Nəsimi rayonunda “Behzat” adlı iranlı narkotacirin şəbəkəsinə daxil olan şəxsdən 3 kiloqram heroin və tiryək götürülüb 

12.06.2023

Nəsimi rayonunda narkotik vasitələrin satışını təşkil edən daha bir şəxs saxlanılıb. Rayon Polis İdarəsinin əməkdaşları tərəfindən keçirilən əməliyyat zamanı narkotik vasitələrin satışı ilə məşğul olan əvvəllər dəfələrlə məhkum olunmuş Elnur Ələkbərov saxlanılaraq istintaqa təqdim edilib. Onun üzərinə baxış zamanı əlindəki çantadan ümumilikdə 3 kiloqram yüksək təsiredici narkotik vasitələr hesab edilən heroin və tiryək aşkar edilib. Araşdırma nəticəsində müəyyən edilib ki, Elnur Ələkbərov şəxsiyyəti istintaqla araşdırılan “Behzat” adlı İran vətəndaşı ilə sosial şəbəkələr vasitəsilə əlaqə yaradaraq onun ölkə ərazisinə müxtəlif qanunsuz yollarla göndərdiyi narkotikləri satmaq niyyəti ilə qəbul edib. Faktla bağlı Nəsimi Rayon Polis İdarəsində Cinayət Məcəlləsinin müvafiq maddəsi ilə cinayət işi başlanılıb. Elnur Ələkbərov barəsində məhkəmənin qərarı ilə həbs qətimkan tədbiri seçilib. Nəsimi rayonu ərazisində narkotiklərin qanunsuz dövriyyəsinin qarşısının alınması məqsədilə polis əməkdaşları tərəfindən mübarizə tədbirləri qətiyyətlə davam etdirilir.

Gün ərzində ölkə ərazisində qeydə alınan 41 cinayətin açılması təmin olunub

11.06.2023

İyunun 11-də ölkə ərazisində qeydə alınan 41, əvvəlki dövrlərdən bağlı qalan 7 cinayətin açılması daxili işlər orqanlarının əməkdaşları tərəfindən təmin olunub.

Sanitariya-gigiyena qaydalarının təmin olunması istiqamətində tədbirlər davam etdirilir 

11.06.2023

Daxili İşlər Nazirliyinin Baş İctimai Təhlükəsizlik İdarəsi əməkdaşlarının sanitariya-gigiyena qaydalarının pozulması hallarının qarşısının alınması məqsədilə iyunun 9-da İsmayıllı rayonu ərazisində keçirdikləri tədbirlər zamanı Qaraqaya kəndi ərazisində qanunsuz kömür istehsalı faktları aşkar olunub. Qanunsuz kömür istehsalı ilə məşğul olduqlarına və İnzibati Xətalar Məcəlləsinin 275.1.1-ci maddəsinin (dövlət ekoloji ekspertizanın müsbət rəyi olmadan ətraf mühitə bilavasitə və ya dolayı yolla mənfi təsir göstərən, habelə dövlət ekoloji ekspertizanın rəyi ekoloji təhlükəsi müəyyən edilən təsərrüfat və ya sair fəaliyyətin həyata keçirilməsi) tələblərini pozduqlarına görə rayon sakinləri D.Nuriyev, F.Dəmirov, A.Hüseynli, F.Hüseynov və P.Hüseynov barəsində inzibati tənbeh tədbiri tətbiq olunub.  Bu istiqamətdə tədbirlər davam etdirilir.  

Nizami rayonu ərazisində yerləşən apteklərin birində quldurluq törətməkdə şübhəli bilinən Bakı şəhər sakinləri T.Quluzadə və A.Cavadlı saxlanılıblar

11.06.2023

İyunun 9-da gecə saatlarında Nizami rayonu ərazisində yerləşən apteklərin birində tibbi maskalı 2 nəfərin satıcını bıçaqla hədələyib kassadan 300 manat pul talamaları barədə polisə məlumat daxil olub. Bakı Şəhər Baş Polis İdarəsi və Nizami RPİ 24-cü Polis Şöbəsi əməkdaşlarının birgə keçirdikləri əməliyyat tədbiri nəticəsində quldurluq əməlini törətməkdə şübhəli bilinən Bakı şəhər sakinləri T.Quluzadə və A.Cavadlı müəyyən olunaraq saxlanılıblar. Araşdırma aparılır. 

Xırdalan şəhəri ərazisində bir mağazadan 3 ədəd mobil telefon oğurlamaqda şübhəli bilinən şəhər sakini R.Hüseynov saxlanılıb

11.06.2023

Abşeron Rayon Polis İdarəsi əməkdaşlarının daxil olan məlumat əsasında keçirdikləri əməliyyat tədbiri nəticəsində iyunun 6-da gecə saatlarında Xırdalan şəhəri ərazisində bir mağazadan 5800 manat dəyərində 3 ədəd mobil telefon oğurlamaqda şübhəli bilinən şəhər sakini R.Hüseynov müəyyən olunaraq saxlanılıb. Araşdırma aparılır.

Yasamal rayonu M.Həsənov küçəsində yerləşən mağazada satıcının cüzdanını soyğunçuluq yolu ilə talamaqda şübhəli bilinən Sumqayıt şəhər sakini R.Bayramov saxlanılıb

11.06.2023

İyunun 11-də Yasamal rayonu M.Həsənov küçəsində yerləşən mağazada bir nəfərin satıcının  içərisində pulu, sənəd və bank kartları olan cüzdanını  soyğunçuluq yolu ilə talaması barədə polisə məlumat daxil olub.  Yasamal RPİ 29-cu Polis Şöbəsi əməkdaşlarının keçirdikləri əməliyyat tədbiri nəticəsində soyğunçuluq əməlində şübhəli bilinən Sumqayıt şəhər sakini, əvvəllər də oğurluq və soyğunçuluğa görə məhkum olunmuş R.Bayramov müəyyən olunaraq saxlanılıb. Yasamal Rayon Polis İdarəsində araşdırma aparılır. 

Yevlax rayon sakini Z.Babayevdən 439 qrama yaxın marixuana götürülüb

11.06.2023

Mingəçevir Şəhər Polis İdarəsi əməkdaşlarının əldə olunan məlumat əsasında keçirdikləri əməliyyat tədbiri nəticəsində saxlanılan Yevlax rayon sakini əvvəllər məhkum olunmuş Z.Babayevdən 439 qrama yaxın marixuana aşkar olunaraq götürülüb. Araşdırma aparılır.

Suraxanı rayonunun Hövsan qəsəbəsi ərazisində “Nissan” markalı avtomobillə paytaxt sakini H.Rəhmanova vurulub

11.06.2023

İyunun 11-də saat 21 radələrində Suraxanı rayonunun Hövsan qəsəbəsi ərazisində Bakı şəhər sakini F.İsgəndərov idarə etdiyi “Nissan” markalı avtomobillə yolu keçən paytaxt sakini H.Rəhmanovanı vurub. Nəticədə xəstəxanaya yerləşdirilən piyada orada ölüb.Suraxanı Rayon Polis İdarəsində araşdırma aparılır.

Füzuli rayonunun Fin qəsəbəsi ərazisində “VAZ-21074” markalı avtomobillə piyada vurulub

11.06.2023

İyunun 11-də saat 9 radələrində Füzuli rayonunun Fin qəsəbəsi ərazisində rayon sakini B.Quliyev idarə etdiyi “VAZ-21074” markalı avtomobillə yolu keçən Y.İmanovanı vurub. Nəticədə xəstəxanaya yerləşdirilən piyada orada ölüb.Füzuli Rayon Polis Şöbəsində araşdırma aparılır.

Şamaxı rayonunun Çöl Göylər kəndi ərazisində “Ford-Transit” markalı avtomobili aşıb

11.06.2023

İyunun 11-də saat 18 radələrində Şamaxı rayonunun Çöl Göylər kəndi ərazisində rayon sakini C.Feyzullayev idarə etdiyi “Ford-Transit” markalı avtomobili aşırıb və nəticədə sürücü hadisə yerində ölüb.Şamaxı Rayon Polis Şöbəsində araşdırma aparılır.