Goranboy və Gəncə şəhərlərindən “VAZ-2121” markalı iki avtomobili qaçırmaqda şübhəli bilinən Şəmkir rayon sakini R.Qasımov saxlanılıb

02.03.2023

Gəncə ŞBPİ 3-cü Polis Bölməsi əməkdaşlarının keçirdikləri əməliyyat tədbirləri nəticəsində Goranboy şəhərindən N.Əmiraslanova, Gəncə şəhərindən isə S.Tağıyevə məxsus “VAZ-2121” markalı iki  avtomobili qaçırmaqda şübhəli bilinən Şəmkir rayon sakini, əvvəllər məhkum olunmuş R.Qasımov saxlanılıb. Araşdırma aparılır.

Şərur rayonunun Yengicə kənd sakini N.Nəcəfovun evindən qanunsuz saxladığı silah-sursat aşkar olunaraq götürülüb

02.03.2023

Şərur Rayon Polis İdarəsi əməkdaşlarının keçirdikləri əməliyyat tədbiri nəticəsində Yengicə kənd sakini N.Nəcəfovun evinə baxış zamanı oradan qanunsuz saxladığı “TOZ-12” markalı yivli silah və 94 ədəd patron aşkar olunaraq götürülüb. Araşdırma aparılır. 

Şəmkir rayonunun Düyərli kəndi ərazisində “VAZ-21074” markalı avtomobillə yolu keçən rayon sakini P.Əliyeva vurulub

02.03.2023

Martın 2-də saat 20 radələrində Şəmkir rayonunun Düyərli kəndi ərazisində Tovuz rayon sakini T.Hüseynov idarə etdiyi “VAZ-21074” markalı avtomobillə yolu keçən rayon sakini P.Əliyevanı vurub və nəticədə piyada hadisə yerində ölüb.Baş İstintaq və Təhqiqat İdarəsi tərəfindən araşdırma aparılır.

Gün ərzində ölkə ərazisində qeydə alınan 100 cinayətin açılması təmin olunub

02.03.2023

Martın 2-də ölkə ərazisində qeydə alınan 100, əvvəlki dövrlərdən bağlı qalan 18 cinayətin açılması daxili işlər orqanlarının əməkdaşları tərəfindən təmin olunub.

Sabunçu rayonunda fevral ayında keçirilən əməliyyatlar zamanı narkotiklərin qanunsuz dövriyyəsi ilə məşğul olan 81 nəfər saxlanılıb

02.03.2023

Sabunçu Rayon Polis İdarəsinin Narkotiklərlə Mübarizə bölməsi, eləcə də ərazi polis şöbə və bölmələrinin əməkdaşları tərəfindən fevral ayı ərzində də Bakıxanov, Balaxanı, Ramana, Zabrat, Bilgəh, Pirşağı Kürdəxanı, Maştağa qəsəbələri və digər ərazilərdə narkotiklərin qanunsuz dövriyyəsini həyata keçirən şəxslərə qarşı əməliyyatlar davam etdirilib. Əməliyyatlar zamanı narkotiklərin qanunsuz dövriyyəsi ilə məşğul olan 81 nəfər saxlanılıb. Araşdırma zamanı müəyyən edilib ki, saxlanılanların bir neçəsi əvvəllər də eyni cinayətlər etdikləri üçün, yəni narkotiklərin qanunsuz dövriyyəsini təşkil etdikləri üçün məhkum olunmuş şəxslərdir. Həmin şəxslərin üzərindən, yaşadıqları evlərdən 21 kiloqram heroin, marixuana və psixotrop maddə olan metamfetamin aşkar edilib.Qeyd edək ki, saxlanılan şəxslərin bir neçəsinin Sabunçu rayonunda evlərdən və obyektlərdən oğurluq etdikləri də müəyyən edilib.  Onların hər biri barəsində İdarənin İstintaq Şöbəsində Cinayət işləri başlanılıb. Sabunçu rayonu ərazisində narkotiklərin qanunsuz dövriyyəsi ilə məşğul olan digər şəxslərin də tutulmaları istiqamətində polis əməkdaşları tərəfindən mübarizə tədbirləri davam etdirilir.

Gün ərzində ölkə ərazisində qeydə alınan 98 cinayətin açılması təmin olunub

01.03.2023

Martın 1-də ölkə ərazisində qeydə alınan 98, əvvəlki dövrlərdən bağlı qalan 32 cinayətin açılması daxili işlər orqanlarının əməkdaşları tərəfindən təmin olunub.

Ümumi çəkisi 19,4 kiloqramdan artıq narkotik vasitə aşkar olunaraq götürülüb

01.03.2023

Polis əməkdaşlarının martın 1-də respublika ərazisində keçirdikləri əməliyyat tədbirləri nəticəsində ümumi çəkisi 19,4 kiloqramdan artıq narkotik vasitə aşkar olunaraq götürülüb. Qanunsuz dövriyyədən çıxarılan narkotik vasitələr – 5,8 kiloqramdan artıq heroin, 3,2 kiloqrama yaxın marixuana, 5 kiloqrama yaxın tiryək, 660 qram həşiş, 4,7 kiloqramdan çox metamfetamin, 86 ədəd çətənə kolu, həmçinin 400 ədəd yüksək təsiredici xassəyə malik həblər olub. Bu istiqamətdə qətiyyətli mübarizə tədbirləri davam etdirilir. 

Ağstafa rayonu ərazisində idarə etdiyi avtomobildə saxlanılan Ağdaş rayon sakini N.İsrafilov və həmyerlisi E.Şirinovdan 1 kiloqramdan artıq heroin və 2 kiloqramdan artıq marixuana götürülüb

01.03.2023

Ağstafa Rayon Polis Şöbəsi əməkdaşlarının keçirdikləri əməliyyat tədbiri nəticəsində Saloğlu kəndi ərazisində Ağdaş rayon sakini N.İsrafilov idarə etdiyi “VAZ-21015” markalı avtomobildə həmyerlisi, əvvəllər məhkum olunmuş E.Şirinovla birgə saxlanılıb. Avtomobilə baxış zamanı onlara məxsus 1 kiloqram 220 qram heroin və 2 kiloqramdan artıq marixuana aşkar olunaraq götürülüb. 

Tovuz rayonunun Hunanlar kənd sakini E.Hüseynovun yetişdirdiyi çətənə kolları aşkar olunaraq götürülüb

01.03.2023

Tovuz Rayon Polis Şöbəsi əməkdaşlarının daxil olan məlumat əsasında keçirdikləri əməliyyat tədbiri nəticəsində Hunanlar kənd sakini E.Hüseynovun kultivasiya yolu ilə yetişdirdiyi 86 ədəd çətənə kolu aşkar olunaraq götürülüb. Araşdırma aparılır.  

Narkotik vasitənin təsiri altında avtomobil idarə edən şəxs saxlanılıb 

01.03.2023

Fevralın 28-də saat 11 radələrində Abşeron rayonunun Sulutəpə qəsəbəsi ərazisində manevr qaydasını pozan “KİA” markalı avtomobil Baş Dövlət Yol Polisi İdarəsinin əməkdaşları tərəfindən saxlanılıb. Sürücü, Bakı şəhər sakini E.Bağıyev şübhə doğurduğundan tibbi müayinədən keçirilməsi təmin edilib. Müayinənin nəticəsinə əsasən,  onun narkotik vasitənin təsiri altında olması müəyyən olunub. Avtomobil duracağa yerləşdirilib, E.Bağıyev barəsində İnzibati Xətalar Məcəlləsinin 333.1-ci maddəsinə əsasən inzibati protokol tərtib olunub. Şəxsi axtarış zamanı ondan 7 qrama yaxın marixuana da aşkar olunaraq götürülüb. Araşdırma aparılır.