Göygöl rayonu ərazisində bir neçə müəssisəyə məxsus naqilləri oğurlamaqda şübhəli bilinən Hacıməlik qəsəbə sakinləri G.Əsgərov və qardaşı saxlanılmışlar

14.02.2022

Göygöl RPŞ əməkdaşlarının keçirdikləri əməliyyat-axtarış tədbirləri nəticəsində müxtəlif vaxtlarda “Gəncə Avtomobil Zavodu” İstehsalat Birliyinə məxsus 680 metr naqili, Göygöl Suvarma Sistemləri İdarəsinə məxsus 24 metr naqili və 1 artezian quyusundan 25 metr naqili oğurlamaqda şübhəli bilinən Hacıməlik qəsəbə sakinləri G.Əsgərov və qardaşı saxlanılmışlar.Araşdırma aparılır.

Sabunçu rayonunda narkotik vasitələrin satışı ilə məşğul olan silahlı şəxs saxlanılıb

14.02.2022

Sabunçu Rayon Polis İdarəsinin 12-ci Polis Şöbəsinin əməkdaşlarının daxil olmuş əməliyyat məlumatı əsasında Balaxanı qəsəbəsində həyata keçirdikləri tədbir nəticəsində üzərində və yaşadığı evdə  qanunsuz olaraq odlu silah-sursat və külli miqdarda narkotik maddə saxlayan şəxs tutulub. Şöbəyə əvvəllər məhkum olunmuş Zaur Əfəndiyevdə odlu silah olması barədə əməliyyat məlumatı daxil olub. Həmin şəxs saxlanılıb və onun üzərinə baxış zamanı ümumilikdə 28 qram tiryək və heroin aşkar edilib. Zaur Əfəndiyev ifadəsində yaşadığı evin həyətindəki yardımçı tikilidə əlavə narkotik vasitələr və odlu silah gizlətdiyini etiraf edilb. Polislər həmin yerə baxış keçirən zamanı oradan 1 kiloqram 77 qram heroin, 142 qram tiryək, 1 ədəd “TT” maraklı tapança, 5 ədəd patron və 1 ədəd patron darağı aşkar edərək götürüblər. Araşdırma nəticəsində müəyyən edilib ki, saxlanılan şəxs Balaxanı qəsəbəsində narkotik vasitələrin satışı ilə məşğul olub. O, xaricdə yaşayan narkotacirlərlə sosial şəbəkələr vasitəsi ilə əlaqə yaradaraq həmin şəxslərin ölkə ərazisinə müxtəlif qanunsuz yollarla göndərdikləri narkotikləri və odlu silahı qəbul edib. Faktla bağlı 12-ci Polis Şöbəsində toplanan materiallar Sabunçu Rayon Polis İdarəsinin İstintaq Şöbəsinə göndərilib. Zaur Əfəndiyev barəsində məhkəmələrin qərarı ilə 4 ay müddətinə həbs qətimkan tədbiri seçilib. Saxlanılan şəxsin ətrafında əməliyyat-istintaq tədbirləri davam etdirilir.    

Bakıda odlu silah satmaq istəyən şəxs saxlanılıb 

14.02.2022

Binəqədi Rayon Polis İdarəsinin 5-ci Polis Bölməsinin əməkdaşlarının daxil olmuş əməliyyat məlumatı əsasında həyata keçirdikləri tədbir nəticəsində üzərində qanunsuz olaraq odlu silah-sursat gəzdirən şəxs saxlanılıb. Bölməyə paytaxt sakini, əvvəllər məhkum edilmiş Rüfət İbrahimovda silah olması və satmaq istəməsi barədə əməliyyat məlumatı daxil olub. Həmin şəxs odlu silahı satmaq istəyən zaman saxlanılıb. Onun üzərinə baxış keçirilərkən 1 ədəd “TT” markalı atəş üçün yararlı tapança və həmin silaha məxsus daraq aşkar edilərək götürülüb. Rüfət İbrahimov odlu silahı bir müddət əvvəl əldə etdiyini, lakin polisə təhvil verməyərək özündə saxladığını bildirib. 5-ci Polis Bölməsində toplanan materiallar araşdırmaların davam etdirilməsi üçün Binəqədi Rayon Polis İdarəsinin İstintaq Şöbəsinə göndərilib. Rüfət İbrahimov barəsində  məhkəmənin qərarı ilə həbs qətimkan tədbiri seçilib, istintaq tədbirləri davam edirilir.

Gün ərzində törədilmiş 46 cinayətin üstü “isti izlər”lə açılmışdır

13.02.2022

Respublikanın daxili işlər orqanları tərəfindən gün ərzində törədilmiş 46 cinayətin üstü “isti izlər”lə açılmışdır.

Qanunsuz saxlanılan silah-sursatla bağlı əməliyyat tədbirləri davam etdirilir

13.02.2022

Polis əməkdaşlarının keçiridikləri əməliyyat tədbirləri nəticəsində fevralın 12-də və 13-də respublikanın ayrı-ayrı rayonlarında vətəndaşlardan qanunsuz saxladıqları müxtəlif markalı ümumilikdə 4 ədəd ov tüfəngi götürülüb. Aparılan profilaktiki tədbirlər nəticəsində qanunsuz saxlanılan 2 silah könüllü olaraq polisə təhvil verilib.Faktlar üzrə polis şöbələrində müvafiq araşdırmalar aparılır.

Koronavirus xəstələri ictimai yerlərdə aşkar edilərək saxlanılıb

13.02.2022

Fevralın 12-də və 13-də polis əməkdaşları tərəfindən respublika ərazisində 12 nəfər aktiv koronavirus xəstəsi ictimai yerlərdə aşkar edilərək saxlanılıb. Polis əməkdaşları "COVİD-19" virusuna yoluxaraq ev şəraitində müalicədə olmasına baxmayaraq yaşadığı evləri tərk etmiş həmin şəxslərlə izahedici söhbətlər aparıb, tibbi prosedurları gözləməklə yaşadığı evlərə qaytarıb və bu barədə müvafiq səhiyyə qurumları məlumatlandırılıb.

Bakı şəhərində və respublika ərazisində 741 toy şənliyinin monitorinqi həyata keçirilib

13.02.2022

12-13 fevral tarixlərində Daxili İşlər Nazirliyinin, Qida Təhlükəsizliyi Agentliyinin və İqtisadiyyat Nazirliyi yanında Dövlət Vergi Xidmətinin nümayəndələri Bakı şəhərində və respublika ərazisində 741 toy şənliyinin monitorinqini həyata keçirib.  Monitorinq 728 şadlıq sarayında, 13 şəxsi həyətyanı sahədə keçirilən şənlikləri əhatə edib.Monitorinqlər nəticəsində toy şənliklərinin keçirilməsində xüsusi karantin rejimi qaydalarını pozduqlarına görə:- 13 nəfər İnzibati Xətalar Məcəlləsinin 211-ci (Epidemiya əleyhinə rejimin, sanitariya-gigiyena və karantin rejimlərinin pozulması) maddəsinə əsasən cərimə olunub;  - 189 nəfər “COVID-19” pasportu olmadığına görə şənliyə buraxılmayıb.  

Binəqədi rayonu ərazisindəki bir neçə küçə və prospektlərdə qrunt suları üçün nəzərdə tutulan dəmir barmaqlıqları və su ötürücülərinin dəmir qapaqlarını oğurlamaqda şübhəli bilinən şəxslər saxlanılmışlar

13.02.2022

Binəqədi RPİ-nin 4-cü Polis Şöbəsi və 5-ci Polis Bölməsi əməkdaşlarının keçirdikləri əməliyyat tədbirləri nəticəsində rayon ərazisində H.Seyidzadə, C.Xəndan, A.Məmmədova, S.S.Axundov, Ə.Naxçıvani küçələrində, Azadlıq və M.K.Atatürk prospektlərində qrunt suları üçün nəzərdə tutulan 26 ədəd dəmir barmaqlıqları və su ötürücülərinin dəmir qapaqlarını oğurlamaqda şübhəli bilinən Quba rayon sakini T.Nuriyev və Bakı şəhər sakini S.Əhmədov müəyyən edilərək saxlanılmışlar. Şəxsi axtarış zamanı T.Nuriyevdən metamfetamin, S.Əhmədovdan isə heroin aşkar edilərək götürülmüşdür.

Binəqədi qəsəbəsi ərazisində 12 evdən su sayğaclarını oğurlamaqda şübhəli bilinən Bakı şəhər sakini S.Məmmədli saxlanılmışdır

13.02.2022

Binəqədi RPİ 43-cü Polis Bölməsi əməkdaşlarının keçirdikləri əməliyyat tədbirləri nəticəsində Binəqədi qəsəbəsi ərazisində 12 evdən su sayğaclarını oğurlamaqda şübhəli bilinən Bakı şəhər sakini S.Məmmədli müəyyən edilərək saxlanılmışdır.Araşdırma aparılır. 

Yasamal rayonunun Yeni Yasamal yaşayış sahəsində yerləşən uşaq bağçalarının birindən 2 ədəd noutbuk oğurlamaqda şübhəli bilinən şəxslər saxlanılmışlar

13.02.2022

Yasamal RPİ-nin 29-cu Polis Şöbəsinə fevralın 3-də Yeni Yasamal yaşayış sahəsində yerləşən uşaq bağçalarının birindən 2 ədəd noutbukun oğurlanması barədə məlumat daxil olmuşdur.  Polis əməkdaşlarının keçirdikləri əməliyyat tədbirləri nəticəsində oğurluq əməlini törətməkdə şübhəli bilinən Bakı şəhər sakinləri B.Bağırov və C.Qarayev müəyyən edilərək saxlanılmışlar.Araşdırma aparılır.