Biləcəridə son 1 həftə ərzində narkotiklərin qanunsuz dövriyyəsinə qarşı həyata keçirilən əməliyyatlar zamanı ümumilikdə 44 nəfər saxlanılıb

09.09.2022

Binəqədi Rayon Polis İdarəsinin əməkdaşları tərəfindən daxil olmuş məlumatlar əsasında Biləcəri qəsəbəsində son 1 həftə ərzində narkotiklərin qanunsuz dövriyyəsinə qarşı həyata keçirilən əməliyyatlar zamanı ümumilikdə 44 nəfər saxlanılıb. Onların üzərindən, Biləcəri qəsəbəsi ərazisində yaşadıqları evlərdən külli miqdarda yüksək təsiredici xassəyə malik narkotik maddələr aşkar edilib. Daxil olmuş əməliyyat məlumatı əsasında Binəqədi rayonunun digər kənd və qəsəbələrində son  1 ay ərzində keçirilən əməliyyatlar zamanı narkotiklərin qanunsuz dövriyyəsi ilə məşğul olan daha 46 nəfər tutularaq istintaqa cəlb edilib. Bu şəxslərdən Akşin Rüstəmov, Şəmistan İngiliszadə, Xəyala Hacıyeva, Asim Xanəliyev, Ramil Davudov və Yalçın Əmiraslanov birbaşa olaraq Binəqədi rayonunda narkotik maddələrin satışını təşkil edən şəxslər olublar. Saxlanılan digər şəxslər isə onlar tərəfindən müxtəlif şirnikləndirici təkliflər müqabilində narkokuryerliyə cəlb edilənlər olublar. Bu şəxslərin üzərlərinə, evlərinə və avtomobillərinə baxış zamanı ümumilikdə 10 kiloqrama yaxın müxtəlif növ narkotik vasitə və psixotrop tərkibli  həblər aşkar olunub.Saxlanılanların cinayət əlaqələrinin müəyyən edilməsi, həmçinin Binəqədi rayonu ərazisində narkotiklərin qanunsuz dövriyyəsi ilə məşğul olan digər şəxslərin tutulması istiqamətində polis əməkdaşları tərəfindən intensiv mübarizə tədbirləri davam etdirilir.

Son 14 gündə 29 narkotacir tutulub, onlardan 120 kiloqram narkotik maddə aşkar edilib

09.09.2022

Daxili İşlər Nazirliyi Baş Narkotiklərlə Mübarizə İdarəsinin əməkdaşları tərəfindən paytaxt və bölgələrdə son 14 gün ərzində keçirilən əməliyyatlar zamanı ölkə ərazisinə qaçaqmalçılıq yolu ilə külli miqdarda narkotik maddələr keçirən və onlayn, eləcə də digər üsullarla narkotiklərin satışını təşkil edən mütəşəkkil dəstənin daha 29 nəfər üzvü saxlanılıb. Həmin şəxslərdən ümumilikdə 120 kiloqram narkotik vasitə və psixotrop maddə, eləcə də 7057 ədəd psixotrop tərkibli həb aşkar edilib.Daxil olmuş məlumat əsasında həyata keçirilən xüsusi əməliyyatlar zamanı Surxay Mikayılov Astara rayonu, Urfan Məsmalıyev Gəncə şəhəri, Talehə Paşayeva və Cabir Məmmədov isə paytaxt ərazisində tutulublar. Bu şəxslərdən, idarə etdikləri avtomobillərdən, eləcə də yaşadıqları evlərdən ümumilikdə 103 kiloqram yüksək təsiredici narkotik maddə, o cümlədən 29 kiloqram heroin, 12 kiloqram tiryək, 13 kiloqram metamfetamin, 49 kiloqram marixuana, 7000 ədəd psixotrop tərkibli həb, elektron tərəzilər, narkotik vasitələrin satışından əldə etdikləri nağd pul vəsaitləri, qanunsuz pul dövriyyəsində istifadə etdikləri plastik kartlar və qeyd dəftərçələri  aşkar edilib. Adları çəkilən şəxslər paytaxt Bakı, həmçinin cənub və qərb bölgələri üzrə narkotiklərin əsas tədarükçülərindən biri olublar. Adları çəkilən 4 nəfərin şəbəkəsinə daxil olan şəxslərin saxlanılması istiqamətində keçirilən əməliyyat tədbirlərinin davamı narkotiklərin intensiv satışını  təşkil edən daha 25 nəfər saxlanılıb. Həmin şəxslərdən isə 17 kiloqram müxtəlif növ narkotik vasitə və iş üçün əhəmiyyət kəsb edən digər maddi sübutlar aşkar olunub.Faktlarla bağlı Cinayət Məcəlləsinin müvafiq maddələri ilə cinayət işləri başlanılıb, saxlanılan şəxslər barəsində həbs qətimkan tədbiri seçilib.Bir daha vətəndaşları narkotiklərdən uzaq durmağa, “ağ ölüm”lə mübarizədə polis əməkdaşları ilə həmrəy olmağa çağırırıq.

Gün ərzində ölkə ərazisində qeydə alınan 77 cinayətin açılması təmin olunub

08.09.2022

Sentyabrın 8 -də ölkə ərazisində qeydə alınan 77, əvvəlki dövrlərdən bağlı qalan 11 cinayətin açılması daxili işlər orqanlarının əməkdaşları tərəfindən təmin olunub.

Cəlilabad rayonunun Uzuntəpə kəndi ərazisində “Mercedes” və “İsuzu” markalı avtomobillər toqquşub

08.09.2022

Sentyabrın 9-da saat 1 radələrində Cəlilabad rayonunun Uzuntəpə kəndi ərazisində Masallı rayon sakini M.Talıbovun idarə etdiyi “Mercedes” markalı avtomobillə Bakı şəhər sakini R.Əliyevin idarə etdiyi “İsuzu” markalı yük avtomobili toqquşub. Nəticədə M.Talıbovun sərnişinlərindən – həyat yoldaşı Zümrüd hadisə yerində ölüb, özü və gəlini xəstəxanaya yerləşdirilib,vəziyyətləri ağırdır.Baş İstintaq və Təhqiqat İdarəsi tərəfindən araşdırma aparılır.

Xətai rayonunun Babək prospektində “Honda” markalı avtomobillə Xaçmaz rayon sakini E.Əlibəyov vurulub

08.09.2022

Sentyabrın 8-də saat 23 radələrində Xətai rayonunun Babək prospektində Bakı şəhər sakini A.Zamanov idarə etdiyi “Honda” markalı avtomobillə yolu keçən Xaçmaz rayon sakini Elmar Əlibəyovu vurub və nəticədə piyada hadisə yerində ölüb.Xətai RPİ-də araşdırma aparılır.

Xırdalan şəhəri ərazisində iki vətəndaşdan pul oğurlamaqda şübhəli bilinən Sumqayıt şəhər sakini Ə.Bayramov saxlanılıb

08.09.2022

Abşeron RPİ əməkdaşlarının keçirdikləri əməliyyat-axtarış tədbirləri nəticəsində  iyulun 21-də və 22-də Xırdalan şəhəri ərazisində şəhər sakinləri F.Mirzəağayevanın 350 manat, D.Həşimovanın isə 1400 manat pulunu oğurlamaqda şübhəli bilinən Sumqayıt şəhər sakini Ə.Bayramov saxlanılıb.

Şamaxı rayonunun bir neçə kəndində dəmir boru, dəmir dirəklər və qaz borularını oğurlamaqda şübhəli bilinən şəxslər saxlanılıblar

08.09.2022

Şamaxı RPŞ əməkdaşlarının keçirdikləri əməliyyat tədbirləri nəticəsində iyunun 2-dən avqustun 22-dək olan müddətdə Kərkənc kəndi ərazisində rayon Qaz İdarəsinə məxsus istismardan çıxarılmış dəmir borunun 120 metrlik hissəsini, Kərkənc-Adnalı kəndi ərazisində “Azərenerji” ASC-yə məxsus istismardan çıxarılmış 2 ədəd dəmir dirəyi  və Dəmirçi kəndi ərazisində “Azəriqaz” İB-yə məxsus qaz borusunun 86,5 metrlik hissəsini oğurlamaqda şübhəli bilinən Şamaxı şəhər sakinləri F.Atakişiyev, əvvəllər məhkum olunmuşlar - F.Hümbətov və T.Daşdəmirov saxlanılıblar.

Ağdam rayonunun Qasımbəyli qəsəbə sakini Ş.Hüseynovun həyətindən çətənə kolları və marixuana aşkar edilərək götürülüb

08.09.2022

Ağdam RPŞ əməkdaşlarının keçirdikləri “Xaşxaş-2022” şərti adlı kompleks əməliyyat-axtarış və profilaktik tədbirlər nəticəsində Qasımbəyli qəsəbə sakini Ş.Hüseynovun həyətindən kultivasiya yolu ilə yetişdirilən 7 ədəd çətənə kolu və 50 qram marixuana aşkar edilərək götürülüb.

Sabirabad rayonunun Şəhriyar kənd sakini Q.Hüseynovun həyətindən çətənə kolları və marixuana aşkar edilərək götürülüb

08.09.2022

Sabirabad RPŞ əməkdaşlarının keçirdikləri “Xaşxaş-2022” şərti adlı kompleks əməliyyat-axtarış və profilaktik tədbirlər nəticəsində Şəhriyar kənd sakini Q.Hüseynovun həyətindən kultivasiya yolu ilə yetişdirilən 8 ədəd çətənə kolu və 430 qram marixuana aşkar edilərək götürülüb.

Sabunçu rayonu Balaxanı, Ramana, Maştağa və Zabrat qəsəbələrində ötən gecə keçirilən əməliyyatlar zamanı narkotiklərin qanunsuz dövriyyəsi ilə məşğul olan və üzərində odlu silah saxlayan 23 nəfər saxlanılıb

08.09.2022

Sabunçu Rayon Polis İdarəsinin, ərazi polis şöbə və bölmələrinin əməkdaşları tərəfindən ötən gün daxil olmuş məlumatlar əsasında Balaxanı, Ramana, Maştağa və Zabrat qəsəbələrində narkotiklərin qanunsuz dövriyyəsinə və üzərində odlu silah saxlayan şəxslərə qarşı əməliyyatlar keçirilib, ümumilikdə 23 nəfər saxlanılıb. Araşdırma zamanı müəyyən edilib ki, saxlanılanların bir neçəsi əvvəllər məhkum olunmuş şəxslərdir. Həmin şəxslərin üzərindən, yaşadıqları evlərdən 2 kiloqramdan artıq müxtəlif növ narkotik maddə aşkar edilib. Onlar əldə etdikləri narkotiklərin qeyd edilən qəsəbələrdə satışını təşkil ediblər. Daxil olmuş əməliyyat məlumatı əsasında Zabrat qəsəbəsində keçirilən daha bir tədbir zamanı əvvəllər məhkum olunmuş Salman Şirinov saxlanılıb. Onun yaşadığı evinə baxış zamanı 1 ədəd qundağı və lüləsi kəsilmiş “İJ-18” markalı odlu silah, 7 ədəd patron və 2 ədəd “F-1” markalı qumbara aşkar edilib. Saxlanılanların cinayət əlaqələrinin müəyyən edilməsi, həmçinin Sabunçu rayonu ərazisində narkotiklərin qanunsuz dövriyyəsi ilə məşğul olan digər şəxslərin tutulması istiqamətində polis əməkdaşları tərəfindən mübarizə tədbirləri davam etdirilir.