Bakı şəhər sakini Rüstəmbəy Yaqubov yazır ki, dələduzluq yolu ilə pulunu alan şəxs barəsində Bakı Şəhər Baş Polis İdarəsinə etdiyi müraciətdən sonra müvafiq araşdırma başlanılmış və ona dəymiş ziyan ödətdirilmişdir.

“Məktəbimizin xeyli müddət idi ki, su problemi vardı. Aidiyyatı qurumlara müraciət etsək də səsimizə səs verən olmamışdı. Sonda ümid yeri kimi məktəbin kollektivi adından Qusar Rayon Polis Şöbəsinin Şahdağ Polis Bölməsinə müraciət etdik və başda rəhbərlik olmaqla bölmənin bütün şəxsi heyəti öz vəsaitləri hesabına məktəbimizə su xətti çəkdirdi. Son zəng ərəfəsində polisin bu nəcib əməli bizə ikiqat bayram sevinci yaşatdı.” Bu fikirlər Qusardakı şəhid Bəhruz Ağaverdiyev adına orta məktəbin direktoru Arif Xəlilovun DİN-ə ünvanladığı təşəkkür məktubundandır.

Cəlilabad sakini Ruslan İsayev DİN-ə ünvanladığı təşəkkür məktubunda rayon ərazisində sabitliyi qoruyan, cinayətkarlıqla ciddi mübarizə aparan, yollarda təhlükəsizliyi təmin edən həmkarlarımıza minnətdarlığını ifadə edir.

“İsmayıloğulları” MMC-nin direktoru Qurbanəli İsmayılov DİN Baş İstintaq və Təhqiqat İdarəsinə ünvanladıqları müraciətə vaxtında və obyektiv baxıldığına, hüquqpozuntusunun qarşısının alınması üçün lazımı tədbirlər görüldüyünə görə DİN rəhbərliyinə təşəkkürünü bildirir.

Vətəndaşlardan Bakı şəhər sakini Rüfət Əliyev, Balakən rayon sakini Turab Babayev, Masallı rayon sakinləri Alim Əkbərov və Ziyadxan Əkbərov polisin fəaliyyətini yüksək qiymətləndirir, daxili işlər orqanları əməkdaşlarının sayəsində ölkəmizdə ictimai asayişin təmin edildiyini vurğulayır və buna görə DİN rəhbərliyinə minnətdarlıq edirlər.

Şamaxı rayon sakini Şahmar Hüseynov DİN-ə ünvanladığı teleqramda yazır ki, oğlu Şahin Hüseynovun döyülməsi ilə əlaqədar RPŞ-yə etdiyi şikayət tez bir zamanda təmin edilib və məsələ obyektiv şəkildə araşdırılıb. Vətəndaş buna görə DİN rəhbərliyinə təşəkkürünü bildirir.

Şabran rayon sakini Vaqif Ağayev RPŞ-nin fəaliyyətindən razılığını bildirir, məhz polis əməkdaşlarının fəaliyyəti nəticəsində təhlükəsizliyin təmin edildiyini, yollarda hərəkətin yüksək səviyyədə nizamlandığını diqqətə çatdırır.

Astara rayon ağsaqqalları və Şiyakərən kəndinin bir qrup sakininin DİN-ə ünvanladıqları təşəkkür məktubunda cinayətkarlıqla mübarizədə polisin qətiyyətindən söhbət açır, vətəndaş-polis münasibətlərinə töhfə verən işlərin mütəmadi xarakter almasından, məktəblərdə, əmək kollektivlərində narkomaniya, erkən nikah və dini radikalizm mövzusunda keçirilən tədbirlərdən razılıqlarını ifadə edirlər.

Nizami rayon sakini, ikinci qrup əlil Rahil Məlikov doğulduğu Şirvan şəhərində cinayətkarlığın kəskin şəkildə azalmasına, polis-vətəndaş münasibətlərinin səmimiyyət və inam üzərində qurulmasına, əhalinin təhlükəsizliyinin etibarlı təmininə görə Rayon Polis Şöbəsinin rəhbərliyinə minnətdarlıq edir.