Gün ərzində ölkə ərazisində qeydə alınan 94 cinayətin açılması təmin olunub

18.03.2023

Martın 18-də ölkə ərazisində qeydə alınan 94, əvvəlki dövrlərdən bağlı qalan 10 cinayətin açılması daxili işlər orqanlarının əməkdaşları tərəfindən təmin olunub.

Astara rayonunun Şiyəkəran kəndində həyat yoldaşını öldürməkdə, qayınanasına isə xəsarət yetirməkdə şübhəli bilinən F.Əliyev tutularaq istintaqa təhvil verilib

18.03.2023

Astara Rayon Polis Şöbəsinə martın 18-də saat 16 radələrində Şiyəkəran kəndində Ə.Ramazanovanın öldürülməsi, anası S.Ramazanovaya isə xəsarət yetirilməsi barədə məlumat daxil olub.Rayonun polis və prokurorluq orqanlarının əməkdaşları tərəfindən müvafiq tədbirlər həyata keçirilib. Araşdırmalarla F.Əliyevin yaşadığı evdə bıçaqla həyat yoldaşını öldürməsinə, qayınanasına isə xəsarət yetirməsinə  əsaslı şübhələr müəyyən olunub. F.Əliyev şübhəli şəxs qismində tutularaq istintaqa təhvil verilib. Faktla bağlı cinayət işi başlanılıb. 

Xəzər rayonunun Buzovna qəsəbə sakini R.Osmanova qarşı quldurluq etməkdə şübhəli bilinən Bakı şəhər sakini S.Şabiyev saxlanılıb

18.03.2023

Xəzər RPİ 2-ci Polis Şöbəsi əməkdaşlarının daxil olan məlumat əsasında keçirdikləri əməliyyat tədbiri nəticəsində martın 17-də Buzovna qəsəbəsi ərazisində qəsəbə sakini R.Osmanovu bıçaqla hədələyib quldurluq yolu ilə mobil telefonunu talamaqda şübhəli bilinən Bakı şəhər sakini, əvvəllər məhkum olunmuş S.Şabiyev saxlanılıb. Xəzər Rayon Polis İdarəsində araşdırma aparılır.

Bakı şəhər sakini A.Nazimlinin idarə etdiyi avtomobildən marixuana götürülüb

18.03.2023

Yasamal RPİ 29-cu Polis Şöbəsi əməkdaşlarının əldə olunan məlumat əsasında keçirdikləri əməliyyat tədbiri nəticəsində saxlanılan Bakı şəhər sakini A.Nazimlinin idarə etdiyi “Toyota” markalı avtomobilə baxış zamanı oradan 832 qramdan artıq marixuana aşkar olunaraq götürülüb.

Füzuli rayonunun Horadiz şəhəri ərazisində saxlanılan bir qrup şəxsdən narkotik vasitələr aşkar olunaraq götürülüb

18.03.2023

Füzuli Rayon Polis Şöbəsi və Dövlət Sərhəd Xidməti əməkdaşlarının əldə olunan məlumat əsasında birgə keçirdikləri əməliyyat tədbiri nəticəsində Bakı şəhər sakinləri N.Ələkbərov, Y.Şükürov və Ə.Qurbanov Horadiz şəhəri ərazisində saxlanılıblar. N.Ələkbərovdan 2 kiloqram 15 qram metamfetamin, 4 kiloqram 90 qram tiryək, 560 qram heroin, 4 kiloqram 180 qrama yaxın marixuana, Y.Şükürovdan isə 10 qramdan artıq marixuana aşkar olunaraq götürülüb.

Bakıda bankomatdan pul çıxaran qadınları izləyərək onlara qarşı soyğunçuluq edən şəxs saxlanılıb

18.03.2023

Paytaxtın Xətai rayonunda naməlum şəxs  bankomatlardan birindən pul çıxaran qadını izləyərək Yeni Günəşli qəsəbəsində ona qarşı soyğunçuluq etməyə cəhd göstərib. Zərərçəkən izahatında hadisə zamanı həmin şəxsin onun içərisində 3 min manat olan çantanı ələ keçirmək istədiyini amma yaranan səs-küy nəticəsində onun cinayəti sona çatdırmadan ərazidən uzaqlaşdığını bildirib. Bakı şəhər Baş Polis İdarəsi və Suraxanı Rayon Polis İdarəsinin 33-cü Polis Bölməsinin əməkdaşları tərəfindən “isti” izlərlə keçirilən əməliyyat- axtarış tədbirləri nəticəsində hadisəni törətməkdə şübhəli bilinən əvvəllər məhkum olunmuş Orxan İsgəndərov təkrar cinayət etmək məqsədilə “Əhmədli” metrosu yaxınlığındakı bankomatı müşahidə edərkən saxlanılıb. Bununla da onun növbəti dəfə cinayət hadisəsi törətməsinin qarşısı alınıb. Orxan İsgəndərovun paytaxt ərazisində başqa bu kimi cinayətlər törətdiyi istisna olunmur. Bu şəxsin qanunsuz əməllərindən zərərçəkən başqa vətəndaşlar varsa, ərazi polis orqanlarına, “102” Zəng Mərkəzinə və Nazirliyin sosial şəbəkələrdəki rəsmi səhifələrinə məlumat verə bilərlər.Faktla bağlı 33-cü Polis Bölməsində  toplanan materiallar araşdırmaların davam etdirilməsi üçün  Suraxanı Rayon Polis İdarəsinə göndərilib, əməliyyat-istintaq tədbirləri davam etdirilir.

Nizami rayonunda 3 nəfər silahlı şəxs saxlanılıb

18.03.2023

Nizami Rayon Polis İdarəsi, 24-cü Polis Şöbəsi və 23-cü Polis Bölməsinin əməkdaşları tərəfindən həyata keçirilən silsilə əməliyyatlar nəticəsində üzərində qanunsuz olaraq odlu silah-sursat saxlayan şəxslər saxlanılıblar. Tədbirlər zamanı Ramil Məmmədli, Eldəniz Əliyev və Ümid Qafarov tutularaq istintaqa təqdim ediliblər. Ramil Məmmədlinin üzərindən, eləcə də idarə etdiyi avtomobildən 1 ədəd “Kalaşnikov” markalı avtomat, 1 ədəd daraq, 12 ədəd patron, psixotrop maddə olan metamfetamin, Ümid Qafarovdan həmçinin 1 ədəd “Kalaşnikov” avtomatı,1 ədəd daraq, 9 ədəd patron, Eldəniz Əliyevdən isə “Brauning” markalı tapança və 2 ədəd patron aşkar olunub. Saxlanılan şəxslər odlu silah-sursatları bir müddət əvvəl əldə etdiklərini, lakin polisə təhvil verməyərək satmaq məqsədi ilə özlərində saxladıqlarını bildiriblər. Araşdırma zamanı saxlanılan şəxslərdən biri -  Ramil Məmmədlinin sosial şəbəkələrdə “Salamat Ramil” adı altında cinayətkarlığı təbliğ edən paylaşımlar etdiyi də məlum olub.Aşkar edilən faktlarla bağlı Nizami Rayon İdarəsinin İstintaq Şöbəsində araşdırmalar davam etdirilir.

Gün ərzində ölkə ərazisində qeydə alınan 90 cinayətin açılması təmin olunub

17.03.2023

Martın 17-də ölkə ərazisində qeydə alınan 90, əvvəlki dövrlərdən bağlı qalan 17 cinayətin açılması daxili işlər orqanlarının əməkdaşları tərəfindən təmin olunub.

Binəqədi rayonu M.Ə.Rəsulzadə qəsəbəsindəki evlərin birindən oğurluq etməkdə şübhəli bilinən şəxs saxlanılıb

17.03.2023

Binəqədi RPİ 4-cü Polis Şöbəsi əməkdaşlarının daxil olan məlumat əsasında keçirdikləri əməliyyat tədbirləri nəticəsində M.Ə.Rəsulzadə qəsəbəsindəki evlərin birindən 15.000 manat dəyərində qızıl-zinət əşyaları oğurlamaqda şübhəli bilinən Abşeron rayon sakini, əvvəllər məhkum olunmuş C.Abuzərov müəyyən olunaraq saxlanılıb. Araşdırma aparılır.

Narkotik vasitələrin qanunsuz dövriyyədən çıxarılması istiqamətində qətiyyətli mübarizə tədbirləri davam etdirilir

17.03.2023

Polis əməkdaşlarının martın 17-də respublika ərazisində keçirdikləri əməliyyat tədbirləri nəticəsində ümumi çəkisi 42 kiloqrama yaxın narkotik vasitə aşkar olunaraq götürülüb. Qanunsuz dövriyyədən çıxarılan narkotik vasitələr – 7,9 kiloqrama yaxın heroin, 28 kiloqramdan artıq marixuana, 4,9 kiloqramdan artıq tiryək, 1 kiloqramdan çox metamfetamin, 112 ədəd yüksək təsiredici xassəyə malik həblər olub.Bu istiqamətdə qətiyyətli mübarizə tədbirləri davam etdirilir