Bakı şəhərində və respublika ərazisində 54 toy şənliyinin monitorinqi həyata keçirilib

17.02.2022

Fevralın 17-də Daxili İşlər Nazirliyinin, Qida Təhlükəsizliyi Agentliyinin və İqtisadiyyat Nazirliyi yanında Dövlət Vergi Xidmətinin nümayəndələri Bakı şəhərində və respublika ərazisində 54 toy şənliyinin monitorinqini həyata keçirib.   Monitorinq şadlıq saraylarında keçirilən şənlikləri əhatə edib.- 93 nəfər “COVID-19” pasportu olmadığına görə şənliyə buraxılmayıb.  

Nərimanov rayonu ərazisində münaqişə zəminində iki nəfəri kəsici-deşici alətlə öldürməkdə şübhəli bilinən N.Məmmədov tutularaq istintaqa təhvil verilmişdir

17.02.2022

Nərimanov RPİ-nin 18-ci Polis Şöbəsinə fevralın 18-də saat 00.30 radələrində Bakı şəhər sakini Fərid Alırzayevin və Sumqayıt şəhər sakini Şahin Bayramovun ağır dərəcəli bədən xəsarətləri ilə xəstəxanaya gətirilmələri və orada ölmələri barədə məlumat daxil olmuşdur.Dərhal rayonun polis və prokurorluq orqanlarının əməkdaşları tərəfindən müvafiq tədbirlər həyata keçirilmişdir. Araşdırmalarla rayonun Təbriz küçəsində bir qrup şəxs – bir tərəfdən Şahin Bayramov və Fərid Əlirzayev, qarşı tərəfdən isə Nurani Məmmədov və digər şəxslər arasında kəsici-deşici alətlərdən istifadə edilməklə yaranmış münaqişə zəminində qərəzli xuliqanlıq hərəkətləri nəticəsində Ş.Bayramov və F.Əlirzayevin aldıqları xəsarətlərdən ölmələri müəyyən olunmuşdur. Faktla bağlı Cinayət Məcəlləsinin 120.2.7 (iki və ya daha çox şəxsi öldürmə) və 221.3-cü (silah qismində istifadə olunan əşyalar tətbiq etməklə xuliqanlıq etmə) maddələri ilə cinayət işi başlanmışdır.Polis əməkdaşlarının keçirdikləri təxirəsalınmaz əməliyyat-axtarış tədbirləri nəticəsində Nurani Məmmədov şübhəli şəxs qismində tutularaq istintaqa təhvil verilmişdir.  Hazırda cinayət işi üzrə tam, hərtərəfli və obyektiv istintaq aparılmaqla təqsirli şəxslərin dairəsinin müəyyən edilərək məsuliyyətə cəlb olunmaları istiqamətində zəruri istintaq-əməliyyat tədbirləri davam etdirilir.

Sumqayıt şəhərinin H.Z.Tağıyev qəsəbəsi ərazisində “Mercedes” markalı avtomobil aşmışdır

17.02.2022

Fevralın 17-də saat 17 radələrində Sumqayıt şəhərinin H.Z.Tağıyev qəsəbəsi ərazisində Bakı şəhər sakini Seymur Əliyev idarə etdiyi “Mercedes” markalı avtomobili aşırmışdır. Nəticədə sürücü və sərnişinləri – həyat yoldaşı Fidan Ələkbərova və oğlu Həmzə hadisə yerində ölmüşlər.Baş İstintaq və Təhqiqat İdarəsi tərəfindən araşdırma aparılır.

Şəmkir rayonunun Düyərli kəndi ərazisində “Nissan” markalı avtomobil daş hasara çırpılmışdır

17.02.2022

Fevralın 17-də saat 13 radələrində Şəmkir rayonunun Düyərli kəndi ərazisində Tovuz rayon sakini Mahir Nağıyev idarə etdiyi “Nissan” markalı avtomobili daş hasara vurmuşdur. Nəticədə sürücü hadisə yerində ölmüş, sərnişini olan həyat yoldaşı xəstəxanaya yerləşdirilmişdir. Şəmkir RPŞ-də araşdırma aparılır.

Suraxanı rayonunun Hövsan qəsəbəsi ərazisində “VAZ-2102” markalı avtomobillə qəsəbə sakini M.Mustafayeva vurulmuşdur

17.02.2022

Fevralın 17-də saat 21 radələrində Suraxanı rayonunun Hövsan qəsəbəsi  ərazisində qəsəbə sakini A.Səfərov idarə etdiyi “VAZ-2102” markalı avtomobillə yolu keçən həmyerlisi Mahirə Mustafayevanı vurmuşdur. Nəticədə xəstəxanaya yerləşdirilmiş piyada orada ölmüşdür.Suraxanı RPİ-də araşdırma aparılır.

İsmayıllı rayonunun Diyarlı kəndi ərazisində “KamAZ” və “QAZ-3110” markalı avtomobillər toqquşmuşdur

17.02.2022

Fevralın 17-də saat 16 radələrində İsmayıllı rayonunun Diyarlı kəndi ərazisində Bakı şəhər sakini H.Şabanovun idarə etdiyi “KamAZ” və İsmayıllı kənd sakini Eynulla Daşdiyevin idarə etdiyi “QAZ-3110” markalı avtomobillər toqquşmuşdur. Nəticədə xəstəxanaya yerləşdirilmiş E.Daşdiyev orada ölmüşdür.Baş İstintaq və Təhqiqat İdarəsi tərəfindən araşdırma aparılır.

Yevlax şəhəri ərazisindəki dəmir yolu xəttinin 100 metrlik hissəsini kəsərək oğurlamağa cəhd göstərmiş 5 nəfər NBPİ-nin əməkdaşları tərəfindən saxlanılmışdır

17.02.2022

Fevralın 15-də Yevlax şəhəri ərazisində yerləşən Taxıl Məhsulları Kombinatına gedən dəmir yolu xəttinin 100 metrlik hissəsini kəsərək oğurlamağa cəhd göstərmiş “Baku Steel Company” şirkətinin 5 nəfər işçisi Nəqliyyatda Baş Polis İdarəsinin əməkdaşları tərəfindən saxlanılmışdır.Araşdırma aparılır. 

Xəzər rayonu ərazisindəki bir torpaq sahəsindən 6 tonluq su çəni və bir evdən məişət əşyaları oğurlamaqda şübhəli bilinən A.Quliyev saxlanılmışdır

17.02.2022

Xəzər RPİ 2-ci PŞ əməkdaşlarının keçirdikləri əməliyyat tədbirləri nəticəsində fevralın 16-da rayon ərazisindəki bir torpaq sahəsindən 1500 manat dəyərində 6 tonluq su çəni və bir evdən 600 manat dəyərində məişət əşyaları oğurlamaqda şübhəli bilinən Bakı şəhər sakini A.Quliyev saxlanılmışdır.Ətrafında aparılan tədbirlərlə onun fevralın 12-dən 16-dək olan müddətdə bir evin həyətindən 580 manat dəyərində su nasosu, avtomobil ehtiyat hissələri və dəmir boruları oğurlaması da müəyyən edilmişdir.

Səbail rayonu ərazisində 3 avtomobildən, bir evdən və bir həyətdən oğurluq törətməkdə şübhəli bilinən R.Yuzayev saxlanılmışdır

17.02.2022

Səbail RPİ 8-ci PB əməkdaşlarının keçirdikləri əməliyyat tədbirləri nəticəsində müxtəlif vaxtlarda rayon ərazisində 3 avtomobildən pul, videoregistrator və 780 manat dəyərində məişət əşyaları, bir evdən müşahidə kamerası, bir həyətdən isə su nasosu oğurlamaqda şübhəli bilinən Bakı şəhər sakini R.Yuzayev saxlanılmışdır.

Sumqayıt şəhər sakini F.Fətəliyevdən narkotik vasitələr və elektron tərəzi aşkar edilərək götürülmüşdür

17.02.2022

Sumqayıt ŞPİ 3-cü PB əməkdaşlarının keçirdikləri əməliyyat tədbirləri nəticəsində F.Fətəliyev saxlanılmışdır. Şəxsi axtarış zamanı ondan heroin aşkar edilmişdir.Davam etdirilən tədbirlərlə onun evinə baxış zamanı oradan əlavə 78 qramdan artıq, 85 qrama yaxın tiryək, 280 qram marixuana və 1 ədəd elektron tərəzi aşkar edilərək götürülmüşdür.