Çiçək və Hökməli qəsəbələrində evlərdən oğurluq etməkdə şübhəli bilinən İmişli rayon sakini saxlanılıb

23.07.2023

Binəqədi RPİ 40-cı Polis Bölməsi əməkdaşlarının keçirdikləri əməliyyat tədbiri nəticəsində müxtəlif vaxtlarda Çiçək və Hökməli qəsəbələrində 2 evdən 2600 manat dəyərində qızıl-zinət əşyaları, 600 manat dəyərində məişət əşyaları və elektrik naqili, Çiçək qəsəbəsində yerləşən bir binanın qazanxanasından 1600 manat dəyərində mühərrik hissələri, elektrik naqili, təmir alətləri, 2 binanın zirzəmisindən 4250 manat dəyərində 4 ədəd velosiped, 2 ədəd monitor, müşahidə kamerası, istilik sistemləri, təmir alətləri və elektrik naqili oğurlamaqda şübhəli bilinən İmişli rayon sakini, əvvəllər narkotiklərlə əlaqəli cinayətə görə məhkum olunmuş Ş.Məmmədov müəyyən olunaraq saxlanılıb.Araşdırma aparılır.

Qaradağ rayonu Lökbatan qəsəbəsi ərazisində mobil telefon oğurlamaqda şübhəli bilinən Astara rayon sakini saxlanılıb

23.07.2023

İyulun 23-də Qaradağ rayonunun Lökbatan qəsəbəsi ərazisində Şəmkir rayon sakini Ə.Abbasovun mobil telefonunu oğurlamaqda şübhəli bilinən Astara rayon sakini S.Məmmədov Qaradağ Rayon Mühafizə İdarəsinin əməkdaşları tərəfindən saxlanılaraq 10-cu Polis Bölməsinə təhvil verilib. Araşdırma aparılır.

“Koroğlu” stansiyası ərazisində yerləşən mağazaların birindən oğurluq etməkdə şübhəli bilinən axtarışda olan paytaxt sakini saxlanılıb

23.07.2023

Metropolitendə Polis İdarəsi əməkdaşlarının keçirdikləri əməliyyat tədbiri nəticəsində iyulun 23-də metronun “Koroğlu” stansiyası ərazisində yerləşən mağazaların birində satıcının  mobil telefonunu oğurlamaqda şübhəli bilinən paytaxt sakini, əvvəllər oğurluq və narkotiklərlə əlaqəli cinayətlərə görə məhkum olunmuş X.İsmayılov saxlanılıb. Araşdırmalarla onun Cinayət Məcəlləsinin 177-ci (Oğurluq) maddəsi ilə axtarışda olması da müəyyən olunub.

Əmircan qəsəbə sakinindən narkotik maddələr aşkar olunaraq götürülüb

23.07.2023

Nizami Rayon Polis İdarəsi əməkdaşlarının keçirdikləri əməliyyat tədbiri nəticəsində saxlanılan Əmircan qəsəbə sakini R.Hüseynovdan 55 ədəd metadon həbi, 15 qrama yaxın marixuana aşkar olunub. Davam etdirilən tədbirlərlə onun  yaşadığı evə baxış zamanı oradan 105 ədəd metadon həbi, 47 qrama yaxın metamfetamin və 81 qramdan çox marixuana götürülüb. Araşdırma aparılır.

Keşlə qəsəbəsi ərazisində bir avtomobildən oğurluq etməkdə şübhəli bilinən Bakı şəhər sakinləri və Bərdə rayon sakini saxlanılıblar

23.07.2023

Nizami RPİ 23-cü Polis Bölməsi əməkdaşlarının keçirdikləri əməliyyat tədbiri nəticəsində iyulun 12-də Keşlə qəsəbəsi ərazisində “KİA” markalı bir avtomobildən pul, 2 ədəd mobil telefon və sənəd, iyulun 21-də M.Ağayev küçəsində “Ravon” markalı avtomobildən pul və mobil telefon, iyulun 22-də paytaxt sakini A.Quliyevin mobil telefonunu oğurlamaqda şübhəli bilinən Bakı şəhər sakinləri Y.Şirəliyev, F.Hacıyev və  Bərdə rayon sakini H.Əliyev müəyyən olunaraq saxlanılıblar. Araşdırma aparılır.

Nizami rayonu T.Abbasov küçəsindəki bir ofisdən oğurluq etməkdə şübhəli bilinən paytaxt sakini saxlanılıb

23.07.2023

Nizami RPİ 24-cü və 25-ci polis şöbələri əməkdaşlarının keçirdikləri əməliyyat tədbiri nəticəsində iyulun 17-də T.Abbasov küçəsindəki bir ofisdən noutbuk oğurlamaqda şübhəli bilinən paytaxt sakini, əvvəllər məhkum olunmuş F.Bağırov saxlanılıb. Araşdırmalarla onun rayon ərazisindəki bir klinikadan noutbuk, bir köşkdən isə 1120 manat dəyərində tütün məmulatı oğurlaması da müəyyən olunub. 

Naxçıvan Şəhər ərazisində yerləşən mağazalardan birinin qarşısından velosiped oğurlamaqda şübhəli bilinən kənd sakini saxlanılıb

23.07.2023

Naxçıvan Şəhər Polis İdarəsi əməkdaşlarının keçirdikləri əməliyyat tədbiri nəticəsində iyulun 22-də şəhər ərazisində yerləşən bazarda mağazalardan birinin qarşısından velosiped oğurlamaqda şübhəli bilinən Qaraxanbəyli kənd sakini S.Sadıqova saxlanılıb. Araşdırma aparılır. 

İsmayıllı rayon ərazisində bir şəxsin evinə baxış zamanı oradan marixuana aşkar olunaraq götürülüb

23.07.2023

İsmayıllı Rayon Polis Şöbəsi əməkdaşlarının keçirdikləri əməliyyat tədbiri nəticəsində şəhər sakini, əvvəllər məhkum olunmuş Ş.Talıbovun evinə baxış zamanı oradan 3 kiloqram 105 qramdan artıq marixuana aşkar olunaraq götürülüb.

Xətai rayonu ərazisində piyadanın ölümü ilə nəticələnən yol-nəqliyyat hadisəsi baş vermişdir

23.07.2023

İyulun 23-də saat 23 radələrində Xətai rayonu ərazisində Bakı şəhər sakini A.Bayramov idarə etdiyi “BMW” markalı avtomobillə yolu keçən 35-40 yaşlı qadını vurub və nəticədə piyada yerində ölüb.Xətai Rayon Polis İdarəsində araşdırma aparılır.

Quba rayonunun Zərdabi qəsəbəsi ərazisində ölümlə nəticələnən yol-nəqliyyat hadisəsi baş vermişdir

23.07.2023

İyulun 23-də saat 14 radələrində Quba rayonunun Zərdabi qəsəbəsi ərazisində qəsəbə sakini F.Yusifovun idarə etdiyi “VAZ-2107” və Xaçmaz rayon sakini A.Xantəmirovun idarə etdiyi “Mercedes” markalı avtomobillər toqquşub. Nəticədə F.Yusifov hadisə yerində ölüb, A.Xantəmirov və 3 sərnişini xəstəxanaya yerləşdirilib.Quba Rayon Polis Şöbəsində araşdırma aparılır.