Nərimanov rayonu ərazisində 3 avtomobildən oğurluq etməkdə şübhəli bilinən Bakı şəhər sakini R.Quliyev saxlanılıb

27.06.2022

Nərimanov RPİ-nin 16-cı Polis Bölməsi əməkdaşlarının keçirdikləri əməliyyat tədbirləri nəticəsində rayon ərazisində “Wolksvagen”, “Hyundai” və “KİA” markalı 3 avtomobildən pul, sənəd və kosmetik əşyalar oğurlamaqda şübhəli bilinən Bakı şəhər sakini, əvvəllər məhkum olunmuş R.Quliyev saxlanılıb. Araşdırma aparılır.

Yasamal rayonu ərazisində 3 avtomobildən oğurluq etməkdə şübhəli bilinən Ağdam rayon sakini Ş.Nəbiyev saxlanılıb

27.06.2022

Yasamal RPİ 29-cu Polis Şöbəsi əməkdaşlarının keçirdikləri əməliyyat tədbirləri nəticəsində rayon ərazisində “VAZ” markalı 3 avtomobildən pul, sənəd, maqnitofon və səsgücləndirici oğurlamaqda şübhəli bilinən Ağdam rayon sakini, əvvəllər məhkum olunmuş Ş.Nəbiyev saxlanılıb. Araşdırma aparılır. 

Xırdalan şəhəri ərazisində Bakı şəhər sakini T.Səfərova qarşı quldurluq törətməkdə şübhəli bilinən şəxslər saxlanılıblar

27.06.2022

Abşeron Rayon Polis İdarəsi əməkdaşlarının keçirdikləri əməliyyat tədbirləri nəticəsində Xırdalan şəhəri ərazisində Bakı şəhər sakini T.Səfərova zor tətbiq edərək mobil telefonunu və 30 manatını talamaqda və bıçaqla ayaq nahiyəsinə xəsarət yetirməkdə şübhəli bilinən əvvəllər məhkum olunmuşlar - Şamaxı rayon sakini K.Əhmədov və Ağdam rayon sakini V.Kərimov saxlanılıblar. Faktla bağlı Cinayət Məcəlləsinin 181-ci (Quldurluq) maddəsi ilə cinayət işi başlanılıb. 

Beyləqan rayonunun İmamverdilər kənd sakini V.Əsədovdan 5 kiloqramdan artıq heroin və 300 ədəd preqabalin həbi götürülüb

27.06.2022

Beyləqan RPŞ əməkdaşlarının keçirdikləri əməliyyat tədbiri nəticəsində saxlanılan İmamverdilər kənd sakini V.Əsədovdan 5 kiloqram 430 qram heroin və 300 ədəd preqabalin həbi aşkar olunaraq götürülüb. 

Metronun “28 May” stansiyasının yaxınlığında park edilmiş velosipedləri oğurlayan şəxslər saxlanılıblar

27.06.2022

Nəqliyyatda Baş Polis İdarəsinin Dəmiryolu Nəqliyyatında Polis İdarəsinin əməkdaşları tərəfindən həyata keçirilən əməliyyat nəticəsində metronun “28 May” stansiyasının yaxınlığında yerləşən parkinqdən silsilə velosiped oğurluqları edən şəxslər tutulublar. Tədbir zamanı Sərxan Əhmədov və Şahverdi Zeynalov saxlanılaraq məsuliyyətə cəlb olunublar. Onlar ifadələrində ayrı-ayrı vaxtlarda  qeyd edilən ərazidən 5 nəfərin velosipedini oğurlayaraq satdıqlarını bildiriblər. Hadisələrlə bağlı Dəmiryolu Nəqliyyatında Polis İdarəsində araşdırmalar aparılır. Saxlanılan şəxslərin digər cinayət əlaqələrinin müəyyən edilməsi istiqamətində əməliyyat-istintaq tədbirləri davam etdirilir. Sərxan Əhmədov və Şahverdi Zeynalovun qanunsuz əməllərindən zərərçəkən başqa vətəndaşlar varsa ərazi polis orqanlarına, "102" Xidməti-Zəng Mərkəzinə və Nazirliyin sosial şəbəkələrdəki səhifələrinə məlumat verə bilərlər.

Gün ərzində ölkə ərazisində qeydə alınan cinayətlərdən 48-nin açılması təmin olunub

26.06.2022

İyunun 26 -da ölkə ərazisində qeydə alınan cinayətlərdən 48-nin, eləcə də əvvəlki dövrlərdən bağlı qalan cinayətlərdən 9-nun açılması daxili işlər orqanlarının əməkdaşları tərəfindən təmin olunub.

Bərdə rayon sakini Ç.Sadıqlıya dəryazla xəsarət yetirərək onu qəsdən öldürməkdə şübhəli bilinən X.Məmmədov tutularaq istintaqa təhvil verilib

26.06.2022

Bərdə Rayon Polis Şöbəsinə iyunun 26-da saat 16 radələrində rayon sakini Çapay Sadıqlının öldürülməsi barədə məlumat daxil olub. Rayonun polis və prokurorluq orqanlarının əməkdaşları tərəfindən müvafiq tədbirlər həyata keçirilib. Aparılan ilkin araşdırmalarla rayon sakini X.Məmmədovun münaqişə zəminində Ç.Sadıqlıya dəryazla xəsarət yetirərək qəsdən öldürməsinə əsaslı şübhələr müəyyən edilib.Əməliyyat-axtarış tədbirləri nəticəsində X.Məmmədov şübhəli şəxs qismində tutularaq istintaqa təhvil verilib. Faktla bağlı Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb.

Liman şəhər sakini S.Novruzovu qəsdən öldürməkdə şübhəli bilinən şəhər sakini Q.Səlimov tutularaq istintaqa təhvil verilib

26.06.2022

Lənkəran Şəhər Rayon Polis Şöbəsinə iyunun 26-da saat 16 radələrində Liman şəhəri ərazisində şəhər sakini Samir Novruzovun öldürülməsi barədə məlumat daxil olub.Şəhərin polis və prokurorluq orqanlarının əməkdaşları tərəfindən müvafiq tədbirlər həyata keçirilib. Aparılan ilkin araşdırmalarla şəhər sakini, əvvəllər məhkum olunmuş Q.Səlimovun münaqişə zəminində S.Novruzova bıçaqla xəsarət yetirərək qəsdən öldürməsinə əsaslı şübhələr müəyyən edilib.Əməliyyat-axtarış tədbirləri nəticəsində Q.Səlimov şübhəli şəxs qismində tutularaq istintaqa təhvil verilib. Faktla bağlı Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb.

Binə qəsəbə sakini Ə.Əlizadənin nəvəsinə hədə-qorxu gələrək qızıl-zinət əşyaları almaqda şübhəli bilinən qəsəbə sakini A.Sultanov saxlanılıb

26.06.2022

Xəzər RPİ-nin 3-cü Polis Şöbəsinə müraciət edən Binə qəsəbə sakini Ə.Əlizadə cari il mayın 5-də bir nəfərin onun nəvəsinə hədə-qorxu gələrək qızıl-zinət əşyaları almasını bildirib.Polis əməkdaşlarının keçirdikləri əməliyyat-axtarış tədbirləri nəticəsində hədə-qorxu ilə tələb etmədə şübhəli bilinən qəsəbə sakini A.Sultanov müəyyən edilərək saxlanılıb.Xəzər Rayon Polis İdarəsində araşdırma aparılır.

Xəzər rayonunun Binə qəsəbəsindəki evlərin birindən qızıl-zinət əşyaları oğurlamaqda şübhəli bilinən qəsəbə sakinləri S.Tahirova və Z.Eynullazadə saxlanılıblar

26.06.2022

Xəzər RPİ 3-cü Polis Şöbəsi əməkdaşlarının keçirdikləri əməliyyat-axtarış tədbirləri nəticəsində iyunun 20-dən 25-dək olan müddətdə Binə qəsəbəsindəki evlərin birindən 1400 manat dəyərində qızıl-zinət əşyaları oğurlamaqda şübhəli bilinən qəsəbə sakinləri S.Tahirova və Z.Eynullazadə müəyyən edilərək saxlanılıblar. Araşdırma aparılır.