Saatlı rayon sakini Sara Həsənova üzləşdiyi problemin həllində göstərdiyi diqqətə və köməyə görə RPŞ-nin rəhbərliyinə minnətdarlığını ifadə edir.

Şuşa rayonundan məcburi köçkün olan, hazırda Şəki şəhər Çələbixan qəsəbəsində məskunlaşan keçmiş polis əməkdaşı Elçin Quliyev göndərdiyi məktubda bildirir ki, səhhətində yaranmış problemlə bağlı DİN-in A.Heydərov adına Respublika Hospitalına müraciət edib. Həkimlərin səyi nəticəsində şəfa tapan E.Quliyev buna görə hospital kollektivinə təşəkkür edir.

Tovuz rayon İbrahimhacılı kənd sakini Nəsrəddin Səfərov göndərdiyi teleqramda yazır ki, üzləşdiyi problemin həll edilməsində polis əməkdaşları ona kömək ediblər. Buna görə N.Səfərov DİN rəhbərliyinə və RPŞ əməkdaşlarına minnətdarlığını bildirir.

Bakı şəhər Yasamal rayon sakini Fəxrəddin Xanmirzəyev göndərdiyi məktubda yazır ki, üzləşdiyi problemlə əlaqədar DİN rəhbərliyinə müraciət edib. Müraciət baxılması üçün Bakı Şəhər Baş Polis İdarəsinə yönləndirilib. Şikayət ərizəsini BŞPİ-nin İctimai Təhlükəsizlik İdarəsinin əməkdaşı Rəşad Məmmədov araşdırıb. Nəticədə, 10 ay müddətinə həllini tapmayan məsələ 3 həftə ərzində həll edilib. Vətəndaş R.Məmmədovun timsalında bütün daxili işlər orqanları əməkdaşlarına təşəkkür edir.

Astara rayon Sərək kənd sakini Sənan Süftiyev göndərdiyi məktubda RPŞ əməkdaşlarının ictimai asayişin qorunmasında və cinayətkarlığa qarşı mübarizədə rolunu yüksək qiymətləndirir, xüsusilə, Qeydiyyat və Şəxsiyyət Vəsiqəsi Bölməsinin fəaliyyətindən razılığını bildirir.

Faktiki olaraq Sabunçu rayonu Bakıxanov qəsəbəsində yaşayan Adilə Mürsəlova göndərdiyi məktubda bildirir ki, oktyabrın 6-da, gecə saat 04:00 radələrində dəmir barmaqlıqları kəsmək yolu ilə bir nəfərin evə daxil olmağa çalışdığını görüb dərhal “102” Xidməti Zəng Mərkəzinə zəng vurub. Evə girməyə macal tapmış şəxs ailə üzvlərindən hədə-qorxu yolu ilə pul və qiymətli əşyalar tələb edib. Lakin hadisə yerinə dərhal Sabunçu RPİ-nin 13-cü Polis Bölməsinin əməkdaşlarının gəlməsi həmin şəxsin planlarını alt-üst edib. Polis leytenantı Arif Məmmədov böyük cəsarət və igidlik göstərərək cinayətkarı zərərsizləşdirə bilib. Bu zaman o bədən xəsarəti alsa da, hazırda, sağlamlığında ciddi problem yoxdur. A.Mürsəlova Arif Məmmədov kimi polis əməkdaşları ilə fəxr etdiyini yazır və göstərdiyi şücaətə görə ona dərin təşəkkürünü bildirir. Vətəndaş həmçinin DİN rəhbərliyinə də minnətdarlıq edir.

Yasamal rayon sakini Xatuna Məmmədova göndərdiyi məktubda yazır ki, İnsan Alverinə qarşı Mübarizə Baş İdarəsinin əməkdaşları ona qarşı cinayət törətmiş şəxsin müəyyən edilərək məsuliyyətə cəlb olunmasında yüksək peşəkarlıq göstəriblər. Vətəndaş buna görə DİN rəhbərliyinə və bu işdə əməyi keçən hər bir polis əməkdaşına təşəkkürünü bildirir.

Faktiki olaraq Lənkəran rayonunda yaşayan Yadigar Mirzəyev göndərdiyi məktubda etdiyi müraciətinə qısa müddət ərzində baxıldığı üçün DİN rəhbərliyinə minnətdarlıq edir.

“Sizdən çox xahiş edirəm, o polisi tapın, heç olmasa, adını, şəklini qəzetinizdə verin ki, qoy insanlarımız belə mərd oğulları, ölümün üstünə gedən Polisi tanısınlar. Mən, övladlarım, bir sözlə, həmin gün evimizdə olan hər kəs həyatımızı ona borcluyuq”... Bu sətirlər Sabunçu rayon sakini Adilə Mürsəlovanın DİN-ə ünvanladığı təşəkkür məktubundandır. O, oktyabrın 6-da səhər saatlarında evlərinə oğurluq məqsədi ilə girmiş şəxsin zərərsizləşdirilməsində əsl şücaət göstərən, hətta bir neçə yerindən bıçaq yarası alan Sabunçu RPİ 13-cü Polis Bölməsinin sahə inspektoru, polis leytenantı Arif Məmmədova minnətdarlığını bildirir.