Bir müddət əvvəl evindən 3000 min manat dəyərində qızıl-zinət əşyasını oğurlayan şəxslərin etdiyi müraciətdən sonra Daşkəsən RPŞ əməkdaşlarının peşəkarlığı nəticəsində tutulmasına, vətəndaşların əmin-amanlıq şəraitində yaşaması üçün üzərlərinə düşən vəzifəni layiqincə yerinə yetirdiklərinə görə Dəstəfur kənd sakini Məsim Bağırov Azərbaycan Polisinə və DİN rəhbərliyinə minnətdarlığını ifadə edir.

Abşeron rayonu Saray qəsəbəsində müvəqqəti məskunlaşan Qubadlı rayon sakini Məzahir Allahverdiyev üzləşdiyi problemin həllində kömək göstərdiklərinə görə Abşeron RPİ-nin şəxsi heyətinə təşəkkür edir.

Bakı şəhər sakini Zərnişan Orucova və Fərman Qənbərov ölkəmizdə insanların hüquq və azadlıqlarının, onların mülkiyyətinin qorunması naminə daxili işlər orqanlarının apardıqları qətiyyətli mübarizədən məmnun qaldığını yazır və buna görə DİN rəhbərliyinə təşəkkür edirlər.

Xəzər rayonu Valideyn himayəsindən məhrum olmuş uşaqlar üçün 2 nömrəli ümumi orta internat məktəbin rəhbərliyi şagirdlərin şəxsiyyət vəsiqələrinin alınmasında yaxından kömək göstərdiyinə görə Xəzər Rayon Polis İdarəsinin Qeydiyyat və şəxsiyyət şöbəsinə təşəkkürünü bildirir.

Şabran şəhər sakini Şəmsi Əliyev yazır ki, polis-vətəndaş münasibətlərinin möhkəmləndirilməsi və şəfaf mühitin yaradılması vətəndaş məmnunluğuna xidmət etməklə yanaşı, həmçinin cəmiyyətimizdə narkomaniyanın, erkən nikahların və dini ekstermizmin qarşısının alınmasına böyük rol oynayır. Məhz bütün bunların nəticəsidir ki, bu gün Vətəninə, dövlətinə xidmət etmək istəyən gənclərin ən böyük arzularından biri də polis olmaqdır. Elə məktub müəllifi də universiteti bitirib, hərbi xidmətini başa vurduqdan sonra gələcəkdə polisin sıralarına qatılmağı arzulayır.

Gəncə şəhərindən Heydər Əhmədov, Daşkəsəndən Elvin Verdiyev, Tural Əliyev bir müddət öncə Daşkəsən RPŞ-nin əməkdaşları tərəfindən yararsız ət və ət məhsullarının aşkar edilməsinə və insanlarımın sağlamlığına, gigiyenasına belə həssas yanaşmalarına görə DİN rəhbərliyinə təşəkkür edirlər.

Səbail rayon sakini Aydın Məmmədov ona göstərdikləri səmimi münasibətə və diqqətə görə Nərimanov RPİ-nin əməkdaşlarına təşəkkür edir.

Bakı şəhər sakini Samir Nağıyev göndərdiyi məktubunda bildirir ki, aprelin 24-də Nizami rayonu E. Süleymanov küçəsindəki binalardan birində baş vermiş yanğın zamanı ərazidə xidmət aparan Əlahiddə Çevik Polis Alayının əməkdaşları – İbrahim Məmmədovun, Rəşad Mustafayevin və Asif Məmmədovun hadisə ilə bağlı Növbətçi Hissələrə, FHN-nə və mənzillərdə yatan sakinlərə tez bir zamanda xəbər vermələri nəticəsində insan tələfatının qarşısı alınmışdır. Buna görə, vətəndaş DİN rəhbərliyinə və adları çəkilən polis əməkdaşlarına dərin təşəkkürünü bildirir.

Suraxanı rayon sakini Zemfira Süleymanova DİN-ə ünvanladığı elektron müraciətində qeyd edir ki, bir nəfər şəxs onu aldadaraq dələduzluq yolu ilə pulunu ələ keçirib. Vətəndaş bununla bağlı Baş Mütəşəkkil Cinayətkarlıqla Mübarizə İdarəsinə ərizə ilə müraciət edib. Həyata keçirilmiş əməliyyat-axtarış tədbirləri nəticəsində həmin şəxs saxlanılıb və vətəndaşa dəymiş ziyan ödənilib. Buna görə Z. Süleymanova DİN rəhbərliyinə və Baş Mütəşəkkil Cinayətkarlıqla Mübarizə İdarəsinin əməkdaşlarına minnətdarlıq edir.