Yevlax rayonu Rüstəmli kənd sakinləri – Şakir Quliyev, Novruz Hüseynov və Şakir Hüseynov DİN rəhbərliyinə ünvanladıqları təşəkkür məktubunda otlaq sahəsinin alınıb onlara qaytarılmasında göstərdiyi köməkliyə görə Yevlax RPŞ-nin rəhbərliyinə minnətdarlıqlarını bildirirlər.

Daxili işlər orqanlarının fəaliyyəti ilə bağlı hər gün ayrı-ayrı vətəndaşlardan DİN rəhbərliyinə ünvanlanan çox saylı təşəkkür məktubları daxil olur. Son günlər aldığımız məktublardan birini oxucularımızın diqqətinə çatdırırıq: Quba rayon sakini Vüqar Qonaqov məktubunda yazır: “2018-ci il aprelin 26-da saat 18:30 radələrində Qusar şəhərinin çıxacağında şəxsi avtomobilimi idarə edərkən qəfildən gözlərimə qaranlıq çökdü. Avtomobilimi kənara çəkib saxladım. Özümə gəlib gözlərimi açanda evimdə olduğumu gördüm. Sonradan bildim ki, səhhətimin pisləşdiyini ərazidə xidmət aparan polis əməkdaşı görərək avtomobilimə yaxınlaşıb. O, halsız və köməksiz vəziyyətdə olduğumu görərək dərhal mənə ilkin tibbi yardım göstərib xidməti maşını ilə məni evimə çatdırıb, ailə üzvlərim mənə istifadə etdiyim dərmanları veriblər.

Sonradan öyrəndim ki, həyatımı xilas edən Qusar RPŞ-nin İnzibati təcrübə üzrə inspektoru, polis leytenantı Cavanşir Əliyevdir.

Bundan əlavə, Qusar RPŞ-nin Dövlət Yol Polisi Bölməsinin rəisi, polis mayoru Tərlan Zeynalov da bir neçə dəfə mənə zəng vuraraq səhhətimlə maraqlanıb, Qusar rayonundakı tibb müəssisələrində dəqiq müayinə olunmağım üçün köməyini təklif edib”.

V.Qonaqov yüksək peşəkarlıq nümayiş etdirərək oğlunu hərbi xidmətə yola salmış ataya vaxtında yardım edərək, daha iki azyaşlı övladı valideynsiz qalmaqdan xilas etdiklərinə görə şəxsən DİN rəhbərliyinə, Tərlan Zeynalov və Cavanşir Əliyevin simasında insanlarla həssas davranan bütün Azərbaycan Polisinə dərin təşəkkürünü bildirir, polisin insanların həyat və sağlamlıqlarının qorunması istiqamətində çevik reaksiya göstərməsindən məmnunluğunu qeyd edir.

Bakı şəhər sakini Akif Dadaşov şikayətinə tez bir zamanda baxılaraq, düzgün həllini tapmasında göstərdikləri köməyə görə Səbail Rayon Polis İdarəsinin əməkdaşlarına minnətdarlığını bildirir.

Bakı şəhər sakini Zaur Quliyev DİN rəhbərliyinə ünvanladığı minnətdarlıq məktubunda müraciətinə obyektiv baxılmasına və ona dəymiş maddi ziyanın ödətdirilməsində göstərdikləri köməyə görə Binəqədi RPİ-nin rəhbərliyinə və müstəntiq Mehman Ələsgərova təşəkkürünü bildirir.

Şirvan şəhər sakini Adışirin Qurbanov ictimai sabitliyin qorunmasında və cinayətkarlıqla mübarizədə polisin rolunu yüksək qiymətləndirir, Şirvan Şəhər Polis Şöbəsinin rəhbərliyinə minnətdarlığını bildirir.

Abşeron rayon sakini Afaq Tahirova DİN-ə ünvanladığı təşəkkür məktubunda şikayətinə tez bir zamanda baxılaraq, düzgün həllini tapmasında göstərdikləri köməyə görə polisin fəaliyyətini müsbət dəyərləndirir.

Bakı şəhər sakini Zülfiyyə Əliyeva DİN-ə ünvanladığı məktubunda şikayətinin təmin edilməsinə, üzləşdikləri problemin həllində göstərdikləri köməkliyə, həmçinin xoş və səmimi rəftara görə Nizami RPİ-nin əməkdaşlarından razılığını ifadə edir.

Göygöl şəhər sakini, ikinci qrup əlil Məzahir Aslanov avtoqəza nəticəsində ağır xəsarətlər alan, DİN Daxili Qoşunlarında əsgəri xidmətdə olan övladını və digərlərini ölümün caynağından xilas edən ağ xalatlı həmkarlarımıza minnətdarlığını bildirir.

Gəncə şəhəri Gülüstan qəsəbəsində müvəqqəti məskunlaşan Kəlbəcərdən olan məcburi köçkün Qəsibə Əlbəndova ona dəyən maddi ziyanın ödənilməsində göstərdiyi köməkliyə görə Daşkəsən RPŞ-nin rəhbərliynə təşəkkürünü bildirir.