Koronavirus xəstələri ictimai yerlərdə aşkar edilərək saxlanılıb 

31.12.2021

Dekabrın 31-də polis əməkdaşları tərəfindən respublika ərazisində 2 nəfər aktiv koronavirus xəstəsi ictimai yerlərdə aşkar edilərək saxlanılıb. Polis əməkdaşları "COVİD-19" virusuna yoluxaraq ev şəraitində müalicədə olmasına baxmayaraq yaşadığı evi tərk etmiş həmin şəxslərlə izahedici söhbətlər aparıb, tibbi prosedurları gözləməklə yaşadığı evlərə qaytarıb və bu barədə müvafiq səhiyyə qurumları məlumatlandırılıb.

Qanunsuz saxlanılan silah-sursatla bağlı əməliyyat tədbirləri davam etdirilir

31.12.2021

Polis əməkdaşlarının əldə edilən məlumatlar əsasında keçiridikləri əməliyyat tədbirləri nəticəsində dekabrın 31-də respublikanın ayrı-ayrı rayonlarında vətəndaşlardan qanunsuz saxladıqları müxtəlif markalı ümumilikdə 3 ədəd ov tüfəngi aşkar edilərək götürülüb.  Faktlar üzrə polis şöbələrində müvafiq araşdırmalar aparılır.

Bakı şəhər sakini Fikrət Hüseynovu qətlə yetirməkdə şübhəli bilinən C.Atəşzadə tutularaq istintaqa təhvil verilmişdir

31.12.2021

Binəqədi RPİ-nin 7-ci Polis Bölməsinə dekabrın 31-də saat 22 radələrində Mircəlal küçəsində yerləşən çay evlərinin birində Bakı şəhər sakini Fikrət Hüseynovun öldürülməsi barədə məlumat daxil olmuşdur. Dərhal rayonun polis və prokurorluq orqanları tərəfindən müvafiq tədbirlər həyata keçirilmişdir.  Təxirəsalınmaz istintaq-əməliyyat tədbirləri ilə Bakı şəhər sakini C.Atəşzadənin münaqişə zəminində F.Hüseynovu kürək nahiyəsindən bıçaqla vuraraq qətlə yetirməsinə əsaslı şübhələr müəyyən edilmişdir. Polis əməkdaşlarının keçirdikləri əməliyyat-axtarış tədbirləri nəticəsində C.Atəşzadə şübhəli şəxs qismində tutularaq istintaqa təhvil verilmişdir. Faktla bağlı cinayət işi başlanılmışdır. 

Şahmar Balayevi qətlə yetirməkdə şübhəli bilinən Bakı şəhər sakini A.Nəcəfov tutularaq istintaqa təhvil verilmişdir

31.12.2021

Nəsimi RPİ-nin 20-ci Polis Bölməsinə dekabrın 31-də saat 16 radələrində 32 yaşlı Şahmar Balayevin bədən nahiyəsində bıçaq xəsarətləri olan meyitinin yaşadığı evin zirzəmisində tapılması barədə məlumat daxil olmuşdur. Dərhal rayonun polis və prokurorluq orqanları tərəfindən müvafiq tədbirlər həyata keçirilmişdir.  Təxirəsalınmaz istintaq-əməliyyat tədbirləri ilə bu əməlin münaqişə zəminində Bakı şəhər sakini, əvvəllər məhkum olunmuş A.Nəcəfov tərəfindən törədilməsinə əsaslı şübhələr müəyyən edilmişdir. Polis əməkdaşlarının keçirdikləri əməliyyat-axtarış tədbirləri nəticəsində A.Nəcəfov tutularaq istintaqa təhvil verilmişdir. Faktla bağlı Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılmışdır. 

Dəmir dirəklər və naqil oğurlamaqda şübhəli bilinən Bakı şəhər sakinləri E.İbrahimov, İ.Osmanov və E.Mehdiyev müəyyən edilərək saxlanılmışlar

31.12.2021

Binəqədi RPİ 4-cü Polis Şöbəsi əməkdaşlarının keçirdikləri əməliyyat-axtarış tədbirləri nəticəsində rayon ərazisində şirkətlərdən birinin deposundan 5000 manat dəyərində dəmir profillər və 4150 manat dəyərində dəmir dirəklər və naqil oğurlamaqda şübhəli bilinən Bakı şəhər sakinləri, əvvəllər məhkum olunmuşlar E.İbrahimov, İ.Osmanov və E.Mehdiyev müəyyən edilərək saxlanılmışlar. Araşdırma aparılır. 

Sumqayıt şəhər sakini M.Cəfərovdan heroin, marixuana, metamfetamin, həmçinin “Baikat” markalı tapança və 1 ədəd beşbarmaq aşkar edilərək götürülmüşdür

31.12.2021

Sumqayıt Şəhər Polis İdarəsi əməkdaşlarının daxil olmuş məlumat əsasında keçirdikləri əməliyyat tədbiri nəticəsində şəhər sakini, əvvəllər məhkum olunmuş M.Cəfərov saxlanılmışdır. Şəxsi axtarış zamanı ondan heroin, marixuana, metamfetamin, həmçinin “Baikat” markalı tapança və 1 ədəd beşbarmaq aşkar edilərək götürülmüşdür.

Oğurluq etməkdə şübhəli bilinən Salyan rayon sakini F.Nəcəfov müəyyən edilərək saxlanılmışdır

31.12.2021

Hacıqabul Rayon Polis Şöbəsinə dekabrın 27-də şəhər sakini S.Ağayevanın bank hesabından 367 manat pulunun oğurlanması barədə məlumat daxil olmuşdur. Polis əməkdaşlarının keçirdikləri əməliyyat-axtarış tədbirləri nəticəsdində oğurluq əməlini törətməkdə şübhəli bilinən Salyan rayon sakini, əvvəllər məhkum olunmuş F.Nəcəfov müəyyən edilərək saxlanılmışdır. Araşdırma aparılır. 

Oğurluqda şübhəli bilinən Biləsuvar rayon sakini A.Ağarzalı və Ağdam rayon sakinləri A.Mustafayev və Ş.Əhmədov saxlanılmışlar

31.12.2021

Bakı şəhər Baş Polis İdarəsi və Xəzər RPİ-nin 2-ci Polis Şöbəsi əməkdaşlarının birgə keçirdikləri əməliyyat tədbirləri nəticəsində rayon ərazisində T.Nadirova məxsus torpaq sahəsindən 1440 metr armatur, 4 evdən kombi, radiator, velosiped, televizor, naqil, təmir-tikinti alətləri və kamera yaddaş bloku oğurlamaqda şübhəli bilinən Biləsuvar rayon sakini A.Ağarzalı və Ağdam rayon sakinləri, əvvəllər məhkum olunmuşlar A.Mustafayev və Ş.Əhmədov saxlanılmışlar. Araşdırma aparılır. 

Sabirabad rayonunun Nərimankənd kəndi ərazisində yol-nəqliyyat hadisəsi

31.12.2021

Dekabrın 31-də saat 17 radələrində Sabirabad rayonunun Nərimankənd kəndi ərazisində rayon sakini Qəhrəman İsgəndərov idarə etdiyi “VAZ-2106” markalı avtomobili yolun kənarındakı qaz borusuna vurmuş və nəticədə hadisə yerində ölmüşdür.Sabirabad RPŞ-də araşdırma aparılır.

Pirotexniki vasitələrin topdan satışını həyata keçirən şəxslərin saxlanılması istiqamətində paytaxt və bölgələrdə eyni anda əməliyyatlar keçirilib

31.12.2021

Polis əməkdaşları tərəfindən partlayıcı, tezalışan maddələrin, pirotexniki vasitələrin paytaxt ərazisində topdan satışının qarşısının alınması istiqamətində ölkəboyu daha bir genişmiqyaslı əməliyyat keçirilib.Belə ki, bir qrup şəxsin külli miqdarda pirotexniki vasitələri qaçaqmalçılıq yolu ilə ölkə ərazisinə gətirərək “Sədərək” Ticarət mərkəzində və digər ərazilərdə gizli şəkildə topdansatışını təşkil etmələri barədə daxili işlər orqanlarına əməliyyat məlumatı daxil olub. Həmin şəxslərin əhatə dairəsi və əlaqələri qısa zamanda dəqiqləşdirilib. Paytaxtın Xəzər, Qaradağ, eləcə də Ağstafa və Qazax rayonlarında həyata keçirilən əməliyyatlar zamanı mütəşəkkil dəstənin başçısı Elçin Kazımov, üzvləri Şəmməd Şəmmədov, Anar Süleymanov və pirotexniki vasitələrin satışını təşkil edən Camal Əliyevlə qardaşı Cavad saxlanılıblar. Bu şəxslərin ticarət mərkəzində yerləşən obyektlərinə, avtomobillərinə, həmçinin Ağstafa və Xəzər rayonunda yerləşən anbar kimi istifadə etdikləri saxlanc yerlərinə qanunvericiliklə nəzərdə tutulmuş qaydada baxış keçirilən zaman ölkə ərazisinə qaçaqmalçılıq yolu ilə gətirdikləri külli miqdarda pirotexniki vasitələr aşkar edilib. Qeyd edək ki, dəstə üzvləri paytaxt və ölkə ərazisinə bu maddələrin paylanılmasını, həmçinin satışını təşkil edən əsas şəxslər olublar. Onlar ifadələrində pirotexniki vasitələri qaçaqmalçılıq yolu ilə ölkə ərazisinə gətirərək satışı ilə məşğul olduqlarını etiraf ediblər. Faktla bağlı dəstə üzvləri barəsində Cinayət Məcəlləsinin müvafiq maddəsi ilə cinayət işi başlanılıb, Onlar barəsində məhkəmənin qərarı ilə həbs qətimkan tədbiri seçilib. Bu istiqamətdə tədbirlər davam etdirilir. Saxlanılan şəxslərdən aşkar olunan pirotexniki vasitələrin qara bazarda satış qiyməti 150 min manatdan artıq olub. Xatırladaq ki, tezalışan maddələr və pirotexniki vasitələrdən istifadə bayram əhval-ruhiyyəsinin, rahatlığının pozulması ilə nəticələnməklə yanaşı, insanların sağlamlığına və ətraf mühitə qarşı da ciddi təhlükədir. Xüsusən də uşaqların əyləncə məqsədi ilə istifadə etdikləri bu vasitələr onlarda ağır göz yaralanmalarına, qalıcı eşitmə qüsurlarına, müxtəlif dərəcəli yanıqlara yol aça bilər.