilərinin pullarını ələ keçirən şəxs saxlanılıb

14.03.2023

“İnstagram” sosial şəbəkəsində vətəndaşların etibarından sui-istifadə edərək onları aldadan və pullarını ələ keçirən şəxs saxlanılıb. Nərimanov Rayon Polis İdarəsinin 18-ci Polis Şöbəsinin əməkdaşları tərəfindən həyata keçirilən əməliyyat zamanı axtarışda olan Firuddin Həsənov tutulub. Onun “İnstagram”da açıq səhifələrə daxil olaraq həmin şəxsin dostluğunda olanlarla əlaqə yaratdığı, daha sonra özünü profilin sahibi kimi qələmə verib müxtəlif məbləğlərdə borc pul isdədiyi müəyyən edilib. Firuddin Həsənov zərərçəkənlərdən pul vəsaitlərinin karta köçürülməsini istəyib. Həmin vəsaitləri əldə edəndən sonra isə Firuddin Həsənov zərərçəkənlərin əlaqə yaratmaması üçün onların mobil telefonlarını və sosial şəbəkə hesablarını bloklayıb. Saxlanılan şəxs dələduzluq edən zaman zərərçəkənlərlə əsasən 055-460-50-04 və 070-827-50-50 mobil nömrəsi ilə əlaqə saxlayıb. Faktlarla bağlı araşdırmalar davam etdirilir. Firuddin Həsənovun qanunsuz əməllərindən zərərçəkən başqa vətəndaşlar varsa, ərazi polis orqanlarına, “102” Zəng Mərkəzinə və Nazirliyin sosial şəbəkələrdəki rəsmi səhifələrinə məlumat verə bilərlər.

Sumqayıtda təqaüdlərini almaq üçün bankomata üz tutan ahıl yaşlı şəxslərə qarşı soyğunçuluq edənlər saxlanılıblar

14.03.2023

Sumqayıt Şəhər Polis İdarəsinin 1-ci Polis Bölməsinin əməkdaşları tərəfindən həyata keçirilən əməliyyat zamanı şəhər ərazisində ahıl yaşlı şəxsləri izləyərək onlara qarşı quldurluq və soyğunçuluq cinayətləri törətməkdə şübhəli bilinən Sadiq Şavaqatov və Zahid Kazımov saxlanılıblar. Bu şəxslər bankomatlarda təqaüdlərini nağdlaşdıran zərərçəkənlərin pullarını ələ keçiriblər. Sumqayıt ŞPİ 1-ci PB əməkdaşları tərəfindən keçirilən növbəti əməliyyat zamanı isə Corat qəsəbəsində narkotik vasitələrin satışı ilə məşğul olan daha bir nəfər - Bayandur Umudov da tutulub. Onun üzərindən 1 kiloqramdan artıq narkotik vasitə marixuana aşkar edilib. Faktlarla bağlı araşdırmalar davam etdirilir. Bu şəxslərin qanunsuz əməllərindən zərərçəkən başqa vətəndaşlar varsa, ərazi polis orqanlarına, “102” Zəng Mərkəzinə və Nazirliyin sosial şəbəkələrdəki rəsmi səhifələrinə məlumat verə bilərlər.

Nizami rayonunda narkotiklərin satışı ilə məşğul 2 qardaş saxlanılıb

14.03.2023

Nizami Rayon Polis İdarəsinin Narkotiklərlə Mübarizə Bölməsinin əməkdaşları tərəfindən keçirilən əməliyyat zamanı narkotiklərin qanunsuz dövriyyəsi ilə məşğul olan daha 2 nəfər saxlanılıb. Polisə Tural və Orxan  adlı şəxslərin rayon ərazisində narkotiklərin satışını həyata keçirdikləri barədə məlumat daxil olub. Həmin şəxslər – Tural Bayramlı və qardaşı Orxan tutularaq Polis İdarəsinə gətiriliblər. Onların üzərindən və yaşadıqları evdən 2 kiloqrama yaxın psixotrop maddə olan metamfetamin aşkar edilib. Saxlanılan şəxslər narkotik vasitələri sosial şəbəkələrdə “Hidiş” kimi tanıdıqları İran vətəndaşından Bakı şəhərində satmaq məqsədi ilə aldıqlarını bildiriblər.Aşkar edilən faktla bağlı İdarənin İstintaq Şöbəsində cinayət işi başlanılıb. Nizami rayonu ərazisində narkotik vasitələrin qanunsuz dövriyyəsi ilə məşğul olan şəxslərin ifşa edilməsi istiqamətində əməliyyatlar davam etdirilir.

Gün ərzində ölkə ərazisində qeydə alınan 56 cinayətin açılması təmin olunub

13.03.2023

Martın 13-də ölkə ərazisində qeydə alınan 56, əvvəlki dövrlərdən bağlı qalan 6 cinayətin açılması daxili işlər orqanlarının əməkdaşları tərəfindən təmin olunub.

Ümumi çəkisi 23,8 kiloqramdan artıq narkotik vasitə aşkar olunaraq götürülüb

13.03.2023

Polis əməkdaşlarının martın 13-də respublika ərazisində keçirdikləri əməliyyat tədbirləri nəticəsində ümumi çəkisi 23,8 kiloqramdan artıq narkotik vasitə aşkar olunaraq götürülüb. Qanunsuz dövriyyədən çıxarılan narkotik vasitələr – 5,9 kiloqramdan artıq heroin, 11,4 kiloqramdan çox marixuana, 2 kiloqram tiryək, 4,5 kiloqramdan çox metamfetamin və 200 ədəd yüksək təsiredici xassəyə malik həblər olub. Bu istiqamətdə qətiyyətli mübarizə tədbirləri davam etdirilir.

Yardımlı rayonunun Köryədi kənd sakini Y.Ağayevdən narkotik vasitələr götürülüb

13.03.2023

Yardımlı Rayon Polis Şöbəsi əməkdaşlarının əldə olunan məlumat əsasında keçirdikləri əməliyyat tədbiri nəticəsində saxlanılan Köryədi kənd sakini Y.Ağayevdən 10 kiloqram 180 qram marixuana, 4 kiloqram 885 qram heroin, 4 kiloqram 464 qram metamfetamin, 2 kiloqrama yaxın tiryək və 200 ədəd “Tramadol” həbi götürülüb.

Gəncə şəhəri ərazisindəki mənzillərin birində münaqişə zəminində həyat yoldaşı Y.Hümbətovanı öldürməkdə şübhəli bilinən E.Quliyev Hacıqabul rayonu ərazisində tutularaq istintaqa təhvil verilib

13.03.2023

Gəncə ŞBPİ-nin 4-cü Polis Bölməsinə martın 13-də saat 11 radələrində şəhər ərazisindəki mənzillərin birində Tovuz rayon sakini Y.Hümbətovanın öldürülməsi barədə məlumat daxil olub.Polis və prokurorluq orqanlarının əməkdaşları tərəfindən müvafiq tədbirlər həyata keçirilib. Araşdırmalarla Şəmkir rayon sakini, əvvəllər məhkum olunmuş E.Quliyevin kirayədə yaşadığı mənzildə münaqişə zəminində həyat yoldaşı Y.Hümbətovanı bıçaqla vurub öldürərək hadisə yerini tərk etməsinə əsaslı şübhələr müəyyən olunub. Gəncə Şəhər Baş Polis İdarəsi əməkdaşlarının keçirdikləri əməliyyat-axtarış tədbirləri nəticəsində E.Quliyev Hacıqabul rayonu ərazisində tutularaq istintaqa təhvil verilib. Faktla bağlı Cinayət Məcəlləsinin 120.1-ci maddəsi ilə cinayət işi başlanılıb.