Sumqayıt şəhər sakini Çingiz Daşdəmirov daxili işlər nazirinin bu il Sumqayıt şəhərində keçirdiyi vətəndaş qəbulunda iştirak etdiyini qeyd edərək DİN rəhbərliyinə minnətdarlığını bildirir.

Bakı şəhər sakini Tural Məmmədov DİN-in “Facebook” səhifəsində şərh yazaraq polis əməkdaşlarının xidməti fəaliyyətindən razılıq edir və  minnətdarlığını bildirir.

Bakı şəhər sakini Əşirəf Həsənov məktubunda Daxili İşlər Nazirliyinə etdiyi müraciətinə baxılaraq qısa müddətdə müsbət həll edildiyini qeyd edir. O, göstərilən diqqət və qayğıya, humanistliyə görə DİN rəhbərliyinə minnətdarlığını bildirir.

Göyçay rayon sakini Şəfa Hüseynova DİN-in Instagram səhifəsinə təşəkkür mesajı yazıb. O, səhifə vasitəsilə etdiyi müraciətinə çevik reaksiya verildiyini, aparılan obyektiv araşdırma və görülmüş tədbirlərlə ona dəymiş maddi ziyanın tam ödətdirildiyini qeyd edir. Ş.Hüseynova operativliyə və göstərilən köməkliyə görə DİN rəhbərliyinə minnətdarlığını bildirir.

Vətəndaş İntiqam Türbəndəyev Facebook sosial şəbəkəsindəki hesabında Azərbaycan polisinə təşəkkür postu paylaşıb. O, yük avtomobili sürücüləri ilə bağlı hesabında paylaşaraq ictimailəşdirdiyi posta Daxili İşlər Nazirliyindən çevik reaksiya verildiyini, Bakı şəhər Dövlət Yol Polisi İdarəsindən onunla əlaqə saxlanılaraq qanunvericiliyin tələblərinin ona izah olunduğunu qeyd edir.     
İ.Türbəndəyev paylaşdığı posta operativ reaksiya verilməsinə, yük avtomobillərinin hərəkəti ilə bağlı ətraflı izaha, həmçinin bununla bağlı mediaya da geniş açıqlamaya görə DİN rəhbərliyinə təşəkkürünü bildirir.  

Sumqayıt şəhər sakini Rəyasət Bağırov məktubunda cari il noyabrın 24-də respublikanın daxili işlər naziri tərəfindən Sumqayıt şəhərində keçirilən vətəndaş qəbulunda iştirak etdiyini yazır. O, Vətən müharibəsi iştirakçısı olan oğlunun polis orqanlarında xidmətə qəbulu zamanı bütün proseslərin şəffaflıq və aşkarlıq prinsipləri əsasında reallaşdığının şahidi olduqlarını qeyd edərək, Şəhid ailələrinə, qazilərə, Vətən müharibəsi iştirakçılarına göstərilən yüksək diqqət və qayğıya görə DİN rəhbərliyinə təşəkkürünü bildirir. 

Bakı şəhər sakinləri Rəfiqə Əsgərova və Fatimə Abdullayeva DİN rəhbərliyinə ünvanladıqları təşəkkür məktublarında xidməti vəzifələrinin öhdəsindən layiqincə gəldiyinə, vətəndaşlara qarşı sərgilənən diqqətə və yüksək mədəni davranışa görə öz təşəkkürlərini bildirirlər. 

Bir qrup vətəndaş məktublarında DİN-ə ünvanladıqları müraciətlərinə operativ baxıldığına, həssaslıqla yanaşılaraq qısa zaman kəsiyində həll olunmasında, eləcə də onlara dəymiş maddi ziyanın ödətdirilməsində göstərdikləri köməkliyə görə DİN rəhbərliyinə və Azərbaycan Polisinə minnətdarlıqlarını bildirirlər.

Sosial şəbəkə istifadəçisi Abuzər Cəfərli Daxili İşlər Nazirliyinin xidməti fəaliyyəti ilə bağlı şəxsi “Facebook” səhifəsində paylaşdığı postda vətəndaşların müraciətlərinə ən çevik, obyektiv, operativ reaksiya verən, eləcə də onların üzləşdikləri problemləri qısa zaman kəsiyində həll edən rəsmi dövlət orqanı kimi Daxili İşlər Nazirliyinin adını qeyd edib. O, həmçinin Sabunçu RPİ və 12-ci Polis Şöbəsi əməkdaşları tərəfindən rayon ərazisindəki qanunsuz küçə ticarətinə, antisanitariyaya, eləcə də piyada səkilərini qeyri-qanuni zəbt edərək piyadaların və nəqliyyatın hərəkətinə çətinlik törədən hallara qarşı keçirilən reyd tədbirlərini alqışlayıb və minnətdarlığını bildirib. 
Postun sonunda ictimai asayişin və təhlükəsizliyin təmin olunmasında, hüquqazidd əməllərin qarşısının alınmasında, narkotiklərin, psixotrop maddələrin və onların prekursorlarının qanunsuz dövriyyəsinə qarşı qətiyyətli mübarizədə xidməti vəzifə borclarını layiqincə yerinə yetirdiklərinə görə 12-ci Polis Şöbəsinin rəhbərliyinə və şəxsi heyətinə təşəkkürünü də ifadə edib.