Sumqayıt şəhər sakini Akif Həsənov DİN-ə ünvanladığı məktubunda yazır: “Azyaşlı övladımın hərarəti yüksək həddə catmışdı. Təcili yardım ilə telefon bağlantısı alınmadığından “102” Xidməti Zəng Mərkəzinə zəng vurdum. Hec beş dəqiqə keçməmişdi ki, təcili yardım gəldi. Polisin hər bir sahədə ilk olaraq bizlərə göstərdiyi çevik köməyə görə daxili işlər orqanları əməkdaşlarına minnətdarlığımı bildirirəm”.

Tovuz rayon Qaraxanlı kənd sakini Nüsrət Nəsirli DİN-ə ünvanladığı məktubunda Yol Patrul Xidməti əməkdaşlarının fəaliyyətindən razılığını ifadə edir.

Bakı şəhər sakini Gülnaz Abdullayeva yazır: “Oktyabrın 30-da iki nəfər gecə saatlarında quldurluq yolu ilə evimə daxil olaraq əllərimi və ayaqlarımı yapışqan lentlə bağlayıb məndən pul tələb etdilər. Onlar evimdəki 3880 manatı götürüb aradan çıxdılar. Mən özümə gəldikdən sonra bu barədə polisə məlumat verdim. Binəqədi Rayon Polis İdarəsinin əməkdaşlarının səyi nəticəsində quldurluq edən şəxslər qısa müddət ərzində tutuldular və layiqli cəzalarını aldılar. Buna görə də mən polisimizə təşəkkür edirəm”…

Bakı şəhər sakini Taleh Həmidov DİN-ə ünvanladığı məktubda uzun illər qəzalı vəziyyətdə yaşadığı evin son günlər yaşayış üçün yararsızlığı barədə və kömək üçün Suraxanı Rayon Polis İdarəsinə etdiyi müraciətdən sonra ona göstərilən diqqət və qayğıya görə təşəkkürünü bildirir.

Sumqayıt şəhər sakini Qafur Mustafayev üzləşdiyi problemlə bağlı etdiyi müraciətə Baş Mütəşəkkil Cinayətkarlıqla Mübarizə İdarəsində baxıldığına və aparılan araşdırmalardan sonra hər şeyin qanun çərçivəsində öz həllini tapdığına, həmçinin “102” Xidməti Zəng Mərkəzi əməkdaşlarının operativliyinə görə DİN rəhbərliyinə təşəkkürünü bildirir.

Sumqayıt şəhərində müvəqqəti məskunlaşan Laçın rayon sakini Qəşəng Bayramova üzləşdiyi problemin aradan qaldırılmasında göstərdiyi köməyə görə Şəhər Polis İdarəsinin Dövlət Yol Polisi Şöbəsinin rəisi Bayram Zeynalova minnətdarlığını ifadə edir.

Gəncə şəhər sakini Qalib Qarayev göndərdiyi təşəkkür məktubunda sabitliyin keşiyində ayıq-sayıq dayanan, əmin-amanlığı qoruyan Azərbaycan Polisinə təşəkkür edir.

Bakı şəhər sakini Rəsmiyyə Məmmədova pozulmuş hüquqlarının bərpası ilə bağlı DİN-in Baş İstintaq və Təhqiqat İdarəsində aparılan operativ və düzgün araşdırmaya görə təşəkkürünü bildirir.

Bakı şəhər sakini Zaur İsgəndərov noyabrın 10-da yaşadıqları binada baş verən yanğın nəticəsində köməksiz qalan sakinlərlə yanaşı, həyat yoldaşının və yeni doğulmuş körpəsinin köməyinə çatan həmkarımız, Azərbaycan Respublikasında İNTERPOLUN Milli Mərkəzi Bürosunun əməkdaşı Natiq Qasımova təşəkkürünü bildirir.