Xırdalan şəhər sakini Lətafət Osmanova Daxili İşlər Nazirliyinə təşəkkür məktubu ünvanlayıb. O, fevral ayının 18-də İsmayıllı rayonu ərazisində olarkən hava şəraitinin pis olması səbəbindən avtomobilini idarə etməsində çətinliklə üzləşdiyini, yol sürüşkən olduğundan idarəetməni itirərək qəza törətdiyini bildirir. O, həmin ərazidə xidmət aparan yol polisi əməkdaşlarının dərhal yaxınlaşaraq lazımi köməklik göstərdiklərini qeyd edir. L.Osmanova nümunəvi xidmətlərinə, çətin hava şəraitində hərəkət iştirakçılarına və ona göstərdikləri köməkliyə görə BDYPİ YPXA-nın 4-cü taqımının əməkdaşlarına təşəkkürünü bildirir.

Salyan rayon sakini Ələddin Fərəcov narkotiklərin qanunsuz dövriyyəsinə qarşı mübarizənin gücləndirilməsində, eyni zamanda rayonda yaradılmış sabitliyə, əmin-amanlığa görə DİN rəhbərliyinə və vəzifə borclarının öhdəsindən layiqincə gələn RPŞ-nin əməkdaşlarına minnətdarlığını bildirir.

“Feysbuk” izləyicimiz Seymur Məhərrəmov səhifəmizə yazdığı təşəkkür məktubunda bildirir ki, fevralın 14-də şəxsi avtomobili ilə hərəkətdə olan zaman Babək prospektində övladının halı qəfil pisləşir. Həyəcanlı olduğundan avtomobilini idarə edə bilmədiyinə görə ərazidə xidmət aparan YPX əməkdaşlarını köməyə çağırır. Vətəndaş qeyd edir ki, əməkdaşlar çevik reaksiya göstərərək uşağın xəstaxanaya tez bir zamanda çatmasını təmin ediblər.

“İnstagram” səhifəmizin izləyicisi olan Xətai Bağırlı səhifədən etdiyi müraciətə tez bir zamanda baxılıb, tədbir görüldüyü üçün DİN rəhbərliyinə və BNMİ-nin əməkdaşlarına minnətdarlığını bildirir.

Bakı şəhər sakini Turan Abdullayev (turan988) DİN-in İnstagram səhifəsinə etdiyi müraciətdən sonra məsələnin həll olunduğu üçün təşəəkkür edib: “Polisin operativliyinə və çevikliyinə görə Sizə öz dərin minnətdarlığımı bildirirəm.”

Ağdaş rayonunun Şəkili kənd sakini Əvəz Əsgərov bir qrup kənd sakini adından torpaq sahələrinin zəbt olunması faktı ilə bağlı müraciətlərinə Ağdaş RPŞ-də obyektiv baxılaraq ədalətli həll olunduğuna görə DİN və Rayon Polis Şöbəsinin rəhbərliklərinə təşəkkürünü bildirir.

Qazax rayon Qazaxbəyli kənd sakini Raya Nəbiyeva DİN rəhbərliyinə ünvanladığı təşəkkür məktubunda baş vermiş oğurluq hadisəsi ilə bağlı müraciətinə operativ və obyektiv baxıldığına görə Qazax RPŞ-nin əməkdaşlarına minnətdarlığını ifadə edir.

Vətəndaş Arif Musayev müraciətinə tez bir zamanda baxılaraq probleminin həllini tapmasında ona göstərilən köməyə görə DİN rəhbərliyinə və Qazax RPŞ-nin şəxsi heyətinə minnətdarlığını bildirir.

Bakı şəhər sakini Zaur Əliyev üzləşdiyi problemin qısa zaman kəsiyində həll olunmasında göstərdikləri köməkliyə görə DİN rəhbərliyinə və Binəqədi Rayon Polis İdarəsinin əməkdaşlarına minnətdarlığını bildirir.