Şəmkir, Qusar, Tovuz, Qax, Goranboy və Quba rayonlarının ərazilərində yabanı halda bitən çətənə kolları aşkar olunaraq məhv edilib

30.06.2022

“Xaşxaş-2022” şərti adlı kompleks əməliyyat-axtarış və profilaktik tədbirlər nəticəsində Şəmkir RPŞ-nin əməkdaşları tərəfindən Çinarlı kəndi ərazisində 30 sot sahədən 2 ton 720 kiloqram çəkidə 1210 ədəd, Qusar RPŞ-nin əməkdaşları tərəfindən Zindan Muruq kəndi ərazisində 1 hektar sahədən 1,5 ton çəkidə 724 ədəd, Tovuz RPŞ-nin əməkdaşları tərəfindən Dondar Quşçu kəndi ərazisindən 260 kiloqram çəkidə 195 ədəd, Qax RPŞ-nin əməkdaşları tərəfindən Qum kəndi ərazisindən 1,5 ton çəkidə 3260 ədəd, Goranboy RPŞ-nin əməkdaşları tərəfindən Eyvazlılar kəndi ərazisindən 2,5 ton çəkidə 4600 ədəd, Quba RPŞ-nin əməkdaşları tərəfindən Xanəgah kəndi ərazisində 2 hektar sahədən 3 ton çəkidə 4200 ədəd yabanı halda bitən çətənə kolları aşkar olunaraq məhv edilib.

Xızı rayonunun Giləzi qəsəbə sakini İ.Rəhimovun həyətindən 57 ədəd çətənə kolu götürülüb

30.06.2022

Xızı RPŞ əməkdaşlarının keçirdikləri “Xaşxaş-2022” şərti adlı kompleks əməliyyat-axtarış və profilaktik tədbirlər nəticəsində Giləzi qəsəbə sakini İ.Rəhimovun həyətindən kultivasiya yolu ilə yetişdirilən 57 ədəd çətənə kolu aşkar olunaraq götürülüb.

Sabirabad şəhərində “VAZ-2107” markalı avtomobil yolun kənarındakı dirəyə çırpılıb

30.06.2022

İyunun 30-da saat 22 radələrində Sabirabad şəhərində Kürkəndi kənd sakini R.Quliyev idarə etdiyi “VAZ-2107” markalı avtomobili yolun kənarındakı dirəyə vurub. Nəticədə avtomlobildə olan 2 sərnişin müxtəlif dərəcəli bədən xəsarətləri ilə xəstəxanaya yerləşdirilib, onlardan biri ölüb, digərinin vəziyyəti orta-ağırdır.Sabirabad Rayon Polis Şöbəsində araşdırma aparılır.

Nizami rayonu Babək prospektində “Mercedes” markalı avtomobillə 40-45 yaşlı kişi vurulub

30.06.2022

İyulun 1-də saat 2 radələrində Nizami rayonu Babək prospektində Ağdaş rayon sakini B.Salamov idarə etdiyi “Mercedes” markalı avtomobillə yolu keçən 40-45 yaşlı kişini vurub. Piyada xəstəxanaya yerləşdirilib və orada ölüb. Nizami Rayon Polis İdarəsi tərəfindən yol-nəqliyyat hadisəsini törədən sürücünün müəyyən edilib tutulması üçün əməliyyat tədbirləri aparılır.

Narkotik vasitələrin satışı ilə məşğul olan şəxslərə qarşı əməliyyatlar keçirilib, 39 kiloqram narkotik vasitə qanunsuz dövriyyədən çıxarılıb 

30.06.2022

Daxili İşlər Nazirliyi Baş Mütəşəkkil Cinayətkarlıqla Mübarizə İdarəsinin əməkdaşları tərəfindən narkotik vasitələrin satışı və kultivasiyası ilə məşğul olan şəxslərə qarşı növbəti əməliyyatlar həyata keçirilib. Tədirlər zamanı Hüseyn Qasımov, Mikayıl Qafarov, Seyfəddin Rəhimov, İsmayıl Qacayev və Ramik Məmmədov narkotik vasitələrin satışı ilə məşğul olmaqda şühbəli bilindikləri üçün saxlanılıblar. Onlardan ümumilikdə 39  kiloqram narkotik vasitə heroin, tiryək, marixuana, 500 ədəd metadon həbi və  365 ədəd xüsusi qulluq edilərək yetişdirdikləri çətənə kolu aşkar edilərək götürülüb. Saxlanılan şəxslər narkotik vasitələri satmaq məqsədi ilə əldə etdiklərini bildiriblər. Qeyd olunan faktlarla əlaqədar Cinayət Məcəlləsinin müvafiq maddələri ilə cinayət işləri başlanılıb. Adları sadalanan şəxslərin hər biri barəsində məhkəmə tərəfindən həbs qətimkan tədbiri seçilib. Saxlanılanların cinayət əlaqələrinin aşkar edilməsi istiqamətində əməliyyat tədbirləri davam etdirilir.

Gün ərzində ölkə ərazisində qeydə alınan cinayətlərdən 75-nin açılması təmin olunub

29.06.2022

İyunun 29-da ölkə ərazisində qeydə alınan cinayətlərdən 75-nin, eləcə də əvvəlki dövrlərdən bağlı qalan cinayətlərdən 16-nın açılması daxili işlər orqanlarının əməkdaşları tərəfindən təmin olunub.

Bakı şəhər sakini H.Şükürovu döyüb bıçaqla hədələyərək 80 manatını və mobil telefonunu talamaqda şübhəli bilinən şəxslər saxlanılıblar

29.06.2022

Binəqədi RPİ-nin 5-ci Polis Bölməsinə iyunun 26-da saat 2 radələrində S.S.Axundov küçəsində 3 nəfərin Bakı şəhər sakini H.Şükürovu döyüb bıçaqla hədələyərək 80 manatını və mobil telefonunu talamaları barədə müraciət daxil olub.Polis əməkdaşlarının keçirdikləri əməliyyat tədbirləri nəticəsində quldurluğu törətməkdə şübhəli bilinən Saatlı rayon sakinləri F.Yarıyev, M.İmanov və Şirvan şəhər sakini İ.Eldar oğlu müəyyən edilərək saxlanılıblar.Binəqədi Rayon Polis İdarəsində araşdırma aparılır.

Nərimanov rayonu ərazisində Bakı şəhər sakini S.Məmmədliyə qarşı quldurluq törətməkdə şübhəli bilinən Bakı şəhər sakini V.Şərifov saxlanılıb

29.06.2022

Nərimanov RPİ-nin 17-ci Polis Şöbəsinə iyunun 29-da saat 3 radələrində rayon ərazisində bir nəfərin “Opel” markalı avtomobilin sürücüsü, Bakı şəhər sakini S.Məmmədlini bıçaqla hədələyib avtomobilini ələ keçirərək hadisə yerindən uzaqlaşması barədə müraciət daxil olub. Polis əməkdaşlarının keçirdikləri əməliyyat-axtarış tədbirləri nəticəsində avtomobil qısa müddətdə tapılıb və salonundan sürücüyə məxsus mobil telefonun götürülməsi aşkar olunub. Quldurluğu törətməkdə şübhəli bilinən Bakı şəhər sakini, əvvəllər məhkum olunmuş V.Şərifov müəyyən edilərək saxlanılıb.Nərimanov Rayon Polis İdarəsində araşdırma aparılır.

Bakı şəhər sakini G.Musazadənin çantasını soyğunçuluq yolu ilə talamaqda şübhəli bilinən Bakı şəhər sakini R.Kərimov saxlanılıb

29.06.2022

Yasamal RPİ-nin 29-cu Polis Şöbəsinə iyunun 30-da Bakı şəhər sakini G.Musazadənin içərisində bank kartları, sənədlər və kosmetik əşyaları olan çantasının soyğunçuluq yolu ilə talanması barədə müraciət daxil olub.Polis əməkdaşlarının keçirdikləri əməliyyat tədbirləri nəticəsində soyğunçuluğu törətməkdə şübhəli bilinən Bakı şəhər sakini, əvvəllər məhkum olunmuş R.Kərimov müəyyən edilərək saxlanılıb. Yasamal Rayon Polis İdarəsində araşdırma aparılır.

Oğurluq etdiyinə görə tutulan N.Qurbanovun bir neçə digər oğurluq faktlarını da törətməsi müəyyən olunub

29.06.2022

Binəqədi RPİ 4-cü Polis Şöbəsinin əməkdaşları tərəfindən oğurluq etdiyinə görə tutulan N.Qurbanovun ətrafında aparılan əməliyyat tədbirləri ilə onun daha 4 evdən və həyətyanı sahədən ümumilikdə 2170 manat pul, qol saatı, gümüş boyunbağı və 4  ədəd mobil telefon, habelə B.Yaqubluya məxsus “VAZ-2107” markalı avtomobildən 2 ədəd təkər oğurlaması da müəyyən olunub.