Ağdam rayon sakini Mobil Əliyev DİN rəhbərliyinə müraciət edərək üzləşdiyi problemin ədalətli həllində ona köməklik göstərmələrini xahiş edib. DİN-in göstərişi ilə qısa vaxt ərzində Baş İstintaq və Təhqiqat İdarəsi tərəfindən başladılan araşdırma vətəndaşın məmnunluğu ilə nəticələnib. O, ünvanladığı təşəkkür məktubunda DİN rəhbərliyinin daim ədalətli qərar qəbul etdiyini, qanunun aliliyi prinsipini hər zaman uca tutduğunu, Azərbaycan Polisinin ictimaiyyət arasında böyük nüfuza malik olduğunu səmimi hislərlə qeyd edir.

Elnur Fərhadov qısa müddət ərzində ona dəymiş ziyanın DİN Baş Mütəşəkkil Cinayətkarlıqla Mübarizə İdarəsinin əməkdaşlarının səyi nəticəsində ödətdirildiyinə görə həmkarlarımıza təşəkkür edir.

Lənkəran rayon Şürük kənd sakini Səyyad Quliyev və kənd ağsaqqalları adından DİN-ə ünvanlanan məktubda baş verən cinayətlərin vaxtında açılmasına, əhali arasında narkomaniya ilə mübarizə məqsədilə keçirilən tədbirlərin mütəmadi xarakter almasına görə Lənkəran Şəhər-Rayon Polis Şöbəsinin əməkdaşlarından razılıq ifadə edilir.

İsmayıllı rayonundan Dadaş Səmədov müraciətinə polisin çevik reaksiya verməsini vətəndaş hüquqlarına verilən ən böyük dəyər kimi qiymətləndirir.

Gəncə şəhər sakini Nailə Xəlilova göndərdiyi məktubunda yazır ki, martın 23-də 1 nömrəli avtobusla gedərkən çantasından içində bir sıra sənədlər və 3063 manat olan pul kisəsi oğurlanıb. Zərərçəkmiş dərhal Nizami (Gəncə) RPİ-ə ərizə ilə müraciət edib. Polis əməkdaşlarının səyi nəticəsində qısa müddətdə oğurluğu törətmiş şəxs müəyyən edilərək saxlanılıb. Vətəndaşa məxsus sənədlər və pul geri qaytarılıb. N.Xəlilova məsələnin çox qısa zaman ərzində öz həllini tapdığına görə, DİN rəhbərliyinə və bu işdə əməyi keçən hər bir polis əməkdaşına təşəkkürünü bildirir, müraciətinə bu qədər həssas yanaşılmasından məmnunluq hissi keçirir.

Quba rayon sakini Ehtiram Mustafayev göndərdiyi məktubunda bildirir ki, ona dəymiş zərərin ödənilməsi ilə bağlı etdiyi şikayət təmin edilib. Həyata keçirilmiş tədbirlər nəticəsində ziyan tam ödətdirilib. E.Mustafayev polisin fəaliyyətindən razı qaldığını qeyd edir.

Bakı şəhər sakini Namaz Mamedov göndərdiyi teleqramda şikayəti ilə əlaqədar məsələyə baxıldığını və ona dəymiş zərərin ödənildiyini yazır. Polisin göstərdiyi belə qayğıkeş münasibətə görə, DİN rəhbərliyinə öz dərin minnətdarlığını bildirir. Saray qəsəbə sakini Səbuhi Məmmədov da göndərdiyi teleqramda ona dəymiş ziyanın ödənildiyi üçün polisə, xüsusilə də Baş Mütəşəkkil Cinayətkarlıqla Mübarizə İdarəsinin əməkdaşlarına təşəkkür edir, onların məsələyə çevik reaksiya verməsindən məmnun qaldığını vurğulayır.

Azərbaycan Ziyalılarının Demokratik İttifaqının Astara rayon şöbəsinin sədri Mircəfər Babazadə göndərdiyi təşəkkür məktubunda polisin fəaliyyətindən razılığını ifadə edir. Bildirir ki, daxili işlər orqanlarının ayıq-sayıq xidməti nəticəsində rayonda vətəndaşların hüquq və azadlıqları qorunur, ictimai asayiş və yollarda hərəkətin təhlükəsizliyi təmin edilir. Bundan başqa, müntəzəm olaraq Astara RPŞ-nin təşkilatçılığı ilə narkomaniyaya qarşı mübarizə çərçivəsində maarifləndirici, profilaktik xarakterli tədbirlər keçirilir. M.Babazədə məktubunda vurğulayır ki, bütün bunlar vətəndaş-polis münasibətlərinin daha da yaxşılaşmasına və dövlətçiliyimizin dayaqlarının möhkəmlənməsinə səbəb olur.

Şirvan şəhər sakini, I qrup əlil Bəxtiyar Ağayev göndərdiyi təşəkkür məktubunda martın 26-da Bakıda üzləşdiyi problemlə bağlı 102 Xidmətinə zəng etməsindən və məsələnin dərhal öz həllini tapmasından məmnun qaldığını bildirir.