Xəzər rayonunun Binə qəsəbəsindəki evlərdən birinin həyətində yerləşən qarajdan təmir-tikinti alətləri və məişət əşyaları oğurlamaqda şübhəli bilinən B.Şirinov saxlanılıb

13.09.2022

Xəzər RPİ 3-cü Polis Şöbəsi əməkdaşlarının keçirdikləri əməliyyat tədbiri nəticəsində Binə qəsəbəsindəki evlərdən birinin həyətində yerləşən qarajdan 1200 manat dəyərində təmir-tikinti alətləri və məişət əşyaları oğurlamaqda şübhəli bilinən qəsəbə sakini  B.Şirinov saxlanılıb. Ətrafında aparılan tədbirlərlə onun daha bir evdən 1335 manat dəyərində televizor, səsgücləndirici, samovar və təmir-tikinti alətləri oğurlaması da müəyyən olunub. Araşdırma aparılır.  

Binəqədi qəsəbəsi ərazisindən “Mercedes” markalı avtomobili qaçırmaqda şübhəli bilinən P.Tağıyev və S.Zeynalov saxlanılıblar

13.09.2022

Xəzər RPİ-nin Dövlət Yol Polisi Şöbəsində “Mercedes” markalı bir avtomobilin cəriməsi yoxlanılarkən onun qaçırılması aşkar olunub. Avtomobil cərimə meydançasına yerləşdirilib. Araşdırmalarla Bakı şəhər sakini P.Tağıyev və Saatlı rayon sakini S.Zeynalovun Binəqədi qəsəbəsi ərazisindən qaçırdıqları Lənkəran rayon sakini R.Nəsirova məxsus nasaz vəziyyətdə olan “Mercedes” markalı avtomobili Lerik rayon sakinləri N.Qasımova və əmisi oğluna satmaları müəyyən olunub.Binəqədi RPİ 4-cü Polis Şöbəsi əməkdaşlarının keçirdikləri əməliyyat tədbirləri nəticəsində bu əməli törətməkdə şübhəli bilinən P.Tağıyev və S.Zeynalov saxlanılıblar. Araşdırma aparılır. 

Oğurluq etdiyinə görə tutulan Q.Hüseynovun Binəqədi rayonu ərazisindəki daha 6 evdən oğurluq etməsi müəyyən olunub

13.09.2022

Binəqədi RPİ 5-ci Polis Bölməsinin əməkdaşları tərəfindən oğurluq etdiyinə görə tutulan Q.Hüseynovun rayon ərazisindəki daha 6 evdən su sayğaclarını oğurlaması da müəyyən olunub. Araşdırma aparılır.

Səbail rayonu ərazisində 1500 manat dəyərində mopedi oğurlamaqda şübhəli bilinən Salyan rayon sakini V.Əzizov saxlanılıb

13.09.2022

Səbail RPİ-nin 8-ci Polis Bölməsinə Buxta küçəsindən R.Əliyevə məxsus 1500 manat dəyərində “Moon” markalı mopedin oğurlanması barədə məlumat daxil olub.Polis əməkdaşlarının keçirdikləri əməliyyat-axtarış tədbirləri nəticəsində oğurluğu törətməkdə şübhəli bilinən Salyan rayon sakini V.Əzizov müəyyən olunaraq saxlanılıb. Araşdırma aparılır. 

Sumqayıt şəhəri ərazisində bir sıra oğurluq hadisələrini törətməkdə şübhəli bilinən Abşeron rayon sakini F.Zeynalov saxlanılıb

13.09.2022

Sumqayıt ŞPİ 4-cü Polis Bölməsi əməkdaşlarının keçirdikləri əməliyyat tədbiri nəticəsində şəhər sakinləri F.Şükürovun, E.Bağırovun, Ü.Qafarovanın velosipedlərini, bir mağazadan 800 manat dəyərində telefon aksesuarları, mobil nömrələr, səsgücləndirici və fen oğurlamaqda şübhəli bilinən Abşeron rayon sakini, əvvəllər məhkum olunmuş F.Zeynalov saxlanılıb. Araşdırma aparılır.

Bərdə rayonunda yaşayan Ç.Əliyevin həyətindən 9 baş qoyun oğurlamaqda şübhəli bilinən Gəncə şəhər sakini K.İsmayılov saxlanılıb

13.09.2022

Bərdə RPŞ əməkdaşlarının keçirdikləri əməliyyat tədbiri nəticəsində Ç.Əliyevin həyətindən 1700 manat dəyərində 9 baş qoyun oğurlamaqda şübhəli bilinən Gəncə şəhər sakini, əvvəllər məhkum olunmuş K.İsmayılov saxlanılıb. Araşdırma aparılır. 

Quba rayonunun Yuxarı Xanəgah kəndi ərazisində yabanı halda bitmiş çətənə kolları məhv edilib

13.09.2022

Quba RPŞ-nin əməkdaşları tərəfindən Yuxarı Xanəgah kəndi ərazisində yabanı halda bitmiş 1 ton 813 kiloqram  çəkidə 2755 ədəd çətənə kolu aşkar olunaraq məhv edilib.

Xəzər rayonunun Binə qəsəbəsi ərazisində “Opel” markalı avtomobillə piyada vurulub

13.09.2022

Sentyabrın 13-də saat 23 radələrində Xəzər rayonunun Binə qəsəbəsi ərazisində qəsəbə sakini R.Kərimli idarə etdiyi “Opel” markalı avtomobillə yolu keçən həmyerlisi Fuad Mustafayevi vurub və nəticədə piyada hadisə yerində ölüb.Xəzər Rayon Polis İdarəsində araşdırma aparılır.

Polis ötən gecə “Papanin” və “Kubinka”da narkotik vasitələrin qanunsuz dövriyysi ilə məşğul olan şəxslərə qarşı daha bir əməliyyat keçirib – 16 nəfər saxlanılıb

13.09.2022

Nəsimi Rayon Polis İdarəsinin əməkdaşları tərəfindən ötən gecə rayonun “Papanin”, “Kubinka” kimi tanınan ərazilərində - Şəmsi Bədəlbəyli, Asəf Zeynallı və Namiq Məlikov küçələrində daha bir əməliyyat keçirilib. Tədbir zamanı qeyd edilən ərazilərdə narkotiklərin qanunsuz dövriyyəsi ilə məşğul olan Hüseyn Muradov və onunla birlikdə narkotik maddələrin satışını həyata keçirən daha 15 nəfər saxlanılıb. Həmin şəxslərdən ümumilikdə 2 kiloqrama yaxın heroin, tiryək və psixotrop maddə olan metamfetamin aşkar edilib. Saxlanılanlar narkotik vasitələri sosial şəbəkələrdə tanımadıqları xarici ölkə vətəndaşlarından onlayn yolla şəxsi istifadələri ilə yanaşı paytaxt ərazisində satmaq məqsədi ilə əldə etdiklərini bildiriblər. Faktlarla bağlı toplanan materiallar Nəsimi RPİ-nin İstintaq Şöbəsinə göndərilib. Bu şəxslərin hər biri barəsində məhkəmənin qərarı ilə həbs qətimkan tədbiri seçilib. Saxlanılanların cinayət əlaqələrinin müəyyən edilməsi, həmçinin Nəsimi rayonu ərazisində narkotiklərin qanunsuz dövriyyəsi ilə məşğul olan digər şəxslərin tutulmaları istiqamətində polis əməkdaşları tərəfindən əməliyyatlar davam etdirilir. 

Sumqayıtda yol polisləri yeni tədris ilinin başlanması ilə əlaqədar olaraq avtobus sürücülərinə xəbərdarlıq edib

13.09.2022

Sumqayıt Şəhər Polis İdarəsinin Dövlət Yol Polisi Şöbəsinin əməkdaşları tərəfindən yeni tədris ilinin başlanması ilə əlaqədar olaraq hərəkətin təhlükəsizliyi ilə bağlı müvafiq tədbirlər görülüb. Bu məqsədlə yol polisləri tərəfindən şəhər ərazisində yerləşən bütün təhsil müəssisələrinin olduğu küçə və prospektlərdə müşahidələr aparılıb, aşkar olunan çatışmazlıqlar aradan qaldırılıb. Təhsil ocaqlarının yaxınlığında yol nişanları quraşdırılıb, köhnələri yenisi ilə əvəz edilib, eləcə də yeni nişanlanma xətləri çəkilib. Bununla da Sumqayıt şəhərində yerləşən məktəblərin qarşısında hərəkətin təhlükəsizliyi təmin edilib.Həmçinin Sumqayıt Şəhər Polis İdarəsinin Dövlət Yol Polisinin əməkdaşları şəhər ərazisində fəaliyyət göstərən sərnişin avtobuslarının sürücüləri ilə də profilaktik görüş keçirib. Sürücülərə yeni tədris ilinin başlanması ilə bağlı, xüsusən məktəblərin yerləşdiyi küçə və prospektlərdə hərəkət zamanı diqqətli olmağın vacibliyi barədə məlumat verilib. Sürücülərin diqqətinə çatdırılıb ki, şagirdlər avtobuslardan düşən zaman arxa tərəfə doğru hərəkət etməyin vacibliyi barədə mütəmadi olaraq məlumatlandırılsın. Belə olan halda əks və eyni istiqamətdə hərəkət edən avtomobillər həm sərnişini görə bilir, həm də piyadalar avtomobillərə uyğun hərəkətlərini nizamlaya bilirlər.Qeyd edək ki, Sumqayıt şəhərində yol polisləri tərəfindən bu cür profilaktik tədbirlər mütəmadi olaraq davam etdiriləcək.