Culfa rayonunun Yaycı kəndi ərazisində “Volkswagen” markalı avtomobil aşmışdır

03.01.2022

Yanvarın 3-də saat 14 radələrində Culfa rayonunun Yaycı kəndi ərazisində Ordubad rayon sakini Hüseynqulu Həsənov idarə etdiyi “Volkswagen” markalı avtomobili aşırmışdır. Nəticədə avtomobildəki sərnişin Elxan Həsənov hadisə yerində, sürücü isə xəstəxanaya aparılarkən yolda ölmüşdür.Culfa RPŞ tərəfindən araşdırma aparılır.

Şərur rayonunun Kərimbəyli kəndi ərazisində “VAZ-21074” markalı avtomobil su kanalına aşmışdır

03.01.2022

Yanvarın 3-də saat 10 radələrində Şərur rayonunun Kərimbəyli kəndi ərazisində kənd sakini Cavid Paşayev idarə etdiyi “VAZ-21074” markalı avtomobili su kanalına aşırmışdır. Nəticədə sürücü suda boğularaq ölmüşdür.Şərur RPİ tərəfindən araşdırma aparılır.

Masallı rayonunun Qızılağac kəndi ərazisində “VAZ-2107” markalı avtomobillə kənd sakini E.Musayev vurulmuşdur

03.01.2022

Yanvarın 3-də saat 21 radələrində Masallı rayonunun Qızılağac kəndi ərazisində kənd sakini Y.Abdullayev idarə etdiyi “VAZ-2107” markalı avtomobillə yolu keçən həmkəndlisi Elbrus Musayevi vurmuşdur. Nəticədə piyada aldığı xəsarətlərdən hadisə yerində ölmüşdür.Masallı RPŞ tərəfindən araşdırma aparılır.

Goranboy rayon sakini M.Qarayevin idarə etdiyi avtomobil aşmışdır

03.01.2022

Yanvarın 3-də saat 22 radələrində Goranboy rayonunun Quşçular kəndi ərazisində Nizami kənd sakini Mahir Qarayev idarə etdiyi “Mercedes” markalı avtomobili aşırmışdır. Nəticədə sürücü aldığı xəsarətlərlə xəstəxanaya yerləşdirilmiş və orada ölmüşdür.Goranboy RPŞ tərəfindən araşdırma aparılır.

Paytaxt sakini Ə.Vəliyevin bank kartından 800 manat oğurlamaqda şübhəli bilinən S.Ağayev saxlanılmışdır

03.01.2022

Binəqədi RPİ 7-ci Polis Bölməsi əməkdaşlarının keçirdikləri əməliyyat-axtarış tədbirləri nəticəsində yanvarın 1-də Ə.Vəliyevin bank kartından 800 manat pulu oğurlamaqda şübhəli bilinən paytaxt sakini S.Ağayev saxlanılmışdır.

Narkotiklərin qanunsuz dövriyyəsində şübhəli bilinən paytaxt sakini X.Allahverdiyev saxlanılmışdır

03.01.2022

Nərimanov RPİ 18-ci Polis Şöbəsi əməkdaşlarının keçirdikləri əməliyyat tədbirləri nəticəsində narkotiklərin qanunsuz dövriyyəsində şübhəli bilinən paytaxt sakini, əvvəllər məhkum olunmuş X.Allahverdiyev saxlanılmışdır. Şəxsi axtarış zamanı ondan 1 kiloqram 65 qram heroin aşkar edilərək götürülmüşdür.

Xəzər bağlar sahəsindəki evlərin birindən məişət əşyaları oğurlamaqda şübhəli bilinən Sumqayıt şəhər sakini R.Babayev saxlanılmışdır

03.01.2022

Sumqayıt ŞPİ 4-cü Polis Bölməsi əməkdaşlarının keçirdikləri əməliyyat-axtarış tədbirləri nəticəsində ötən ilin dekabr ayının 26-dan cari ilin yanvar ayının 2-dək olan müddətdə Xəzər bağlar sahəsindəki evlərin birindən 4000 manat dəyərində məişət əşyaları oğurlamaqda şübhəli bilinən şəhər sakini R.Babayev saxlanılmışdır.

Narkotiklərin qanunsuz dövriyyəsində şübhəli bilinən Bakı şəhər sakini E.Abbasov saxlanılmışdır

03.01.2022

Gəncə şəhər BPİ əməkdaşlarının şəhər ərazisində keçirdikləri əməliyyat tədbirləri nəticəsində narkotiklərin qanunsuz dövriyyəsində şübhəli bilinən Bakı şəhər sakini E.Abbasov saxlanılmışdır. Şəxsi axtarış zamanı ondan 21,89 qram metamfetamin və 20,26 qram heroin aşkarlanmışdır. Davam etdirilən tədbirlərlə onun idarə etdiyi “Ford” markalı avtomobilə baxış zamanı oradan 50 qram metamfetamin və 984 qram heroin aşkar edilərək götürülmüşdür.

Masallı rayonu ərazisindəki 3 evdən pul və qızıl-zinət əşyaları oğurlamaqda şübhəli bilinən M.Fərzəliyev saxlanılmışdır

03.01.2022

Masallı RPŞ əməkdaşlarının keçirdikləri əməliyyat-axtarış tədbirləri nəticəsində müxtəlif vaxtlarda rayon ərazisindəki 3 evdən ümumilikdə 2315 manat pul və 8600 manat dəyərində qızıl-zinət əşyaları oğurlamaqda şübhəli bilinən Xırmandalı kənd sakini M.Fərzəliyev saxlanılmışdır.

Goranboy rayon sakinləri Ş.Əliyev və M.İsmayılov ov tüfənglərini könüllü olaraq polisə təhvil vermişlər

03.01.2022

Goranboy RPŞ əməkdaşlarının keçirdikləri profilaktik tədbirlər nəticəsində Borsunlu kənd sakini Ş.Əliyev tapdığı istifadəyə yararsız, nömrəsi silinmiş “TOZ-8”, Aşağı Ballıqaya kənd sakini M.İsmayılov qanunsuz saxladığı “İJ” markalı ov tüfənglərini könüllü olaraq polisə təhvil vermişlər.