Gün ərzində ölkə ərazisində qeydə alınan 48 cinayətin açılması təmin olunub

06.12.2022

Dekabrın 6-da ölkə ərazisində qeydə alınan 48, əvvəlki dövrlərdən bağlı qalan 16 cinayətin açılması daxili işlər orqanlarının əməkdaşları tərəfindən təmin olunub.

Gədəbəy rayonunun Şəkərbəy kənd sakini K.Abdullayevanı öldürməkdə şübhəli bilinən əri E.Abdullayev tutularaq istintaqa təhvil verilib

06.12.2022

Gədəbəy Rayon Polis Şöbəsinə Şəkərbəy kəndində K.Abdullayevanın öldürülməsi barədə məlumat daxil olub.Rayonun polis və prokurorluq orqanlarının əməkdaşları tərəfindən müvafiq tədbirlər həyata keçirilib. Araşdırmalarla əri E.Abdullayevin ailə münaqişəsi zəminində evin həyətində olan yardımçı təsərrüfatda həyat yoldaşına küt alətlə xəsarətlər yetirərək qəsdən öldürməsinə əsaslı şübhələr müəyyən edilib.Polis əməkdaşlarının keçirdikləri əməliyyat-axtarış tədbirləri nəticəsində E.Abdullayev tutularaq istintaqa təhvil verilib. Faktla əlaqədar Cinayət Məcəlləsinin 120-ci (Qəsdən adam öldürmə) maddəsi ilə cinayət işi başlanılıb.

Quldurluq əməlində şübhəli bilinən Bakı şəhər sakini E.Tağıyev müəyyən olunaraq saxlanılıb

06.12.2022

Dekabrın 6-da saat 12 radələrində Sabunçu qəsəbəsi ərazisində “Toyota” markalı bir avtomobildə sərnişinin sürücünü bıçaqla hədələyərək 30 manatını talaması barədə polisə məlumat daxil olub. Sabunçu RPİ 12-ci Polis Şöbəsi əməkdaşlarının keçirdikləri əməliyyat tədbirləri nəticəsində quldurluq əməlində şübhəli bilinən Bakı şəhər sakini E.Tağıyev müəyyən olunaraq saxlanılıb. Sabunçu Rayon Polis İdarəsində araşdırma aparılır.  

Piyadanın ölümü ilə nəticələnən yol qəzası törədərək hadisə yerindən yayınan sürücü saxlanılıb 

06.12.2022

Dekabrın 5-də saat 23 radələrində Sumqayıt şəhəri ərazisində yolu keçən şəhər sakini Z.Mürsəlova müəyyən edilməyən avtomobillə vurulub və o, hadisə yerində ölüb.Baş Dövlət Yol Polisi İdarəsi əməkdaşlarının keçirdikləri əməliyyat tədbirləri nəticəsində yol-nəqliyyat hadisəsinin “Volvo” markalı yük avtomobili ilə törədilməsi müəyyən olunub və həmin avtomobilin sürücüsü, Masallı rayon sakini S.Məlikov saxlanılılıb.Araşdırma aparılır.

Oğurluq əməlində şübhəli bilinən Bakı şəhər sakini O.Süleymanov müəyyən olunaraq saxlanılıb

06.12.2022

Bakı şəhər sakini S.Səlimovun bank hesabından 1100 manatının qeyri-aşkar şəraitdə oğurlanması barədə polisə məlumat daxil olub. Səbail RPİ 9-cu Polis Bölməsi əməkdaşlarının keçirdikləri əməliyyat tədbirləri nəticəsində oğurluq əməlində şübhəli bilinən Bakı şəhər sakini O.Süleymanov müəyyən olunaraq saxlanılıb. Araşdırma aparılır. 

Bakı şəhər sakini C.Mirbağırovun idarə etdiyi avtomobilə baxış zamanı oradan tüfəng və 1 ədəd patron aşkar olunaraq götürülüb

06.12.2022

Sabunçu RPİ 42-ci Polis Bölməsi əməkdaşlarının daxil olan məlumat əsasında keçirdikləri əməliyyat tədbiri nəticəsində Bakı şəhər sakini C.Mirbağırovun idarə etdiyi “Nissan” markalı avtomobilə baxış zamanı oradan “TOZ-8” markalı tüfəng və 1 ədəd patron aşkar olunaraq götürülüb. Araşdırma aparılır. 

Dələduzluqda şübhəli bilinən Astara rayon sakini R.Fətəliyev müəyyən olunaraq saxlanılıb

06.12.2022

Dekabrın 6-da saat 21 radələrində Qaradağ rayonunun Lökbatan qəsəbəsi ərazisində yerləşən kənd təsərrüfatı bazarında 3 nəfərin ümumilikdə 520 manatının dələduzluq yolu ilə alınması barədə polisə məlumat daxil olub. Qaradağ Rayon Mühafizə İdarəsinin əməkdaşları tərəfindən görülmüş tədbirlərlə bu əməli törətməkdə şübhəli bilinən Astara rayon sakini R.Fətəliyev müəyyən olunaraq saxlanılıb və 10-cu Polis Bölməsinə təhvil verilib.Araşdırma aparılır. 

Oğurluq etdiyinə görə tutulan E.Əlimuradovun və H.İsmayılovun etdikləri digər cinayət əməli də müəyyən edilib

06.12.2022

Binəqədi RPİ 5-ci Polis Bölməsinin əməkdaşları tərəfindən aparılan araşdırmalarla oğurluq etdiyinə görə tutulan E.Əlimuradovun və H.İsmayılovun daha bir mağazadan 950 manat pul və 8000 manat dəyərində geyim əşyaları oğurlamaları da müəyyən olunub. 

Ağsu rayonunun Çiyni kənd sakini Q.Məmmədovdan qanunsuz saxladığı ov tüfəngi götürülüb

06.12.2022

Ağsu Rayon Polis Şöbəsi əməkdaşlarının keçirdikləri əməliyyat tədbiri nəticəsində Çiyni kənd sakini Q.Məmmədovdan qanunsuz saxladığı “BUM” markalı ov tüfəngi götürülüb.

Ov edən Şamaxı rayon sakini R.Əhmədovun tüfəngdən açdığı atəşdən İ.İlyasovun kürək nahiyəsindən xəsarət alması müəyyən olunub

06.12.2022

Dekabrın 5-də saat 22 radələrində Şamaxı rayonunun Pirqulu qəsəbəsi ərazisində bir nəfərin odlu silahdan açılan atəş nəticəsində xəsarət alması barədə polisə məlumat daxil olub.Şamaxı Rayon Polis Şöbəsinin əməkdaşları tərəfindən aparılan araşdırmalarla həmin vaxt ov edən rayon sakini R.Əhmədovun tüfəngdən açdığı atəşdən İ.İlyasovun kürək nahiyəsindən xəsarət alması müəyyən olunub.  Ona xəstəxanada ilkin tibbi yardım göstərildikdən sonra buraxılıb.R.Əhmədov polis əməkdaşları tərəfindən saxlanılıb, ondan müvafiq sənədləri olan “Baykal” markalı ov tüfəngi götürülüb.Araşdırma aparılır.