Suraxanı rayonunun Hövsan qəsəbəsi ərazisində “KİA” markalı avtomobil və moped toqquşmuşdur

28.02.2022

Fevralın 28-də saat 14 radələrində Suraxanı rayonunun Hövsan qəsəbəsi ərazisində K.Babayevin idarə etdiyi “KİA” markalı avtomobil və Eldar Məmmədovun idarə etdiyi moped toqquşmuşdur. Nəticədə E.Məmmədov hadisə yerində ölmüşdür. Suraxanı RPİ-də araşdırma aparılır.

Sumqayıt şəhəri ərazisində “Shacman” markalı yük avtomobili ilə “Mercedes” markalı mikroavtobus toqquşmuşdur

28.02.2022

Fevralın 28-də saat 20 radələrində Sumqayıt şəhərinin H.Z.Tağıyev qəsəbəsi ərazisində T.Yusifovun idarə etdiyi “Shacman” markalı yük avtomobili ilə Əliş Abışovun idarə etdiyi “Mercedes” markalı mikroavtobus toqquşmuşdur. Nəticədə Ə.Abışov hadisə yerində ölmüş, 4 sərnişini isə xəstəxanaya yerləşdirilmişdir.Sumqayıt ŞPİ-də araşdırma aparılır.

Ağsu rayonunun Kələğayılı kəndi ərazisində “VAZ-21074”, “Ford” və “KamAZ” markalı avtomobillər toqquşmuşdur

28.02.2022

Fevralın 28-də saat 20 radələrində Ağsu rayonunun Kələğayılı kəndi ərazisində R.Əhmədlinin idarə etdiyi “VAZ-21074”, Habil İsmayılovun idarə etdiyi “Ford” və C.Vahabovun idarə etdiyi “KamAZ” markalı avtomobillər toqquşmuşdur. Nəticədə H.İsmayılov ölmüş, digər sürücü və bir sərnişin xəstəxanaya yerləşdirilmişlər. Baş İstintaq və Təhqiqat İdarəsi tərəfindən araşdırma aparılır.

Bərdə rayonu ərazisindəki bir evdən və bir mağazadan oğurluq etməkdə şübhəli bilinən rayon sakini A.Səlimov saxlanılmışdır

28.02.2022

Bərdə RPŞ əməkdaşlarının keçirdikləri əməliyyat-axtarış tədbirləri nəticəsində fevralın 20-də və 23-də rayon ərazisindəki bir evdən qızıl-zinət əşyaları, bir mağazadan isə 659 manat pul və 500 manat dəyərində tütün məmulatı oğurlamaqda şübhəli bilinən Xəsili kənd sakini A.Səlimov saxlanılmışdır.

Ölkə xaricində yaşayan narkotacir sosial şəbəkədə tanış olduğu ev təmiri ilə məşğul olan ustanı narkokuryerliyə cəlb edib

28.02.2022

Nərimanov Rayon Polis İdarəsinin Cinayət Axtarışı Şöbəsinin əməkdaşlarının həyata keçirdikləri əməliyyat-axtarış tədbiri nəticəsində narkotik vasitələrin qanunsuz dövriyyəsi ilə məşğul olan Lənkəran şəhər sakini Əfrail Seyfullayev saxlanılıb. Onun üzərinə baxış zamanı 2 kiloqram yüksək təsiredici xassəyə malik narkotik vasitə olan heroin aşkar edilib. Araşdırma zamanı bu şəxsin ev təmiri ilə məşğul olduğu və “İnstagram” sosial şəbəkəsində gördüyü işləri reklam etmək məqsədi ilə özünəməxsus səhifə açdığı müəyyən edilib.  Daha sonra Əfrail Seyfullayev sosial şəbəkədə tanış olduğu  xarici ölkələrdən birində yaşayan narkotacirin şirnikləndirici vədlərinə aldanaraq onun narkokuryerlik təklifi ilə razılaşıb. Bu məqsədlə o, narkotik vasitələrin paytaxt ərazisində satışını təşkil edib. Əfrail Seyfullayev ifadəsində narkotik vasitələrin qanunsuz dövriyyəsi ilə məşğul olduğunu etiraf edib. Faktla bağlı Nərimanov Rayon Polis İdarəsinin İstintaq Şöbəsində Cinayət Məcəlləsinin müvafiq maddəsi ilə cinayət işi başlanılıb. Narkotiklərin qanunsuz dövriyyəsində təqsirli bilindiyi üçün tutulan Əfrail Seyfullayev barəsində məhkəmənin qərarı ilə həbs qətimkan tədbiri seçilib.

Bakıda “Kalaşnikov” avtomatı satmaq istəyən şəxs saxlanılıb

28.02.2022

Xəzər Rayon Polis İdarəsinin 2-ci Polis Şöbəsinin əməkdaşlarının daxil olmuş əməliyyat məlumatı əsasında həyata keçirdikləri tədbir nəticəsində qanunsuz olaraq əldə etdiyi odlu silah-sursatı satmaq istəyən şəxs saxlanılıb. Şöbəyə Buzovna qəsəbəsində yaşayan əvvəllər məhkum edilmiş Anar Qocayevdə silah olması və satmaq istəməsi barədə əməliyyat məlumatı daxil olub. Həmin şəxs odlu silahı satmaq istəyən zaman saxlanılıb. Onun üzərinə baxış keçirilərkən 1 ədəd “Kalaşnikov” markalı atəş üçün yararlı avtomat, həmin silaha məxsus daraq və 9 ədəd patron aşkar edilərək götürülüb. Rüfət İbrahimov avtomatı bir müddət əvvəl əldə etdiyini, lakin polisə təhvil verməyərək özündə saxladığını bildirib. 2-ci Polis Şöbəsində toplanan materiallar araşdırmaların davam etdirilməsi üçün Xəzəri Rayon Polis İdarəsinin İstintaq Şöbəsinə göndərilib. Anar Qocayev barəsində məhkəmənin qərarı ilə həbs qətimkan tədbiri seçilib, istintaq tədbirləri davam edirilir.

Baş Mütəşəkkil Cinayətkarlıqla Mübarizə İdarəsinin əməkdaşları Bərdə və Kürdəmirdə silahlı şəxslərə qarşı əməliyyatlar keçirib

28.02.2022

Daxili İşlər Nazirliyi Baş Mütəşəkkil Cinayətkarlıqla Mübarizə İdarəsinin əməkdaşları tərəfindən üzərlərində qanunsuz olaraq odlu silah-sursat gəzdirən şəxslərə qarşı əməliyyatlar həyata keçirilib.Daxil olan əməliyyat məlumatı əsasında Baş İdarə əməkdaşları tərəfindən keçirilən tədbir zamanı Bərdə rayon sakini  rayon sakini Razi Süleymanov saxlanılıb. Onun üzərində şəxsi axtarış aparılan zaman 1 ədəd  xüsusi kustar üsulla qələm-tapança formasında hazırlanan atəş üçün yararlı odlu silah, həmin silaha məxsus 3 ədəd patron və 4 qram psixotrop maddə metamfetamin aşkar edilib. Baş İdarə əməkdaşları tərəfindən keçirilən növbəti əməliyyat zaman isə üzərində qanunsuz olaraq odlu silah-sursat gəzdirməkdə şübhəli bilinən daha bir nəfər - Kürdəmir rayon sakini Zaur Kərimov da tutulub. Onun üzərinə baxış zamanı 1 ədəd “Naqan” markalı atəşə yararlı tapança, həmin silaha məxsus 7 ədəd patron aşkar edilib. Qeyd olunan faktlarla əlaqədar saxlanılanların hər biri barəsində Baş İdarədə Cinayət Məcəlləsinin müvafiq maddələri ilə cinayət işləri başlanılıb. Adları sadalanan şəxslər barəsində həbs qətimkan tədbirləri seçilib. Saxlanılanların cinayət əlaqələrinin aşkar edilməsi istiqamətində əməliyyat tədbirləri davam etdirilir.

Gün ərzində törədilmiş 45 cinayətin üstü “isti izlər”lə açılmışdır

27.02.2022

Respublikanın daxili işlər orqanları tərəfindən gün ərzində törədilmiş 45 cinayətin üstü “isti izlər”lə açılmışdır.

200 kiloqram çəkidə mənşəyi məlum olmayan və qida üçün yararsız ət məhsulu aşkar edilmişdir

27.02.2022

DİN-in Baş Dövlət Yol Polisi İdarəsi əməkdaşlarının keçirdikləri tədbirlərlə fevralın 27-də saat 6 radələrində Ağcabədi rayon sakini S.Niyazovun idarə etdiyi “Mercedes” markalı avtomobil Qaradağ rayonu ərazisində saxlanılmışdır.  Avtomobilə baxış zamanı oradan 200 kiloqram çəkidə mənşəyi məlum olmayan və qida üçün yararsız ət məhsulu aşkar edilmişdir.S.Niyazov və sərnişini, qardaşı B.Niyazov saxlanılaraq Qaradağ Rayon Polis İdarəsinə təhvil verilmişlər.Araşdırma aparılır. 

Poçt şöbəsinə 20 ədəd 50 ABŞ dollarlıq saxta əskinas verməkdə şübhəli bilinən Abşeron rayon sakini C.İsayev saxlanılmışdır

27.02.2022

Sumqayıt ŞPİ-nin 1-ci Polis Bölməsinə fevralın 18-də Corat qəsəbəsi ərazisində yerləşən poçt şöbəsində bir nəfərin 20 ədəd 50 ABŞ dollarlıq əskinas verərək manat alması, həmin dollar əskinaslarının isə saxta olması barədə məlumat daxil olmuşdur. Polis əməkdaşlarının keçirdikləri əməliyyat-axtarış tədbirləri nəticəsində bu əməli törətməkdə şübhəli bilinən Abşeron rayon sakini, əvvəllər narkotiklərlə əlaqəli cinayətə görə məhkum olunmuş C.İsayev müəyyən edilərək saxlanılmışdır.Onun saxta əskinasları verərkən Bakı şəhər sakini olan bir nəfərin şəxsiyyət vəsiqəsindən istifadə etməsi müəyyən edilmişdir. Araşdırma aparılır.