Binəqədi rayonu ərazisində üç həyətdən və bir avtomobildən oğurluq etməkdə şübhəli bilinən Bakı şəhər sakini M.Rəhimov saxlanılıb

14.04.2023

Binəqədi RPİ 43-cü Polis Bölməsi əməkdaşlarının daxil olan məlumatlar əsasında keçirdikləri əməliyyat tədbiri nəticəsində müxtəlif vaxtlarda rayon ərazisində üç həyətdən su qızdırıcısı, kombi aparatı, naqil, bir avtomobildən 2 ədəd səsgücləndirici oğurlamaqda şübhəli bilinən Bakı şəhər sakini əvvəllər məhkum olunmuş M.Rəhimov saxlanılıb. Araşdırma aparılır.

Qaradağ rayonunun Lökbatan qəsəbəsindəki evlərin birindən tikinti materialları oğurlamaqda şübhəli bilinən şəxslər saxlanılıblar

14.04.2023

Qaradağ RPİ 10-cu Polis Bölməsi əməkdaşlarının daxil olan məlumat əsasında keçirdikləri əməliyyat tədbiri nəticəsində Lökbatan qəsəbəsindəki evlərin birindən 2000 manat dəyərində tikinti materialları oğurlamaqda şübhəli bilinən Bakı şəhər sakini E.Nəsirov və Yardımlı rayon sakini Y.Nurlu saxlanılıblar. Araşdırma aparılır.  

Nəsimi rayonunun S.Vurğun küçəsində “Mercedes” markalı avtomobillə iki piyada vurulub

14.04.2023

Aprelin 14-də Nəsimi rayonunun S.Vurğun küçəsində İmişli rayon sakini S.Məmmədzadə idarə etdiyi “Mercedes” markalı avtomobillə yolu keçən Bakı şəhər sakini M.Tağıyevanı və Zəngilan rayon sakini A.Süleymanlını vurub. Nəticədə hər iki piyada xəstəxanaya yerləşdirilib, M.Tağıyeva orada ölüb.Nəsimi Rayon Polis İdarəsində araşdırma aparılır. 

Laçın rayonunun Zabux kəndi ərazisində "Shacman" markalı avtomobil aşıb

14.04.2023

Aprelin 14-də saat 18 radələrində Laçın rayonunun Zabux kəndi ərazisində Bakı şəhər sakini S.Zülfüqarov idarə etdiyi “Shacman” markalı avtomobili aşırıb və nəticədə sürücü hadisə yerində ölüb.Laçın Rayon Polis Şöbəsində araşdırma aparılır.

Su polisləri İrandan göndərilən avtomat və narkotiki qanunsuz dövriyyəyə buraxmağa çalışan şəxsi saxlayıb

14.04.2023

Daxili İşlər Nazirliyi Su Nəqliyyatında Polis İdarəsinin əməkdaşları tərəfindən İran İslam Respublikasından ölkəmizə qeyri-leqal yollarla göndərilən “Kalaşnikov” avtomatı və narkotik maddələrin qanunsuz dövriyyəyə buraxılmasının qarşının alınması istiqamətində əməliyyat həyata keçirilib.Belə ki, İdarəyə xidməti ərazi olan Qaradağ rayonunda dəniz kənarında bir nəfərin şəxsiyyəti istintaqla araşdırılan İran vətəndaşı ilə əlaqə yaradaraq onun ölkəyə göndərdiyi silah və narkotikləri qəbul edəcəyi barədə əməliyyat məlumatı daxil olub. Dərhal qeyd edilən ərazi su polisləri tərəfindən nəzarətə götürülüb. Həmin şəxs İran vətəndaşının ona göndərdiyi bağlamanı götürüb ərazidən uzaqlaşmaq istəyən zaman su polisləri tərəfindən saxlanılır.Araşdırmalar zamanı onun paytaxt sakini Orxan Əzizəliyev olduğu müəyyən edilib və o, vaxtı ilə özəl mühafizə şirkətlərindən birinin əməkdaşı olub. Orxan Əzizəliyevin əlindəki bağlamaya baxış zamanı 1 ədəd “Kalaşnikov” markalı avtomat, 2 ədəd parton darağı, 60 ədəd patron və külli miqdarda psixotrop maddə metamfetamin aşkar edilib. Faktla bağlı Su Nəqliyyatında Polis İdarəsində Cinayət Məcəlləsinin müvafiq maddələri ilə cinayət işi başlanılıb, istintaq və əməliyyat tədbirləri davam etdirilir. Qeyd edək ki, balıqovlama mövsümünün başa çatması ilə əlaqədar olaraq Su Nəqliyyatında Polis İdarəsinin əməkdaşları tərəfindən həmçinin brokonyerliklə, Xəzər dənizinə nəsil artımı üçün buraxılan körpə nərə cinsli balıqların və adı “Qırmızı Kitab”a düşən quşların ovlanması ilə məşğul olan şəxslərin də müəyyən edilərək məsuliyyətə cəlb edilmələri, eləcə də dənizin dibi ilə çəkilən dəmir boru kəmərlərini qanunsuz olaraq kəsib satışını təşkil edənlərə qarşı mübarizə tədbirləri daha da gücləndirilib. Araşdırma zamanı müəyyən edilib ki, körpə cinsli nərə balıqların qanunsuz ovlanması paytaxt, eləcə də bölgələrdə fəaliyyət göstərən bir neçə kafe və restoran sahibləri tərəfindən sifariş edilir. Həmin ictimai iaşə obyektlərinin sahiblərinə xəbərdarlıq edilərək bildirilir ki, onlar barəsində Su Nəqliyyatında Polis İdarəsinin əməkdaşları tərəfindən digər müvafiq dövlət orqanları ilə birgə qanununauyğun ciddi tədbirlər görüləcək.Sonda vətəndaşlardan Xəzər dənizində və su hövzələrində hər hansı bir qanun pozuntusu ilə rastlaşdıqları halda Su Nəqliyyatında Polis İdarəsinin 012-433-38-12 və 012-433-38-02 nömrələrinə zəng edərək məlumat vermələri xahiş olunur.

Gün ərzində ölkə ərazisində qeydə alınan 77 cinayətin açılması təmin olunub

13.04.2023

Aprelin 13-də ölkə ərazisində qeydə alınan 77, əvvəlki dövrlərdən bağlı qalan 12 cinayətin açılması daxili işlər orqanlarının əməkdaşları tərəfindən təmin olunub.

Dəmir yollarınndan dəyiri 10 min manat olan 6 ədəd drossel-tansformatorlar oğurlayan şəxslər saxlanılıblar

13.04.2023

Dəmir yolları xəttinin Qaradağ rayonu Səngəçal-Qobustan mənzilinin 67-ci kilometrliyində quraşdırılan ümumilikdə 6 ədəd drossel-transformatorlar naməlum şəraitdə oğurlanıb. Hadisə barədə məlumat daxil olan kimi Dəmiryolu Nəqliyyatında Polis İdarəsinin və Biləcəri Xətt Polis Şöbəsinin əməkdaşları tərəfindən təxirəsalınmaz əməliyyat-axtarış tədbirləri həyata keçirilib. Nəticədə hadisəni törətməkdə şübhəli bilinən 3 nəfər – əvvəllər məhkum olunmuş Böyükağa Hüseynov, onun qohumları Elçin Ağayev və Şükür Salmanov növbəti dəfə transformatorları oğurlamaq istəyən zaman Qobustan qəsəbəsi ərazisində maddi sübutlarla birlikdə saxlanılıblar. Onlardan oğurladıqları transformatorların bir hissəsi və hadisə zamanı istifadə etdikləri avadanlıqlar aşkar edilərək götürülüb. Saxlanılan şəxslər ifadələrində digər transformatorları hissələrə ayıraraq Səbail rayonu Bayıl qəsəbəsində yerləşən əlvan metal qəbulu məntəqələrindən birinə satdıqlarını bildiriblər.Qeyd edək ki, dəstə üzvlərinin oğurladıqları drossel-transformatorları dəmir yollarında qatarların hərəkətinin nizamlanması zamanı istifadə edilən işıqforların fəaliyyətini tənzimləyən  əsəs elektrik qidalandırıcıdır. Bu hadisə nəticəsində dəstə üzvləri dəmir yolları təsərrüfatına 10 min manata yaxın maddi ziyan vurublar. Faktla bağlı Dəmiryolu Nəqliyyatında Polis İdarəsinin Biləcəri Xətt Polis Şöbəsində araşdırmalar davam etdirilir.

Daxili İşlər Nazirliyinin Baş İctimai Təhlükəsizlik İdarəsinin əməkdaşları tərəfindən sanitariya-gigiyena qaydalarının pozulması hallarının qarşısının alınması məqsədilə tədbirlər davam etdirilir

13.04.2023

Daxili İşlər Nazirliyinin Baş İctimai Təhlükəsizlik İdarəsinin əməkdaşları tərəfindən sanitariya-gigiyena qaydalarının pozulması hallarının qarşısının alınması məqsədilə tədbirlər davam etdirilir.Aprelin 13-də Neftçala rayonunun ərazisində keçirilən belə tədbir zamanı sənaye və məişət tullantılarının qalaqlanması və yandırılması zamanı ətraf mühitin mühafizəsi tələblərinə əməl edilməməsi faktı aşkar olunub.İnzibati Xətalar Məcəlləsinin 271-ci (sənaye və məişət tullantılarının qalaqlanması və yandırılması zamanı ətraf mühitin mühafizəsi tələblərinə əməl edilməməsi) maddəsinin tələblərini pozduğuna görə rayon ərazisində fəaliyyət göstərən marketlər şəbəkələrindən birinin bölgə müdiri İ.Rəcəbov və Aşağı Muğan Meliorativ Sistemlərin İstismarı İdarəsi barəsində protokollar tərtib olunub.Bu istiqamətdə tədbirlər davam etdirilir.

Cəlilabad rayonunun Gülməmmədli kəndi ərazisində yol-nəqliyyat hadisəsi baş vermişdir

13.04.2023

Aprelin 13-də saat 16 radələrində Cəlilabad rayonunun Gülməmmədli kəndi ərazisində rayon sakinləri M.Sadıqovun idarə etdiyi  “VAZ-2107” markalı  və F.Nəsirovun idarə etdiyi “QAZ-2705” markalı avtomobillər toqquşub. Nəticədə M.Sadıqovun sərnişini P.Səfərov hadisə yerində ölüb, özü və digər sürücü xəstəxanaya yerləşdiriliblər.Cəlilabad Rayon Polis Şöbəsində araşdırma aparılır.

Şabran rayon sakini R.Həsənov Astara dəmir yolu stansiyası ərazisində saxlanılıb və marixuana aşkar olunaraq götürülüb

13.04.2023

NBPİ-nin Dəmir Yolu Nəqliyyatında Polis İdarəsi əməkdaşlarının əldə olunan məlumat əsasında keçirdikləri əməliyyat tədbiri nəticəsində Şabran rayon sakini, əvvəllər  məhkum olunmuş  R.Həsənov  Astara dəmir yolu stansiyası ərazisində saxlanılıb. Şəxsi axtarış zamanı ondan 465 qram marixuana aşkar olunaraq götürülüb.Araşdırma aparılır.