Binəqədi rayonunun Daş Bazarı dairəsində avtomobili ödənilməyən cəriməsi olduğuna görə idarə edən şəxs saxlanılıb

23.02.2023

Baş Dövlət Yol Polisi İdarəsinin əməkdaşları tərəfindən fevralın 23-də saat 18 radələrində Binəqədi rayonunun Daş Bazarı dairəsində Bakı şəhər sakini Y.Novruzovun idarə etdiyi “Hyundai” markalı avtomobil ödənilməyən cəriməsi olduğuna görə saxlanılıb.Sürücüdən sənədlərini təqdim etməsi tələb edildikdə o və sərnişini, paytaxt sakini A.İmanverdiyev polis əməkdaşlarına tabesizlik göstəriblər.Həmin şəxslərin narkotik vasitənin təsiri altında olmaları şübhə doğurduğundan onlar Sumqayıt şəhərinə həkim müayinəsinə aparılıblar. Lakin orada da onlar analoji hərəkətlərini davam etdirərək tabesizlik göstərdiklərindən Binəqədi RPİ-nin 6-cı Polis Bölməsinə təhvil veriliblər.Araşdırma aparılır.

Nəsimi rayonunu ərazisində xuliqanlıq əməli törətməkdə şübhəli bilinənlərdən Ə.Vəliyev və P.Nəhmətov saxlanılıb

23.02.2023

Fevralın 21-də saat 16 radələrində Nəsimi rayonunun C.Səlimov küçəsində bir nəfərin bir qrup şəxs tərəfindən döyülməsi və onu “Fiat” markalı avtomobillə aparmaları barədə Nəsimi Rayon Polis İdarəsinə məlumat daxil olub. Polis əməkdaşları tərəfindən müvafiq tədbirlər həyata keçirilib. Araşdırmalarla 5 nəfərin xuliqanlıq zəminində R.Mamedovu döyüb xəsarət yetirmələri, avtomobillə aparmaları və 3-cü mikrorayon ərazisində buraxmaları müəyyən olunub.Əməliyyat tədbirləri ilə bu əməli törətməkdə şübhəli bilinənlərdən əvvəllər məhkum olunmuş Ə.Vəliyev və P.Nəhmətov müəyyən olunaraq saxlanılıb. Şəxsiyyəti müəyyən olunan digərlərinin saxlanılması istiqamətində əməliyyat tədbirləri davam etdirilir.

Səbail rayonu ərazisində nəqliyyat vasitəsini qaçırmaqda və yol qəzası törədərək hadisə yerini tərk etməkdə şübhəli bilinən şəxs saxlanılıb

23.02.2023

Fevralın 19-da saat 1 radələrində Səbail rayonu ərazisindən “Jeep” markalı avtomobilin qaçırılması barədə 39-cu Polis Bölməsinə daxil olan məlumatla əlaqədar keçirilən əməliyyat tədbirləri nəticəsində həmin avtomobillə Nəsimi rayonu ərazisində yol-nəqliyyat hadisəsinin törədilməsi müəyyən olunub. Avtomobil Bakı Şəhər Dövlət Yol Polisi İdarəsinin əməkdaşları tərəfindən müvəqqəti duracağa yerləşdirilib.Nəqliyyat vasitəsini qaçırmaqda və yol qəzası törədərək hadisə yerini tərk etməkdə şübhəli bilinən Sabirabad rayon sakini K.Nərimanlı müəyyən olunaraq saxlanılıb.Səbail Rayon Polis İdarəsində araşdırma aparılır.

Şəmkir rayon sakinlərinə bıçaqla xəsarət edən şəxs saxlanılıb

23.02.2023

Fevralın 24-də saat 1 radələrində Şəmkir rayon sakinləri N.Abbasovun, həyat yoldaşı S.Abbasovanın və azyaşlı nəvəsinin xəsarət almaları barədə polisə məlumat daxil olub.Şəmkir Rayon Polis Şöbəsi əməkdaşları tərəfindən müvafiq tədbirlər həyata keçirilib. Araşdırmalarla N.Abbasovun evinə gələn Kür qəsəbə sakini F.Məmmədovun bıçaqla onlara xəsarət yetirməsinə əsaslı şübhələr müəyyən olunub.Qəsdən sağlamlığa ağır zərər vurmada şübhəli bilinən F.Məmmədov saxlanılıb.Şəmkir Rayon Polis Şöbəsində araşdırma aparılır.

Xətai rayonu ərazisindəki marketlərin birindən pul oğurlamaqda şübhəli bilinən şəxs saxlanılıb

23.02.2023

Xətai RPİ 34-cü Polis Şöbəsi əməkdaşlarının keçirdikləri əməliyyat tədbiri nəticəsində S.Ə.Şirvani küçəsində yerləşən marketlərin birindən 912 manat pul oğurlamaqda şübhəli bilinən Bakı şəhər sakini, əvvəllər məhkum olunmuş Ə.İsmayılov saxlanılıb. Araşdırma aparılır.

Sumqayıt şəhər sakini X.İbrahimovdan marixuana aşkar olunaraq götürülüb

23.02.2023

Sumqayıt ŞPİ 2-ci Polis Bölməsi əməkdaşlarının əldə olunan məlumat əsasında keçirdikləri əməliyyat tədbiri nəticəsində saxlanılan şəhər sakini, əvvəllər məhkum olunmuş X.İbrahimovdan 440 qram marixuana aşkar olunaraq götürülüb. Araşdırma aparılır.

Bərdə rayonu Lənbəran kənd sakininin həyətindən marixuana aşkar olunaraq götürülüb

23.02.2023

Bərdə Rayon Polis Şöbəsi əməkdaşlarının əldə olunan məlumat əsasında keçirdikləri əməliyyat tədbiri nəticəsində Lənbəran kənd sakini Q.Məmmədovun həyətinə baxış zamanı oradan 1 kiloqram 130 qram marixuana aşkar olunaraq götürülüb. Araşdırma aparılır.

Göygöl rayon ərazisindəki evlərin birindən pul oğurlamaqda şübhəli bilinən şəxs saxlanılıb

23.02.2023

Göygöl Rayon Polis Şöbəsi əməkdaşlarının daxil olan məlumat əsasında keçirdikləri əməliyyat tədbiri nəticəsində rayon ərazisindəki evlərin birindən 3800 manat pul oğurlamaqda şübhəli bilinən Ç.Mahmudov müəyyən olunaraq saxlanılıb.Araşdırma aparılır.

Yevlax rayonu ərazisində saxlanılan şəxsdən heroin, xəncər,beşbarmaq və elektron tərəzi aşkar olunaraq götürülüb.

23.02.2023

Yevlax Rayon Polis Şöbəsi əməkdaşlarının əldə olunan məlumat əsasında keçirdikləri əməliyyat tədbiri nəticəsində saxlanılan şəhər sakini, əvvəllər məhkum olunmuş E.Bayramzadədən heroin, 1 ədəd xəncər, 1 ədəd beşbarmaq və 1 ədəd elektron tərəzi aşkar olunaraq götürülüb. Araşdırma aparılır.

Sabunçu rayonu ərazisində evlərinin birindən oğurluq edən şəxs saxlanılıb

23.02.2023

Sabunçu RPİ 13-cü Polis Bölməsi əməkdaşlarının daxil olan məlumat əsasında keçirdikləri əməliyyat tədbiri nəticəsində fevralın 13-də Bakıxanov qəsəbəsindəki evlərin birindən pul və 3830 manat dəyərində qızıl-zinət əşyaları oğurlamaqda şübhəli bilinən, Cinayət Məcəlləsinin 177-ci (Oğurluq) maddəsi ilə axtarışda olan Şəmkir rayon sakini, əvvəllər məhkum olunmuş E.Eminov saxlanılıb.