Quba rayonu ərazisindəki evlərin birindən pul və qızıl-zinət əşyaları oğurlamaqda şübhəli bilinən rayon sakini S.Babaverdiyev saxlanılmışdır

21.02.2022

Quba RPŞ əməkdaşlarının keçirdikləri əməliyyat tədbirləri nəticəsində fevralın 21-də rayon ərazisindəki evlərin birindən 600 manat pul və 6150 manat dəyərində qızıl-zinət əşyaları oğurlamaqda şübhəli bilinən Mirzəməmmədkənd kənd sakini S.Babaverdiyev saxlanılmışdır.

Gəncə şəhəri ərazisində “VAZ-21011” markalı avtomobil divara çırpılmışdır

21.02.2022

Fevralın 22-də saat 1 radələrində Gəncə şəhəri ərazisində Anar Mehralıyev idarə etdiyi “VAZ-21011” markalı avtomobili divara vurmuşdur. Nəticədə sürücü və 2 sərnişini xəstəxanaya yerləşdirilmiş, sürücü orada ölmüşdür.Nizami (Gəncə) RPİ-də araşdırma aparılır.

Su Polisləri tərəfindən Ələt qəsəbəsində “Kalaşnikov” markalı avtomat satmaq istəyən şəxs saxlanılıb

21.02.2022

Su Nəqliyyatında Polis İdarəsinin əməkdaşları tərəfindən qanunsuz olaraq əllərdə saxlanılan odlu silah-sursatların aşkar edilməsi istiqamətində əməliyyat həyata keçirilib. Belə ki, İdarəyə Füzuli rayon sakini, əvvəllər Cinayət Məcəlləsinin müxtəlif maddələri ilə dəfələrlə məhkum olunmuş Əbülfəz Suanverdiyevdə silah olması və satmaq istəməsi barədə əməliyyat məlumatı daxil olub. Həmin şəxs odlu silahı 6000 manata satmaq istəyən zaman İdarənin Ələt qəsəbəsində yerləşən inzibati ərazisində şübhəli şəxs kimi saxlanılıb. Onun əlindəki çantaya baxış zamanı 1 ədəd atəşə yararlı “Kalaşnikov” markalı avtomat silah, 2 ədəd daraq və 60 ədəd parton aşkar olunaraq götürülüb. Əbülfəz Suanverdiyev odlu silahı bir müddət əvvəl əldə etdiyini və polisə təhvil verməyərək gizlətdiyini bildirib. Faktla bağlı Su Nəqliyyatında Polis İdarəsində Cinayət Məcəlləsinin müvafiq maddəsi ilə cinayət işi başlanılıb. Əbülfəz Suanverdiyev barəsində məhkəmənin qərarı ilə həbs qətimkan tədbiri seçilib, istintaq tədbirləri davam edirilir.Su Polisləri tərəfindən qanunsuz olaraq balıqçılıqla məşğul olan, xüsusən də nərəcinsli balıqların ovlanmasını həyata keçirən, Xəzər dənizi vasitəsi ilə qaçaqmalçılıq yolu ilə ölkəyə narkotik vasitələrin gətirilməyə çalışan, eləcə də adı “Qırmızı Kitab”a düşən quşların ovlanması və digər ekoloji cinayətlər törədən şəxslərin müəyyən edilərək saxlanılması istiqamətində tədbirlər davam etdirilir. Balıqçılıqla məşğul olan şəxslərin diqqətinə çatdırılır ki, dövlət rüsumu ödəməklə kvotalar əldə edərək icazə verilən dövrlərdə müəyyən çəkidə və qaydalara uyğun balıq ovu ilə məşğul olmaq mümkündür.İdarənin əməkdaşları tərəfindən həmçinin qanun pozuntusuna yol verərək Xəzər dənizinin dibi ilə çəkilən dəmir boru kəmərləri və müxtəlif təyinatlı naqilləri kəsib satışını təşkil edən şəxslərə qarşı da mübarizə, eləcə də əməliyyat tədbirləri mütəmadi olaraq aparılır. Sonda vətəndaşlardan Xəzər dənizində və su hövzələrində hər hansı bir qanun pozuntusu ilə rastlaşdıqları halda Su Nəqliyyatında Polis İdarəsinin 012-433-38-12 və 012-433-38-02 nömrələrinə zəng edərək məlumat vermələri xahiş olunur.

Gün ərzində törədilmiş 41 cinayətin üstü “isti izlər”lə açılmışdır

20.02.2022

Respublikanın daxili işlər orqanları tərəfindən gün ərzində törədilmiş 41 cinayətin üstü “isti izlər”lə açılmışdır.

Qanunsuz saxlanılan silah-sursatla bağlı əməliyyat tədbirləri davam etdirilir

20.02.2022

Polis əməkdaşlarının keçiridikləri əməliyyat tədbirləri nəticəsində fevralın 19-da və 20-də respublikanın ayrı-ayrı rayonlarında vətəndaşlardan qanunsuz saxladıqları müxtəlif markalı ümumilikdə 2 ədəd ov tüfəngi götürülüb. Aparılan profilaktiki tədbirlər nəticəsində qanunsuz saxlanılan 3 silah könüllü olaraq polisə təhvil verilib.Faktlar üzrə polis şöbələrində müvafiq araşdırmalar aparılır.

Koronavirus xəstələri ictimai yerlərdə aşkar edilərək saxlanılıb

20.02.2022

Fevralın 19-da və 20-də polis əməkdaşları tərəfindən respublika ərazisində 24 nəfər aktiv koronavirus xəstəsi ictimai yerlərdə aşkar edilərək saxlanılıb. Polis əməkdaşları "COVİD-19" virusuna yoluxaraq ev şəraitində müalicədə olmasına baxmayaraq yaşadığı evləri tərk etmiş həmin şəxslərlə izahedici söhbətlər aparıb, tibbi prosedurları gözləməklə yaşadığı evlərə qaytarıb və bu barədə müvafiq səhiyyə qurumları məlumatlandırılıb.Ev şəraitində müalicə təyin edilməsinə baxmayaraq, yaşayış yerini tərk edən 4  nəfər barəsində isə Cinayət Məcəlləsinin 139-1.1 (epidemiya əleyhinə və karantin rejimlərinin pozulması) maddəsi ilə cinayət işi başlanılıb. 

Bakı şəhərində və respublika ərazisində 763 toy şənliyinin monitorinqi həyata keçirilib   

20.02.2022

19-20 fevral tarixlərində Daxili İşlər Nazirliyinin, Qida Təhlükəsizliyi Agentliyinin və İqtisadiyyat Nazirliyi yanında Dövlət Vergi Xidmətinin nümayəndələri Bakı şəhərində və respublika ərazisində 763 toy şənliyinin monitorinqini həyata keçirib.   Monitorinq 758 şadlıq sarayında, 5 şəxsi həyətyanı sahədə keçirilən şənlikləri əhatə edib.Monitorinqlər nəticəsində toy şənliklərinin keçirilməsində xüsusi karantin rejimi qaydalarını pozduqlarına görə:- 6 nəfər İnzibati Xətalar Məcəlləsinin 211-ci (Epidemiya əleyhinə rejimin, sanitariya-gigiyena və karantin rejimlərinin pozulması) maddəsinə əsasən cərimə olunub;  -  1 nəfər İnzibati Xətalar Məcəlləsinin 211-ci (Epidemiya əleyhinə rejimin, sanitariya-gigiyena və karantin rejimlərinin pozulması) maddəsi ilə inzibati qaydada həbs edilib; - 1 nəfər barədə material baxılması üçün məhkəməyə göndərilib;- 1191 nəfər “COVID-19” pasportu olmadığına görə şənliyə buraxılmayıb.  

Paytaxtın Nizami rayonu ərazisində Sabirabad rayon sakinləri G.Qaraxanovanı və onun iki azyaşlı uşağını tamah məqsədi ilə qəsdən öldürməkdə şübhəli bilinən Ə.Əliyev tutularaq istintaqa təhvil verilmişdir

20.02.2022

Nizami RPİ-nin 24-cü Polis Şöbəsinə fevralın 20-də saat 14 radələrində rayon ərazisində kirayədə yaşadıqları evdə Sabirabad rayon sakinləri Gülnar Qaraxanovanın və azyaşlı övladları - qızı Lamiyənin və oğlu Ataxanın kəsici-deşici alətlə aldıqları xəsarətlərdən ölmələri barədə məlumat daxil olmuşdur.  Dərhal polis və prokurorluq əməkdaşları tərəfindən məhkəmə-tibb ekspertinin iştirakı ilə hadisə yerinə və meyitlərə baxış keçirilmişdir.Polis əməkdaşlarının keçirdikləri intensiv əməliyyat-axtarış tədbirləri nəticəsində tamah məqsədi ilə bu cinayət əməlini törətməkdə şübhəli bilinən Sabirabad rayon sakini, əvvəllər məhkum olunmuş Əhəd Əliyev tutularaq istintaqa təhvil verilmişdir.  Faktla bağlı Nizami rayon prokurorluğunda Cinayət Məcəlləsinin 120.2.7 (iki və ya daha çox şəxsi öldürmə) maddəsi ilə cinayət işi başlanmışdır.  Hazırda cinayət işi üzrə zəruri istintaq-əməliyyat tədbirləri davam etdirilir.

Binəqədi rayonu ərazisindəki evlərin birində Bakı şəhər sakini E.Qasımovu hədəyərək pulunu almaqda şübhəli bilinən M.Tarverdiyev saxlanılmışdır

20.02.2022

Binəqədi RPİ-nin 7-ci Polis Bölməsinə fevralın 20-də rayon ərazisindəki evlərin birində Bakı şəhər sakini E.Qasımovun sözlə hədələnərək 100 manatının alınması barədə məlumat daxil olmuşdur.Polis əməkdaşlarının keçirdikləri əməliyyat tədbirləri nəticəsində soyğunçuluğu törətməkdə şübhəli bilinən Abşeron rayon sakini M.Tarverdiyev müəyyən edilərək saxlanılmışdır. Binəqədi RPİ-də araşdırma aparılır.

Biləsuvar rayonunun Nəsimikənd kəndi ərazisindən “VAZ-21074” markalı avtomobili qaçırmaqda şübhəli bilinən kənd sakini N.Aşurov avtomobillə birgə saxlanılmışdır

20.02.2022

Biləsuvar Rayon Polis Şöbəsinə fevralın 20-də Nəsimikənd kəndi ərazisindən kənd sakini V.Şəbizadəyə məxsus “VAZ-21074” markalı avtomobilin qaçırılması barədə məlumat daxil olmuşdur. Polis əməkdaşlarının keçirdikləri əməliyyat-axtarış tədbirləri nəticəsində nəqliyyat vasitəsini qaçırmaqda şübhəli bilinən kənd sakini N.Aşurov müəyyən edilərək avtomobillə birgə saxlanılmışdır. Biləsuvar RPŞ-də araşdırma aparılır.