Bakıda narkotik maddələrin qanunsuz dövriyyəsini təşkil edən “Uber” taksi şirkətinin 7 sürücüsü saxlanılıb 

13.12.2022

İlk baxışdan hər kəsdə taksi sürücüsü təəssüratı yaradır.  Müştərilərdən gələn sifarişləri qəbul edir və onları deyilən ünvana aparır. Bununla da izini itirməyə və məqsədini gizlətməyə çalışır. Əsas niyyəti isə paytaxt ərazisində narkotik vasitlərin satışını həyata keçirmək olan “taksi sürücüsü” əsl simasını çox gizlədə bilmir. Daxili İşlər Nazirliyi Baş Narkotiklərlə Mübarizə İdarəsinin əməkdaşlarının həyata keçirdikləri növbəti əməliyyat nəticəsində narkotik vasitələrin satışını həyata keçirən əvvəllər məhkum olunmuş “Uber” taksi şirkətinin sürücüsü Anar Kəlbiyev qısa zamanda ifşa edilərək saxlanılıb. Onun üzərindən, avtomobilindən və Abşeron rayonunda yaşadığı evdən külli miqdarda narkotik vasitə və psixotrop maddə, həmçinin narkotiklərin satışı zamanı istifadə etdiyi plastik kart aşkar olunub. İlkin sorğu zamanı Anar Kəlbiyev narkotik vasitə və psixotrop maddələri  qaçaqmalçılıq yolu ilə ölkə ərazisinə keçiriləndən sonra əldə etdiyini və şəxsiyyəti istintaqla araşdırılan dəstənin digər üzvlərinə çatdırmaq məqsədi ilə Bakı şəhərinə gətirdiyini bildirib. Onun bu məqsədlə xaricdə yaşayan şəxsiyyəti istintaqla araşdırılan narkotacirlə mütəmadi olaraq əlaqə saxladığı da həyata keçirilən texniki tədbirlərlə sübuta yetirilib.Faktla bağlı Cinayət Məcəlləsinin müvafiq maddəsi ilə cinayət işi başlanılıb, Anar Kəlbiyev barəsində həbs qətimkan tədbiri seçilib.Qeyd edək ki, Baş İdarə əməkdaşları tərəfindən son dövrlər ərzində keçirilən əməliyyatlar zamanı narkotik vasitələrin qanunsuz dövriyyəsi ilə məşğul olan “Uber” taksi şirkətinin ümumilikdə 7 sürücüsü saxlanılaraq istintaqa təqdim edilib. Həmin şəxslərdən 20 kiloqrama yaxın narkotik vasitə və psixotrop maddə aşkar olunub.Bu şəxslərin daxil olduqları şəbəkənin digər üzvlərinin saxlanılması istiqamətində əməliyyat tədbirləri davam etdirilir. 

Gün ərzində ölkə ərazisində qeydə alınan 44 cinayətin açılması təmin olunub

12.12.2022

Dekabrın 12-də ölkə ərazisində qeydə alınan 44, əvvəlki dövrlərdən bağlı qalan 17 cinayətin açılması daxili işlər orqanlarının əməkdaşları tərəfindən təmin olunub.

Xəzər rayonunun Şüvəlan qəsəbəsindəki evlərin birindən 15.000 manat dəyərində qızıl-zinət əşyalarını oğurlamaqda şübhəli bilinən Bakı şəhər sakini E.Babayev saxlanılıb

12.12.2022

Dekabrın 6-na keçən gecə Xəzər rayonunun Şüvəlan qəsəbəsindəki evlərin birindən 15.000 manat dəyərində qızıl-zinət əşyalarının qeyri-aşkar şəraitdə oğurlanması barədə polisə məlumat daxil olub. Xəzər RPİ 1-ci Polis Şöbəsi əməkdaşlarının keçirdikləri əməliyyat tədbirləri nəticəsində oğurluq əməlində şübhəli bilinən Bakı şəhər sakini E.Babayev müəyyən olunaraq saxlanılıb. Araşdırma aparılır. 

Binəqədi rayonu ərazisində iki nəfərin cüzdanlarını oğurlamaqda şübhəli bilinən Bakı şəhər sakini R.Əliyev və Abşeron rayon sakini R.Ağayev saxlanılıblar

12.12.2022

Binəqədi rayonunun Mehdiabad qəsəbəsində bir nəfərin içərisində 1070 manatı və sənədləri olan cüzdanının, Binəqədi qəsəbəsində isə digər şəxsin içərisində 1000 manatı, sənəd və bank kartı olan cüzdanının qeyri-aşkar şəraitdə oğurlanması barədə polisə məlumatlar daxil olub.Binəqədi RPİ 43-cü Polis Bölməsi əməkdaşlarının keçirdikləri əməliyyat tədbirləri nəticəsində oğurluq əməlində şübhəli bilinən Bakı şəhər sakini, əvvəllər narkotiklərlə əlaqəli cinayətə görə məhkum olunmuş R.Əliyev və Abşeron rayon sakini, əvvəllər də oğurluğa görə məhkum olunmuş R.Ağayev müəyyən olunaraq saxlanılıblar. Araşdırma aparılır. 

Gəncə şəhər sakini F.Hidayətovun mobil telefonunu oğurlamaqda şübhəli bilinən Ə.Quliyev saxlanılıb

12.12.2022

Gəncə ŞBPİ 1-ci Polis Şöbəsi əməkdaşlarının keçirdikləri əməliyyat tədbiri nəticəsində şəhər sakini F.Hidayətovun mobil telefonunu oğurlamaqda şübhəli bilinən Gəncə sakini, əvvəllər məhkum olunmuş Ə.Quliyev saxlanılıb. Araşdırma aparılır. 

Biləsuvar rayonunun Günəşli kəndindəki mağazaların birindən oğurluğa cəhd göstərməkdə şübhəli bilinən şəxslər saxlanılıblar

12.12.2022

Dekabrın 12-də saat 2 radələrində Biləsuvar rayonunun Günəşli kəndindəki mağazaların birindən oğurluğa cəhd göstərilməsi barədə polisə məlumat daxil olub. Biləsuvar Rayon Polis Şöbəsi əməkdaşlarının keçirdikləri əməliyyat tədbiri nəticəsində bu əməli törətməkdə şübhəli bilinən rayon sakini İ.Şəbizadə, Quba rayon sakinləri V.Ağabalayev və R.Mirzəyev saxlanılıblar.Araşdırmalarla onların dekabrın 7-də Quba rayonunun Vladimirovka kəndində iki mağazadan ümimilikdə 840 manat pul və 1352 manat dəyərində tütün məmulatı oğurlamaları da müəyyən olunub.Araşdırma aparılır. 

Şamaxı şəhəri ərazisindən rayon sakini M.Balayevin avtomobilini qaçırmaqda şübhəli bilinən şəhər sakini N.Abdullayev saxlanılıb

12.12.2022

Dekabrın 11-də Şamaxı şəhəri ərazisindən rayon sakini M.Balayevin “VAZ-2106” markalı avtomobilinin qaçırılması barədə polisə məlumat daxil olub.Şamaxı Rayon Polis Şöbəsi əməkdaşlarının keçirdikləri əməliyyat-axtarış tədbirləri nəticəsində nəqliyyat vasitəsini qaçırmaqda şübhəli bilinən şəhər sakini N.Abdullayev saxlanılıb. Araşdırmalarla onun həmin gün şəhər sakini C.Şirəliyevə məxsus “VAZ-2107” markalı avtomobili qaçırması da müəyyən olunub.Araşdırma aparılır.

Salyan rayonu ərazisindəki evlərin birindən oğurluq etməkdə şübhəli bilinən Bakı şəhər sakini Ə.Əzimov saxlanılıb

12.12.2022

Salyan Rayon Polis Şöbəsi əməkdaşlarının keçirdikləri əməliyyat tədbiri nəticəsində rayon ərazisindəki evlərin birindən 2050 manat pul, ərzaq məhsulları və geyim əşyaları oğurlamaqda şübhəli bilinən Bakı şəhər sakini Ə.Əzimov saxlanılıb. Araşdırma aparılır. 

Salyan rayonunun Həsənli kənd sakini olan bir nəfəri öldürməklə hədələməkdə şübhəli bilinən rayon sakini M.Bədəlov müəyyən olunaraq saxlanılıb

12.12.2022

Salyan rayonunun Həsənli kənd sakini olan bir nəfərin öldürülməklə hədələnməsi barədə polisə məlumat daxil olub. Salyan Rayon Polis Şöbəsi əməkdaşlarının keçirdikləri əməliyyat tədbiri nəticəsində bu əməli törətməkdə şübhəli bilinən rayon sakini M.Bədəlov müəyyən olunaraq saxlanılıb. Ondan qanunsuz saxladığı “İJ” markalı ov tüfəngi götürülüb.Araşdırma aparılır.

Lənkəran rayonu ərazisində ayrı-ayrı vaxtlarda 5 avtomobildən oğurluq etməkdə şübhəli bilinən Liman şəhər sakini A.Əzizli saxlanılıb

12.12.2022

Lənkəran Şəhər Rayon Polis Şöbəsi əməkdaşlarının keçirdikləri əməliyyat tədbiri nəticəsində rayon ərazisində ayrı-ayrı vaxtlarda 5 avtomobildən mobil telefonlar, qızıl-zinət əşyası, qol saatı və içərisində geyim əşyaları olan çanta oğurlamaqda şübhəli bilinən Liman şəhər sakini A.Əzizli saxlanılıb. Araşdırma aparılır.