DİN-in “İnstagram” səhifəsinin izləyicisi, Sumqayıt şəhər sakini Zeynəb İsgəndərova (ezizim806) səhifə vasitəsi ilə etdiyi müraciətə obyektiv baxılaraq müsbət həll edildiyinə görə DİN rəhbərliyinə təşəkkürünü bildirir.

Bakı şəhəri sakini Pərviz Hüseynov DİN-in “İnstagram” səhifəsi vasitəsilə Azərbaycan polisinə təşəkkürünü bildirib. O, azyaşlı övladının mobil telefonunun oğurlanması faktı ilə bağlı Binəqədi RPİ-nin 5-ci Polis Bölməsinə müraciət etdiyini, qısa müddətdə bu cinayət əməlini törədən şəxsin müəyyən edildiyini və oğurlanmış telefonun onlara qaytarıldığını qeyd edir. P.Hüseynov müraciətinə diqqətlə yanaşılmasına və operativliyə görə DİN rəhbərliyinə və 5-ci Polis Bölməsinin əməkdaşlarına minnətdarlığını bildirir.

Sabirabad rayon sakini Səkinə İmanova teleqramında DİN-ə etdiyi müraciəti ilə bağlı Sabirabad Rayon Polis Şöbəsinə dəvət edildiyini, yüksək hörmətlə qarşılanaraq müraciətinin müsbət həll olunduğunu qeyd edir. O, müraciətinə dərhal reaksiya verilməsinə, eyni zamanda göstərilən diqqət və qayğıya görə DİN rəhbərliyinə təşəkkürünü bildirir.

Yevlax rayon sakini Ruslan Səfərov DİN-ə ünvanladığı təşəkkür məktubunda etdiyi müraciətə operativ baxıldığını və qısa zaman kəsiyində öz həllini tapdığına görə Yevlax RPŞ-nin əməkdaşlarına minnətdarlığını bildirir.

Bir qrup Beyləqan rayon sakini DİN-ə ünvanladığı təşəkkür məktubunda narkotiklərin qanunsuz dövriyyəsində şübhəli bilinən şəxslərin ifşa edilərək məsuliyyətə cəlb edilməsi istiqamətində həyata keçirilən uğurlu əməliyyat tədbirlərinə görə DİN rəhbərliyinə və Beyləqan RPŞ-nin əməkdaşlarına minnətdarlıqlarını ifadə edirlər.

May ayının 29-da Ağcabədi rayon sakini Səfər Əliyev tanışı Rövşən adlı şəxslə birlikdə Haramı düzünə ot yığmağa gedib. İşləyərkən onu sağ əlindən ilan sancıb. Rövşən öz motosikleti ilə Səfəri həkimə çatdırmaq istəsə də, axşam saatları olduğu üçün yolu azaraq, səmti itiriblər. Uzaqdan yanan işığı görüb ora tərəf istiqamət götürüblər. Polis postuna çatanda Füzuli rayonu ərazisindəki Alxanlı kəndində olduqlarını bilblər. Polis əməkdaşlarına vəziyyəti izah elədikdə, onlar dərhal zərərçəkmişi xidməti avtomaşınla xəstəxanaya aparıblar. S.Əliyev deyir: -Yolda gedərkən artıq zəhərin təsirindən yaranan ağrılar güclənmişdi. Polis əməkdaşları tez məni xəstəxanaya çatdırmağa çalışdılar. Tələsik getdiyimizdən yolda qəza baş verdi və polis əməkdaşları xəsarət aldılar. Buna baxmayaraq onlar yaxından keçən avtomaşını saxladaraq məni xəstəxanaya yola saldılar. Sonradan öyrəndim ki, onlar Füzuli Rayon Polis Şöbəsinin əməkdaşları, Gəncalı Qəmbərov və Elmir Pənahlıdır. Mən bu gün polislərimizin fədakarlığı səbəbindən həyatda qaldım. Onlara bir ömür boyu minnətdaram. Polislər mənim həyatımı xilas edərkən öz həyatlarını təhlükəyə atdılar. Mən bu cür polislərlə fəxr edirəm. Xəsarət alan polis qardaşlarıma tez sağalmalarını arzulamaqla onlara özüm və ailəm adından minnətdarlığımı bildirirəm. Polisin bu fədakar fəaliyyətinə görə Daxili İşlər Nazirliyinin rəhbərliyinə təşəkkür edirəm. Hal-hazırda G.Qəmbərovun müalicəsi xəstəxana şəraitində davam etdirilir. Tez bir zamanda ayağa qalxaraq xidməti faəliyyətini qaldığı yerdən davam etdirməsini arzu edirik. E.Pənahlının səhhətində heç bir problem yoxdu, o xidmət başındadır.

Astara rayon sakini İqbal Quliyev DİN rəhbərliyinə ünvanladığı təşəkkür məktubunda Baş Dövlət Yol Polisi İdarəsinin Lənkəran regional qeydiyyat-imtahan və texniki baxış şöbəsinin əməkdaşlarının xidməti vəzifələrini layiqincə yerinə yetirdiyinə görə razılığını ifadə edir.

Lənkəran rayonunun Digah kənd sakini Şahin Məmmədov DİN rəhbərliyinə ünvanladığı təşəkkür məktubunda velosipedini oğurlayan şəxsin müəyyən olunaraq saxlanılmasına və oğurlanan əmlakının ona geri qaytarılmasına görə Lənkəran ŞRPŞ-nin əməkdaşlarının fəaliyyətindən razılığını ifadə edir.

Cəlilabad rayonunun Kazımabad kənd sakini İlqar Ağayev DİN rəhbərliyinə ünvanladığı təşəkkür məktubunda müraciətinin obyektiv araşdırıldığına və məsələyə düzgün hüquqi qiymət verildiyinə görə minnətdarlığını bildirir.