Narkotik vasitələrin satışı ilə məşğul olan və silahlı şəxslərə qarşı əməliyyatlar keçirib

13.06.2022

Daxili İşlər Nazirliyi Baş Mütəşəkkil Cinayətkarlıqla Mübarizə İdarəsinin əməkdaşları tərəfindən üzərlərində və yaşadıqları evlərdə qanunsuz olaraq odlu silah-sursat, eləcə də narkotik vasitələr saxlayan şəxslərə qarşı əməliyyatlar həyata keçirilib.Daxil olan əməliyyat məlumatı əsasında keçirilən tədbirlər zamanı Əli Abbaslı, tanışı Ələkbər Məmmədov, Aqil Qarayev və Hamlet Vəliyev narkotik vasitələrin satışı ilə məşğul olmaqda şübhəli bilindikləri üçün saxlanılıblar. Onlardan ümumilikdə 23 kiloqram narkotik vasitə heroin, marixuana və 1590 ədəd metadon həbi aşkar edilərək götürülüb. Saxlanılan şəxslər narkotik vasitələri satmaq məqsədi ilə əldə etdiklərini bildiriblər. Baş İdarə əməkdaşları tərəfindən həyata keçirilən digər əməliyyatlar zamanı üzərləində qanunsuz olaraq odlu silah-sursat saxlamaqda şübhəli bilinən Natiq Səfərov və Ceyhun Nuriyev saxlanılıblar. Onlardan 2 ədəd lüləsi və qundağı kəsilmiş ov tüfəngi aşkar olunub. Qeyd olunan faktlarla əlaqədar Cinayət Məcəlləsinin müvafiq maddələri ilə cinayət işləri başlanılıb. Adları sadalanan şəxslər barəsində məhkəmə tərəfindən həbs qətimkan tədbirləri seçilib. Saxlanılanların cinayət əlaqələrinin aşkar edilməsi istiqamətində əməliyyat tədbirləri davam etdirilir.

Xəzər rayonu Zirə qəsəbəsində narkotacirdən 26 kiloqram çətənə kolu və marixuana aşkar edilib

13.06.2022

Xəzər Rayon Polis İdarəsinin Narkotiklərlə Mübarizə Bölməsinin əməkdaşlarının həyata keçirdikləri əməliyyat  nəticəsində narkotik tərkibli bitkilərin kultivasiyası və satışı ilə məşğul olan şəxs saxlanılıb.Belə ki, Zirə qəsəbəsində yaşayan Anar Süleymanovun yaşadığı evin həyətində narkotik tərkibli bitkilər əkib-becərdiyi barədə İdarəyə əməliyyat məlumatı daxil olub. Məlumat yoxlanılan zaman fakt öz təsdiqini tapıb. Polislər həmin şəxsi saxlayaraq üzərinə, eləcə də yaşadığı evin həyətindəki istixanaya baxış keçirən zaman ümumi çəkisi 15 kiloqram olan 53 ədəd çətənə kolu və 11 kiloqram marixuana aşkar edilib. Anar Süleymanov ifadəsində narkotik tərkibli bitkiləri satmaq məqsədi ilə əkdiyini və xüsusi qulluq etdiyini bildirib. Faktla  bağlı Cinayət Məcəlləsinin müvafiq maddəsi ilə cinayət işi başlanılıb. Narkotiklərin qanunsuz dövriyyəsini təşkil edən Anar Süleymanov barəsində məhkəmənin qərarı ilə həbs qətimkan tədbiri seçilib. Xəzər  rayonu ərazisində narkotik vasitələrin qanunsuz dövriyyəsi ilə məşğul olan şəxslərin ifşa edilməsi istiqamətində əməliyyat tədbirləri davam etdirilir.

Gün ərzində ölkə ərazisində qeydə alınan cinayətlərdən 67-nin açılması təmin olunub

12.06.2022

İyunun 12-də ölkə ərazisində qeydə alınan cinayətlərdən 67-nin, eləcə də əvvəlki dövrlərdən bağlı qalan cinayətlərdən 2-nin açılması daxili işlər orqanlarının əməkdaşları tərəfindən təmin olunub.

Soyğunçuluq etməkdə şübhəli bilinən paytaxt sakini T.Babayev  müəyyən edilərək saxlanılıb

12.06.2022

Sabunçu RPİ-nin 13-cü Polis Bölməsinə iyunun 11-də Bakıxanov qəsəbəsində  Bakı şəhər sakin N.Əhmədovun idarə etdiyi “Mercedes” markalı avtomobilə sərnişin qismində əyləşən bir nəfərin onun mobil telefonunu danışmaq adı ilə alıb avtomobildən düşərək qaçması barədə müraciət daxil olub. Polis əməkdaşlarının keçirdikləri əməliyyat tədbirləri nəticəsində soyğunçuluğu törətməkdə şübhəli bilinən paytaxt sakini, əvvəllər də oğurluğa və soyğunçuluğa görə məhkum olunmuş T.Babayev  müəyyən edilərək saxlanılıb. Araşdırma aparılır. 

Bakı şəhər sakini Yusif Əliyevə məxsus avtomobilə baxış zamanı 16 ədəd “Tramadol”, 4 ədəd “Fenazepam” və 2 ədəd “Metadon” həbləri aşkar edilərək götürülüb

12.06.2022

Baş Dövlət Yol Polisi İdarəsinin əməkdaşları tərəfindən iyunun 11-də saat 14 radələrində Siyəzən rayonunun Zarat kəndi ərazisində yerləşən postda “Nissan” markalı avtomobil nəzarət qaydasında saxlanılıb. Sürücü, Bakı şəhər sakini Yusif Əliyevin narkotik vasitənin təsiri altında olması şübhə doğurduğundan Siyəzən Rayon Polis Şöbəsinin əməkdaşları hadisə yerinə dəvət olunub. Polis əməkdaşları tərəfindən avtomobilə baxış zamanı oradan 16 ədəd “Tramadol”, 4 ədəd “Fenazepam” və 2 ədəd “Metadon” həbləri aşkar edilərək götürülüb.Y.Əliyev barəsində İnzibati Xətalar Məcəlləsinin 333.1-ci maddəsinə əsasən protokol tərtib edilərək Siyəzən Rayon Polis Şöbəsinə təhvil verilib. 

Oğurluq etməkdə şübhəli bilinən Lənkəran rayon sakini R.Məmmədov müəyyən edilərək saxlanılıb

12.06.2022

Abşeron Rayon Polis İdarəsinə Xırdalan şəhəri ərazisində marşrut avtobusunda şəhər sakini S.Cəbiyevanın çantasından 3200 manat pulunun oğurlanması barədə müraciət daxil olub.    Polis əməkdaşlarının keçirdikləri əməliyyat-axtarış tədbirləri nəticəsində oğurluğu törətməkdə şübhəli bilinən Lənkəran rayon sakini, əvvəllər məhkum olunmuş R.Məmmədov müəyyən edilərək saxlanılıb. Şəxsi axtarış zamanı ondan metamfetamin də aşkar edilərək götürülüb. Araşdırma aparılır. 

Ov tüfəngindən açdığı atəşlə A.Şükürova xəsarət yetirməkdə şübhəli bilinən Bərdə rayonunun Kələntərli kənd sakini R.Lətifov müəyyən edilərək saxlanılıb

12.06.2022

Bərdə Rayon Polis Şöbəsinə iyunun 12-də Kələntərli kəndində kənd sakini A.Şükürovun odlu silahdan açılmış atəşdən qol nahiyəsindən xəsarət alması barədə məlumat daxil olub.Polis əməkdaşlarının keçirdikləri əməliyyat tədbiri nəticəsində xuliqanlıq zəminində ov tüfəngindən açdığı atəşlə A.Şükürova xəsarət yetirməkdə şübhəli bilinən kənd sakini R.Lətifov müəyyən edilərək saxlanılıb. Ondan qanunsuz saxladığı “İJ” markalı ov tüfəngi götürülüb. Araşdırma aparılır. 

Kultivasiya yolu ilə yetişdirilən çətənə koları aşkar edilərək götürülüb

12.06.2022

Bərdə RPŞ əməkdaşlarının keçirdikləri əməliyyat tədbiri nəticəsində Mehdili kənd sakini A.Ağayevin həyətindən kultivasiya yolu ilə yetişdirilən 113 ədəd çətənə kolu aşkar edilərək götürülüb.Sabunçu RPİ 14-cü Polis Bölməsi əməkdaşlarının keçirdikləri əməliyyat-axtarış tədbiri nəticəsində Maştağa qəsəbə sakini Y.Səfərovun həyətindən kultivasiya yolu ilə yetişdirilən 25 ədəd çətənə kolu aşkar edilərək götürülüb. 

Şirvan şəhər sakini E.Əliyevin evinə baxış zamanı oradan 1 kiloqram 310 qram heroin və elektron tərəzi götürülüb

12.06.2022

Şirvan ŞPŞ əməkdaşlarının keçirdikləri əməliyyat tədbiri nəticəsində saxlanılan şəhər sakini, əvvəllər məhkum olunmuş E.Əliyevdən heroin aşkar edilib. Davam etdirilən tədbirlərlə onun evinə baxış zamanı oradan 1 kiloqram 310 qram heroin və elektron tərəzi götürülüb. 

Xaricdə istehsal edilmiş tapança, 1 ədəd patron darağı və 14 ədəd patron aşkar edilərək götürülüb

12.06.2022

Şirvan ŞPŞ əməkdaşlarının keçirdikləri əməliyyat-axtarış tədbiri nəticəsində Ş.Məmmədovun evinin həyətinə baxış zamanı oradan xaricdə istehsal edilmiş tapança, 1 ədəd patron darağı və 14 ədəd patron aşkar edilərək götürülüb.