Su mühərrikləri oğurlamaqda şübhəli bilinən Salyan şəhər sakini Ş.Mehdiyev saxlanılmışdır

31.05.2022

Salyan RPŞ əməkdaşlarının keçirdikləri əməliyyat tədbirləri nəticəsində Salyan Dövlət Bayraq Meydanının ərazisindən 3 ədəd, həmçinin müxtəlif vaxtlarda 3 vətəndaşın həyətindən su mühərriklərini oğurlamaqda şübhəli bilinən şəhər sakini, əvvəllər məhkum olunmuş Ş.Mehdiyev saxlanılmışdır. Araşdırma aparılır.

Sabunçu rayonunda may ayında keçirilən əməliyyatlar zamanı narkotiklərin qanunsuz dövriyyəsi ilə məşğul olan və silsilə oğurluqlar edən 117 nəfər saxlanılıb 

31.05.2022

Sabunçu Rayon Polis İdarəsinin əməkdaşları tərəfindən son 1 ayda keçirilən əməliyyatlar zamanı narkotiklərin qanunsuz dövriyyəsi ilə məşğul olan ümumilikdə 98 nəfər saxlanılıb. Aşkar edilən bütün faktlarla əlaqədar İdarənin İstintaq Şöbəsində cinayət işləri başlanılıb. Saxlanılan şəxslərdən 64-ü barəsində məhkəmə tərəfindən həbs, 34-ü haqqında isə polisin nəzarəti altına vermə və digər növdən olan qətimkan tədbirləri seçilib. Onlardan ümumilikdə 27 kiloqram narkotik vasitə və psixotrop maddə aşkar edilib. Qeyd edilən dövr ərzində Sabunçu Rayon Polis İdarəsinin əməkdaşlarının keçirdikləri əməliyyatlar zamanı Bakıxanov, Maştağa, Balaxanı, Zabrat və digər ərazilərdə yerləşən evlərdən, mağazalardan, ödəmə terminallarından silsilə oğurluqlar edən əlavə 19 nəfər saxlanılıb. Bu şəxslərin həmin ərazilərdə yerləşən 50-ə yaxın evdən, eləcə də obyektdən pul, qızıl-zinət və məişət əşyaları oğurladıqları müəyyən edilib. Qeyd edilən faktların hər biri ilə bağlı Sabunçu Rayon Polis İdarəsində araşdırmalar davam etdirilir.

Gün ərzində törədilmiş 32 cinayətin üstü “isti izlər”lə açılmışdır

30.05.2022

Respublikanın daxili işlər orqanları tərəfindən gün ərzində törədilmiş 32 cinayətin üstü “isti izlər”lə açılmışdır.

İki il əvvəl törədilmiş qətlin üstü açılıb 

30.05.2022

2020-ci il mart ayının 28-də İsmayıllı rayonunun Tubukənd kəndi ərazisindən kişi meyiti tapılmışdır. Həyata keçirilmiş əməliyyat-axtarış və istintaq tədbirləri ilə mərhumun Bakı şəhər sakini, əvvəllər dəfələrlə məhkum olunmuş Rəşad Məmmədov olması məlum olmuşdur. Araşdırmalarla Sabirabad rayon sakini Ümidvar İbişov və Xocalı şəhər sakini, əvvəllər məhkum olunmuş Elvin Əliyevin narkotik asılılığından əziyyət çəkən tanışları R.Məmmədovu xəstəxanaya yerləşdirmək adı ilə “Hyundai” markalı avtomobildə Qaradağ rayonu ərazisinə aparmaları, orada avtomobilin salonunda Ü.İbişovun onu boğaraq öldürməsi və cinayəti gizlətmək məqsədilə cəsədi İsmayıllı rayonunun Tubukənd kəndinə aparıb üstünə yanacaq tökərək yandırmalarına əsaslı şübhələr müəyyən edilmişdir. Polis əməkdaşlarının həyata keçirdikləri əməliyyat tədbirləri ilə Ü.İbişov və E.Əliyev şübhəli şəxs qismində tutularaq istintaqa təhvil verilmişlər.  

“Gənclər şəhərciyi” yaşayış kompleksinin həyətində Rəqsanə Məmmədovanı qətlə yetirməkdə şübhəli bilinən əri şübhəli şəxs qismində tutularaq istintaqa təhvil verilmişdir

30.05.2022

Abşeron Rayon Polis İdarəsinə mayın 30-da saat 23 radələrində “Gənclər şəhərciyi” yaşayış kompleksinin həyətində 26 yaşlı Rəqsanə Məmmədovanın öldürülməsi barədə məlumat daxil olmuşdur. Rayonun polis və prokurorluq orqanlarının əməkdaşları tərəfindən müvafiq tədbirlər həyata keçirilmişdir. Aparılmış ilkin araşdırmalarla həyat yoldaşı R.Məmmədovun ailə münaqişəsi zəminində qadına bıçaqla xəsarətlər yetirərək onu qəsdən öldürməsinə əsaslı şübhələr müəyyən edilmişdir. Əməliyyat tədbirləri nəticəsində R.Məmmədov şübhəli şəxs qismində tutularaq istintaqa təhvil verilmişdir.Faktla bağlı Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanmışdır.

Oğurluq etməkdə şübhəli bilinən Maştağa qəsəbə sakini R.Şahbazov müəyyən edilərək saxlanılmışdır

30.05.2022

Sabunçu RPİ-nin 14-cü Polis Bölməsinə mayın 28-də Maştağa qəsəbəsindəki evlərin birindən 15.000 manat dəyərində 3 ədəd noutbuk, 3 ədəd domafon, 2 ədəd televizor, videokamera və avtomobil ehtiyat hissələrinin oğurlanması barədə müraciət daxil olmuşdur. Polis əməkdaşlarının keçirdikləri əməliyyat-axtarış tədbirləri nəticəsində oğurluğu törətməkdə şübhəli bilinən qəsəbə sakini, əvvəllər də oğurluq və narkotiklərlə əlqəli cinayətlərə görə məhkum olunmuş R.Şahbazov müəyyən edilərək saxlanılmışdır. Araşdırma aparılır. 

Sumqayıt şəhər sakini Ş.Hətəmovdan “F-1” qumbarası aşkar edilərək götürülmüşdür

30.05.2022

Sumqayıt ŞPİ-nin 2-ci Polis Bölməsi əməkdaşlarının əldə edilmiş məlumat əsasında keçirdikləri əməliyyat tədbiri nəticəsində saxlanılan şəhər sakini, əvvəllər məhkum olunmuş Ş.Hətəmovdan “F-1” qumbarası aşkar edilərək götürülmüşdür.

Biləsuvar rayonunun Əsgərabad kənd sakini T.Qəhrəmanovdan qanunsuz saxladığı ov tüfəngi götürülmüşdür

30.05.2022

Biləsuvar RPŞ-nin əməkdaşları tərəfindən Əsgərabad kənd sakini T.Qəhrəmanovdan qanunsuz saxladığı nömrəsi silinmiş “İJ-17” markalı ov tüfəngi götürülmüşdür.

Sabunçu qəsəbəsi ərazisində yol-nəqliyyat hadisəsi

30.05.2022

Mayın 30-da saat 23 radələrində Sabunçu rayonunun Sabunçu qəsəbəsi ərazisində Cəbrayıl rayon sakini H.Abbasov idarə etdiyi “Hyundai” markalı avtomobillə yolu keçən Bakı şəhər sakini Səməd Abbasovu vurmuşdur. Nəticədə piyada aldığı xəsarətlərdən hadisə yerində ölmüşdür.Sabunçu Rayon Polis İdarəsində araşdırma aparılır. 

Suraxanı rayonunun Yeni Ramana qəsəbəsi ərazisində yol-nəqliyyat hadisəsi

30.05.2022

Mayın 30-da saat 8 radələrində Suraxanı rayonunun Yeni Ramana qəsəbəsi ərazisində Bərdə rayon sakini N.Əlizadə idarə etdiyi “Mercedes” markalı avtomobillə yolu keçən Bakı şəhər sakini Nizami Rəsulovu vurmuş və nəticədə piyada aldığı xəsarətlərdən hadisə yerində ölmüşdür.Suraxanı Rayon Polis İdarəsində araşdırma aparılır.